Bilan padai Đông Xuân ini ban Cần Thơ trun pajaih labaih 72.000ha, tal tukvak ini mikva yuak hu labaih 22.000 ha haong năng suất hu 7 tấn meteh sa hecta. Tui panuac khan di urang ngak nong angan Nguyễn Văn Bùi, xã Trung Hưng, huyện Cờ Ðỏ, bilan padai ini sang ong ngak 7 hecta padai Ðài thơm 8. Thun ini langik lagaih, padai hu năng suất biak glaong. Min tuk yuak, yaom padai  oh glaong yau tuk dahlau Tết nan ye laba hu 4 triệu đồng sa công min:“Padai thun ini pala njauk, tuk camereip nyu hu yaom, min tal tuk yuak yaom nyu laik trun. Dahlau Tết urang mai caik jien takai yaom 8.700 đồng sa kg, tapa Tết padai daok 8.400 đồng/kg, min tal harei ini urang blei likau trun 400 đồng, lac daok 8.000 đồng/kg, yaom ini lap jang jaik 1.000 đồng/kg.”

Urak ini, urang nong di Vĩnh Long daok yuak padai đông xuân. 10 harei dahlau, urang blei salih tame tal mblang hamu caik jien takai haong yaom meng 8.000 tal 11.000 đồng /kg tui janih padai. Min dom harei ini yaom padai trun biar, rilo urang blei salih klaak jien caik takai. Rilo urang nong kayua huac oh pablei hu padai nan ye ginum haong urang blei piah pablei yaom lap jang duk haong yaom caik jien takai dahlau daih. Sa-ai Trần Văn Minh, daok di xã Phú Đức, huyện Long Hồ khan lac sa-ai ginum veik haong urang blei piah pablei hu padai: “Dahlak mek jien takai yaom 8.500 đồng sa kg padai 5451, padai 98 harei yuak. Min urak ini padai tagok 100 harei meng brei yuak. Menuac blei jeng krein, jeng randap nan ye oh ginum biai veik.”

Ong Trần Thái Nghiêm, Phaok Yam ndok Sở Ngak nong saong Patagok palei pala ban Cần Thơ brei thau, gah ngak nong Cần Thơ mboh lac, tui yaom yau urak ini saong tui bruk pala ngak hu mbuan lagaih dalam bilan Đông Xuân ini, rahrah daok jayah meng năng suất tal kein laba. Piah ba kein laba ka rahra, ka doanh nghiệp, tukvak tapa, gah ngak nong Cần Thơ hu jhul patagok bruk pambuak gauk piah daong ka rahra hu labik pablei tani tanat, saong doanh nghiệp hu bhum pala tani tanat piah paglaong yaom gah padai brah, meng nan pabak hu dom đơn hàng, dom caong khin di gah blei tame di negar langiu: “Dalam bruk yau tukvak tapa, yaom kaom darak pasar trun tagok brei mboh bruk oh siam dalam pambuak gauk saong pambuak gauk oh khang kajap di dom bhum pala ngak. Daok ngan saong urang nong ye tapa dom labik pablei salih sit, tuk yaom trun ye bruk pambuak gauk blei meng cambuai oh ba mai yau hatai caong di mikva, ini jeng lac bruk mbuan ba tal khat lahik praong dalam tuk pambuak bruk.”

Bruk hu mboh cambaih dalam tukvak tapa di gah padai brah bhum ĐBSCL lac kurang bruk pambuak gauk khang kajap di rahra saong doanh nghiệp pala ngak saong blei veik pandap. Nan ye, rilo urang ngak nong halan hatain klaak jien caik takai piah pablei haong yaom glaong jang, yaom lac hu pambuak bruk blaoh haong doanh nghiệp. Daok gah doanh nghiệp jeng gaok kan kandah tuk yaom padai tagok glaong, njauk blei veik haong yaom glaong jang piah pabak dom đơn hàng hu mbaoh tangin blaoh. Tapa nan brei mboh cambaih lac, tuk yam tame bilan padai Đông Xuân, yaom padai trun biar ye rahra maong akaok doanh nghiệp atau cang yaom tagok, dalam tuk doanh nghiệp tok blei di dom urang hu mbaoh tangin pambuak bruk./.