Hadei di dom mbang hajan akaok bilan, dom baoh durain dalam bein sang Y BLiêng Hmok, daok di palei Tara, xã Hòa Đông, huyện Krông  Păk praong samar yau yuk, jaik abih praong nde panyin lisei. Y Bliêng ye daok ndik angaok jhung kayau, kak yaok dhar phun saong dom baoh. Di tapen bein, sa phun durain yau ruak kik, hu pruh cur mbong abih gha. Y Bliêng brei thau, pandiak bhang dalam bilan thu meng blaoh ngak ka phun oh daok khang prein, dom baoh samu mateh dut saong tukvak ini bilan dahlau, nan ye sang njauk pataom prein tame iek glang, pacang caga khut baoh kayua bimau ruak atau jaoh jruh kayua hajan hangin:“Bilan ini drei rilo meng nao pruh jru saong kak durain. Kak dom dhar halei hu baoh trak, caga hajan hangin yuk nyu ngak khut baoh. Jruh laik dom baoh jeng biak damen”

Dom sang hu bein sit saong hu yaok piluh phun durain yau Y Bliêng, jeng meda eng drei sangka bein phun di drei, min dom sang pala rilo durain, abih di nyu nan lac durain lavik thun, njauk pah rilo urang ngak piah pacang caga hajan ribuk. Pagap yau ong Phạm Dần, daok pak palei Hòa Thành, xã Hòa Đông, meng kreih bilan 5, tuk baoh daok sit, njauk pah kapul 6 urang ngak bruk ndik tagok phun, kak dhar, kak baoh durain. Ong Dần brei thau, tuk hu hajan, baoh durain meda praong biak samar, sa dhar durain meda hu tal mateh tạ baoh, nan ye sang njauk ngak chip:“Bilan hajan tal paje, drei oh caga lac oh samu. Kayua hajan bhian gam tui hangin. Bo tuk nan, baoh nyu praong paje, blaoh gaok hangin lac jaoh”.

Sang ong Nguyễn Đình Vượng, daok pak palei Hòa An, xã Hòa Đông, bruk sangka phun durain dak harei dak rahtabiak rilo. Bein phun 18 thun, dhar biak rilo, hu tuk brei hu kapul urang ngak ilo tal labaih 10 menuac. Urang ngak hareik, urang cakaong gai pacang meng pasei tal yaok labik bo ong Vượng tacei, piah daong ka durain pacang caga veik haong hajan hangin. Dom urang karei ye ndik tagok glaong piah kak dhar phun tame gheng pacang. Tui panuac khan di ong Vượng, durain meng tuk tabiak baoh tal tuk paik bhian dui atah 130 harei, urak ini tapa hu labaih 60 harei. 70 harei daok veik di bilan ini, urang ngak nong daok kham marat khik ka yaok baoh durain. Gam urang ngak pah gam po bein, thei jeng iek praong yaok baoh yau iek praong ia hauk ia mata di drei:“Saai maong tame phun ini nýe. Dahlak dang mala dahlak ndem urang oh ndik tagok veik min urang jeng daok ndik. Di mangaok jhung phun hu dua baoh. Mayah oh kak ye meda klak nao. Hajan ye jruh chip kayua dua baoh samu 7 kilo ye ngak habar bo oh jaoh. Min kak veik meda khik hu dua baoh nan. Bo hu dua baoh nan ye labaih jien biyar pah manuac ngak, gam mbang huak jeng daok labaiih, saong lac hu bruk ngak ka urang ye urang biak chreih chrai”

Tui ong Đỗ Văn Thưởng, Akaok kapul Urang ngak nong xã Hòa Đông, bilan thu meng blaoh biak khang ba tal jruh biak rilo baoh di rilo sang bein. Min meng dom ilamo di huyện pala durain rilo abih di Đăk Lak saong bruk kham marat duah thau, bac megru ilamo di dom urang ngak nong, jaik abih dom bein di xã jeng meda khik hu rilo baoh:“Tal urak ini ye dom baoh jruh jeng daok dalam bruk kuhria mboh di drei, jeng lac angaok phun jeng daok hu baoh. Dom bein sangka oh tani tanat ye meda daok jruh, min ngan haong dom urang iek glang siam ye dom baoh angaok phun yau nan lac khik kajap”

Đăk Lăk lac tinh pala durain rilo abih dalam taneh ia ngan haong labaih 32 ribau ha. Daok Krông Păk lac huyen pala durain rilo abih di Đăk Lăk, jaik 10 ribau ha. Phun durain oh lac daong ka rilo urang ngak nong dalam palei ngak kaya mada, bo daok ba mai ka bhum taneh ini hu veik sa harei pataom gah pandap biak chreih chrai, dui pachreih hu rilo urang takre, lac harei pataom durain Krông Păk, hu peih ngak 2 thun sa mbang. Meng tari tareng, kham marat abih drei, urang ngak nong pala durain daok pak xã Hòa Đông, huyện Krông Păk jang yau dalam tỉnh Đăk Lăk, daok yam tapa dom kan kandah di langik tasik, pamaong tal bruk bui sambai dalam tuk Harei pataom durain Krông Păk mbang ka dua, hu peih ngak di akaok bilan 9 anak tal./.