Bruk tagok yaom jien bac meda ngak brei rilo SV gaok kan kandah, ba tal bruk nduac duah bruk ngak langiu tuk bac 

Anak bruk dom sang bac ĐH daok kuhria tagok yaom jien bac, Minh Thư, SV thun ka 3 - khoa Quản trị di sang bac ĐH Công nghiệp ban raya HCM khan lac, bruk jien bac tagok yaom meda ngak brei kan kandah ka baoh sang. Sang di Thư tok payua brei sa yaom jien halei nan, meyah tagok yaom jien bac tuk ini, Thư kuhria nao ngak langiu mon bac piah hu jien daong prein ka amaik ame“Kan kandah lac oh nyaik hu, bhian di nyu drei likau amaik ame sa thun dom pluh triệu, daok meyah tagok yaom jien bac ye kan kandah jang, drei meda nao ngak langiu mon bac piah hu jien pabak tame yaom jien bac tagok nan.”

Ông Trần Nam, akaok jabat brei thau saong pambuak bruk doanh nghiệp, ĐH Khoa học Xã hội saong Nhân văn, ĐH Quốc gia ban raya HCM brei thau, meng thun 2022, sang bac mek jien bac yaom bahrau tui jalan tự chủ, yaok gah bac meng 16-24 triệu sa thun ngan haong dom gah pato pakai praong.

Urak ini sang bac daok ginum biai haong dom gah pambuak bruk, padang danak dak brei ka SV mesraiy jien oh mek laba dalam 4 thun bac. ĐH Quốc gia ban raya HCM jeng hu kadung jien brei ka SV kan kandah mesraiy oh mek laba. Min SV jeng brei sahneng kuhria dom danak dak bac saong yaom jien mesraiy ka nyu lagaih. Jeng tui panuac khan di ong Nam, langiu di nan, sang bac ĐH Khoa học Xã hội saong Nhân văn jeng hu padang Pasak tư vấn tuyển sinh saong daong urang bac piah samar thau dom kan kandah, tavak tavaiy, samar ba tabiak dom jalan daong: “Sa bruk ngak biak praong nan lac daong dom SV daok bac megru di dom sang bac piah paglaong bruk daong ka SV, piah thau dom kan kandah gah jien padai, gah bac megru, mbang huak, labik daok atau dom bruk gah hatai sahneng, pambuak haong doanh nghiệp piah daong ka dom adei hu bruk ngak. Nan lac dom jalan ngak suai lavik.”

Tui GS.Nguyễn Minh Hà, Hiệu trưởng Sang bac ĐH Mở ban raya HCM, dom sang bac công lập pamaong tal tự chủ jien padai, piah khik kajap chất lượng saong cakrok patagok ye bruk tagok yaom jien bac lac bruk njauk nao tal. Min bruk tagok yaom jien bac jeng lac naong trak ka rilo SV, abih di nyu lac dom SV sang kan kandah. Piah langyah bruk ini, brei hu rilo sarak daong ka SV meng rilo gah, meng karja, dom doanh nghiệp saong menuac urang. Gam haong nan, dom sang bac brei hu rilo sarak daong jien bac, yau: daong abih jien bac, daong meteh jien bac, trun meneing jien bac ka nyu lagaih haong yaok kapul SV. Langiu di nan, dom sang bac jeng brei hu sarak brei mesraiy jien ka SV. Urang bac hu mesraiy jien mbang bac oh mek laba atau meka laba lap, hadei di nan tuk bac tamat blaoh bayar veik. Piah ngak hu bruk ini, ong Hà mboh lac njauk brei ka dom gilang pariak hu mbaok tame. GS.Nguyễn Minh Hà, lac:“Brei hu bruk pambuak gauk di gah ngak mbang pablei salih, pambuak haong sang bac ĐH, jabat karja piah peih bruk brei mesraiy njauk bruk saong peih jien tapak ka sang bac ĐH piah đóng jien bac. Daok harei hadei, njauk patagok di Việt Nam, dom taneh ia patagok urang hu tagok biak rilo bruk brei ka SV mesraiy, tapa nan meng langyah hu bruk jien piah bac.”

Tự chủ ĐH saong tagok yaom jien bac lac jalan piah ka dom sang bac padang ngak ka nyu siam labik bac, paglaong chất lượng pato pakai, bo gam haong nan, jeng brei hu dom sarak daong samar drah, peih tabiak jalan ka urang bac hu bac megru samu gauk./.

Urang lang: Mousa Phương – 15/06