Bruk padang ngak sang ka urang ngak pah sang jeng lac sa jalan nao njauk kuhria ta

Dalam jalan cak rok patagok sang daok meng ini tal thun 2025, TP.HCM hu patabiak Sarak 4151 di bilan 12/2021, brei thau cambaih dalam tukvak ini, caong cak rok 47 danak dak sang daok xã hội, dalam nan hu 10 danak pandar quỹ taneh 20%, nan lac dom danak dak brei hu labaih 10 ha, po buh jien tame ngak brei caik tabiak 20% quỹ taneh padang ngak sang daok xã hội, ngan haong mblang taneh praong meng 2 triệu mateh mét vuông sàn tagok, pataom tame rilo di dom quận: 7, 12, Bình Tân saong ban Thủ Đức; dom labik dalam ban urak ini hu 2 danak dak. Langiu di labik dalam ban jeng pachreih dom huyện jhul khang bruk cak rok patagok sang daok xã hội ngan haong 8 danak dak, taong abih dalam tukvak ini lac 35.000 baoh sang.

Bruk pabak sang daok xã hội tagok lac sa bruk biak njauk uan tabuan, min piah meda blei hu sang lac sa bruk biak praong, kayua yaom sang urak ini jeng daok di tanut glaong, dalam tuk nan jien mek tame di urang ngak daok bier. Amuk Phan Thị Mai Hà, giảng viên Đại học Bách Khoa, Đại học Quốc gia TP.HCM ndem lac: ngan haong urang jakar, công chức, viên chức Kanja, paok jien 300 triệu tal 500 triệu piah blei sang jeng lac sa bruk biak kan: “Dahlak pato hu labaih 20 thun, min patak pataom piah blei hu sang lac sa bruk biak kan, tal tukvak ini ka oh ngak hu, jeng daok haong amaik ame. Dahlak biak caong maong lac hu sa kadung jien brei ka khol dahlak pah sang piah daok.”

Anak meta mboh lac, piah blei hu sa baoh sang daok xã hội lac biak kan saong tui yaok bruk. Amuk Vũ Thế Vân, akaok Công đoàn dom labik ngak kong, labik chế xuất TP.HCM brei thau dom urang ngak daok dalam bhum hu ilamo ngak bruk biak glaong, jien bilan glaong ye bruk patak pataom di urang saong bruk daong meng amaik ame, gauk gar meda biyar hu jien blei sang. Min, rilo meng lac dom urang ngak di labik chế xuất, labik ngak kong palei di dom tinh lac kan piah duah hu:

  Tui akaok Liên đoàn lao động TP.HCM Trần Thị Diệu Thúy, tapa mbang pasang iek bahrau ini di công đoàn, urak ini hu labaih 1,3 triệu urang ngak daok ngak bruk di ban raya caong hu sang daok. Dalam nan, hu jaik 40.000 urang daok di labik  lưu trú, ký túc xá di dom labik ngak kong. Rilo meng lac dom urang pah sang trọ dalam dom bilik praong 14 m2, yaom pah sang tui kuhria meng 1,6 triệu đồng sa bilan, labaih 4 urang daok haong gauk. Rilo urang brei thau lac hu buh tabiak 10-15% jien mek tame piah biyar jien pah sang. Amuk Thúy caong lac: “Sang brei pah lac sa sarak biak karei bo khol drei njauk kuhria tal dalam sarak sang daok ka urang ngak. Kayua urak ini, urang ngak oh ginup jien piah blei sang. Mayah hu sarak pah sang daok, khik hu tani tant bruk salamat, haci hacih, siam ghieh saong hu sang bac, sang iek ruak di labik jaik urang daok ngak meda siam lagaih jang biak rilo, trun hu biak rilo dom trak damak gah jalan mbak, sang bac”

Sở Xây dựng hu pasang iek dalam TP.HCM, urak ini hu abih tih 33 danak dak di mblang taneh praong labaih 10 ha, po buh jien tame njauk caik tabiak 20% quỹ taneh piah padang ngak sang daok xã hội tui adat, ngan haong abih tih mblang taneh labaih 105ha saong 70.000 baoh sang. Dalam nan hu 26 danak dak kayua po buh jien tame ngak saong biyar hu bloh 14 danak. Yau nan, quỹ taneh hu blaoh, dom po buh jien tame ngak hu blaoh, labik jeng hu, bruk njauk biai nan lac ngak habar piah peih ngak samar meng rilo sarak. Taphia di nan, anak bruk caong khin di rilo urang ngak, Liên đoàn Lao động TP.HCM jeng hu ba tabiak, kuhria tal bruk padang ngak sang brei pah ka dom urang di pak ini, kayua “nan lac sa bruk siam, hu makna praong saong mbuan langyah jang dut saong bruk blei sang daok xã hội”./.

Urang lang: Thu Thao – 09/05