Amuk Nguyễn Thị Chẳng 

Bruk papaok dom janih ahar yau: ahar tapei bilik, pei nung, bánh ú…piah pablei lac jalan duah jien tame di sang muk Nguyễn Thị Chẳng daok di Khu phố 24, phường Bình Hưng Hòa A, quận Bình Tân, TPHCM. Jit ruak tamuh tabiak  gam haong dom mbang paatah di gauk dalam thun 2021 ngak ka amuk oh sumu caga, oh ginup jien piah kuhria ka raidiuk. Muk Chẳng khang hatai nao mesre 25 trieu đồng meng paok jien daong Covid-19 di Kadung jien Daong urang kumei ngak mbang patagok raidiuk ( iew lac CWED) kayua  Kapol urang Kumei Ban raya HCM meng bilan 1 thun 2022 piah peih gilac bruk ngak ahar. Oh cang padang drap ar, padang angan meda bayar jien tui adit hadei di yaok mbang patak pataom jien pablei ahar, meng nan muk Chẳng dak harei dak tani tanat raidiuk:“Phun jien ini laba lap biak lagaih daong ka dahlak ngak mbang patagok raidiuk. Ngak harak gar mesre mbuan, urang jakar mai iek mboh pablei salih ye brei jien mesre chip. Jit ruak Covid-19 meng blaoh, Kapol urang kumei padeih mek jien phun gam jien laba dalam dom bilan gam, mbiah tal mek jien veik blaoh tapa Tết brei mesre veik hu phun jien ngak mbang.”

Daok sa-ai Lâm Ngọc Kim sang daok di labik 82 Miếu Gò Xoài, phường Bình Hưng Hòa A, quận Bình Tân, Ban raya HCM lac urang ngak bruk tự do, jit ruak rah tabiak  ngak ka sa-ai oh tabiak gah langiu hu piah ngak bruk duah jien.  Sa-ai nao mesre 20 trieu đồng piah blei pandap panda  mai pablei jeng yau kuhria ka anek bik mbang bac: “Hu phun jien mesre di Kapol urang kumei, dahlak kuhria ka raidiuk. Tukvak  jit ruak Covid-19 biak kan kandah min dahlak kham yam tapa.”

Sa-ai Nguyễn Thị Tâm, urang dalam dhar kapul urang kumei  palei 7, xã Phạm Văn Hai, huyện Bình Chánh, TPHCM, lac po di labik jhik khan ao mbang pah. Sa-ai Tâm brei thau, hadei di rilo mbang mesre dom paok jien daong karei di gauk meng Kadung jien  CWED, urak ini sa-ai mesre hu sa mbang 100 trieu đồng mai blei dom janih mac moc ginup peih sa kapol sit jhik khan ao mbang pah yau ye mac canh size, mac vắt sổ, mac jhik. Oh lac patagok raidiuk ka drei bo sa-ai daok hu ba bruk ngak ka labaih 20 adei sa-ai dalam xã hadei meng jit Covid-19, jien mek tame meng 6 -7 trieu đồng sa urang sa bilan. Sa-ai Tâm brei thau: “Dahlau diah sang dahlak dalam sarak patruh iek patrun kathaot di xã. Hadei ini,  hu mesre phun jien laba takik di Kapol urang kumei ye blei hu mac moc, duah hu bruk ngak. Ka sa nan lac pasiam raidiuk dalam sang, dua tra lac ba bruk ngak ka mikva dalam puk paga”.

Muk Trần Thị Phương Hoa, Phaok Akok Kapol urang kumei  Ban raya HCM brei thau, padang tabiak di thun 2003, mbiah tal ini, Kadung jien Daong urang kumei ngak mbang patagok raidiuk ngak bruk hu 19 thun. Kadung jien ini brei ka labaih 12.000 mbang urang kumei mesre tapak, kuhria abih tih labaih 300 tỷ đồng. Dalam nan, hu jaik 4.000 urang kumei yam tapa truh kan kathaot. Kuhria meng bilan 10 thun 2021 mbiah tal ini, anak bruk kan kandah kayua jit ruak Covid-19 mbang ka 4 di Ban raya HCM, Kadung jien daong ka labaih 3.000 mbang urang kumei mesre ngan saong phun jien abih tih labaih 70 tỷ đồng. Jaik abih phun jien brei mesre hu pandar njauk bruk, ba mai kein laba glong. Gam haong paok jien brei mesre oh padang drap ar, pandang angan, jien laba 0,7% sa thun ngan saong jien mesre karei di gauk, glong abih tagok tal 100 trieu dong, Kapol urang Kumei Ban raya HCM peih tal pato pasram dom ilamu cong nghe hu makna praong daong ka adei sa-ai kumei ngak mbang patagok meng kinh tế số. Muk  Trần Thị Phương Hoa daok brei thau lac:“Anak tal, hu danak dak “Café khởi nghiệp” piah daong ka urang kumei salih tapa pandar ilamu số tame bruk ngak mbang pablei salih, tui bruk ngak bo khol dahlak peih pato pasram. Langiu di nan, khol dahlak peih tal pato dom ky nang, ilamu daong ka adei sa-ai  pablei salih, cih vak tame yau habar piah gam thau hu jien laba, phun jien di drei  gam patak pataom ka drei gam bayar jien phun ka Kadung jien”.

  Urak ini, Kadung jien CWED daok ba tabiak bruk daong ka dom adei sa-ai urang hoi mesre piah yam tapa truh kan kathaot di 22 quận, huyện saong Ban Thủ Đức, Ban raya HCM. Piah nao gam saong klah rabha haong dom urang kumei kan kandah, dalam thun 2022, Kadung jien CWED meda peih brei jien mesre kuhria abih tih lac 195 tỷ đồng ka labaih 7.100 urang. Meng hu phun jien di Kadung jien CWED daong pabak prein bo dom adei sa-ai urang hoi kathaot hu yam tapa kan kandah, samar tani tanat raidiuk, gam haong nan rik daong patrun bruk nao mesre jien gah langiu laba glong./.

Urang lang: Ai Nghiem -20/3/2022