Raong anek sit umo 3 thun njauk ruak sởi daok taong ruak di labik daok karei, Khoa Uranaih, Sang iek ruak Rilo khoa ban Buôn Ma Thuột. Sa-ai H’Yên Niê daok di xã Cư Êbur, ban Buôn Ma Thuột, tỉnh Đắk Lắk brei thau, 4 harei dahlau, anek padiak akaok nan sa-ai nao blei jru mai ka anek menyum min ruak oh cadu. Tal tuk anek haok darah idung sa-ai meng ba anek tal Sang iek ruak Rilo khoa Ban Buôn Ma Thuột piak iek ruak. Pak ini dom bác sĩ mboh lac kamuan njauk ruak sởi tagok jeng barah phổi, brei suak yava meng oxy. Sa-ai H’Yên Niê ndom lac: 

“Tuk tame sang iek ruak anek jeng ruak trak, anek ndih miat, sa harei oh mbang oh menyum hagait, harei hadei anek menyum hu sa ly aia tasau sit. Hu suak yava oxy haong suak yava khí dung.”\

 Tui bác sỹ Cao Hoàng Phong, Akaok Khoa Uranaih, Sang iek ruak Rilo khoa ban Buôn Ma Thuột, labaih 1 bilan ini, ruak sởi nyu tamuh khang, dom menuac tame sang iek ruak taong ruak tagok glaong haong 32 urang. Gam haong ruak sởi, Khoa jeng daok taong ruak rilo uranaih ruak pandiak tabiak darah. Bác sĩ Phong brei thau, meng akaok thun tal ini, Khoa uranaih hu taduan iek ruak saong taong ruak labaih 200 uranaih njauk ruak pandiak tabiak darah. Bruk njauk menyai nan lac dalam dom adit jaik ini, dom urang ruak tame sang ruak tagok glaong, menuac ngak dalam sang iek ruak oh ginup pabak ka bruk taong ruak, Sang ruak hu patagok y, bác sĩ meng dom khoa karei piah daong. Bác sỹ Cao Hoàng Phong, Akaok Khoa uranaih, Sang iek ruak Rilo khoa ban Buôn Ma Thuột brei thau:  

“Uranaih tame taong ruak ba tal tapa prein dalam tukvak jaik ini, abih di nyu lac paneng ndih, Khoa oh pabak hu, oh ginup nan ye brei caik rah tui hành lang. Blaoh dom urang y tế di Khoa jeng oh ginup min hu ba dom bác sĩ meng Khoa karei mai daong taong ruak".                                                            

Ong Hoàng Nguyên Duy, Phaok yam ndok Sở Y tế tỉnh Đắk Lắk brei thau, anak tal, 2 ruak ini daok rah tabiak srau kadau, meda hu rilo menuac njauk ruak. Bruk ini ngak trak damak oh sit ka dom sang iek ruak. Piah patakik bruk mbuan tamuh ruak khang, Sở Y tế Đắk Lắk hu patabiak rilo sarak saong mbang nyaom biai piah caga dom jalan pacang caga haong bruk rah tabiak di ruak. Gam haong nan, brei jhul khang bruk pathau khan pacang caga ruak pandiak tabiak darah jeng yau jak ba amaik ame ba anek nao klauk vắc-xin caga ruak sởi:

 “Jit ruak urak ini daok pasang iek hu, min anak tal jit meda tamuh khang. Sở Y tế hu tacei pato sang iek ruak Rilo khoa ban Buôn Ma Thuột caga pacang jit. Meyah tal biar ye ramik labik daok karei taong ruak 30 taneng, meyah gap mbiah ye lac 60 laneng saong meyah trak jang ye lac 100 laneng”.

Tui yaok pataom di Sở Y tế tỉnh Đắk Lắk, tal harei 12/9, tỉnh hu labaih 3.100 urang ruak pandiak tabiak darah saong 115 mbang ruak sởi. Ruak pataom tame bilan 9 saong labaih 2 ribau urang njauk ruak pandiak tabiak darah saong labaih 100 mbang ruak sởi. Nan ye, gah y tế, dom puk palei saong rahra brei thau pacang caga plaih bruk jit kateik jit meda tagok glaong dalam tukvak anak tal./.