Dalam dom harei tapa, di dom palei Cam pak Bình Thuận, rahra daok ndem biai rilo ka bruk Kanja kuhria ngak sang cuh menuac matai meng dien hu caik di 2 huyện Bắc Bình saong Tuy Phong. Ong Ức Viết Vòng, daok di xã Phan Thanh, huyện Bắc Bình brei thau, ini lac jalan ngak biak njauk hatai rahra, abih di nyu nan lac ngan haong urang Cam tui agama Bàlamôn, kayua adat cambat, tuk metai nao bhian hu ba nao cuh.

"Ini lac bruk biak siam, ba mai rilo siam lagaih dalam harei hadei, cambaih laih lac hu daong ka mikva urang Cam takik glaih glar jang dalam bruk  ngak ndam matai, cuh, njauk nao duah phun glai, kaoh njuh piah cuh. Ini jeng lac bruk daong patrun jien ngak ndam matai di bhap bini."

  Lac urang Cam tui agama Bàlamôn, ong Lư Quốc Thiện, daok di xã Phan Hiêp, huyện Bắc Bình, tỉnh Bình Thuận ndom lac:

" Adat cuh menuac matai di urang Cam tui dahlak lac bruk ba mai rilo hệ lụy, ka sa lac gah alam langik tasik, ka dua lac cuh di anak mata ngak oh mekre ka manuac sia, tal rahra. Tui dahlak, Ndang saong Kanja caik hatai sangka padang ngak sang cuh tui njauk adat cambat di urang cam, nan lac pandap alin di Đảng saong Karja brei ka urang Cam, nan ye dahlak biak pok meyaom."

Piah hu ba tame ngak jeng biak jalan ngak di Trung ương, harei 02/8/2022, UBND tỉnh Bình Thuận patabiak jalan ngak ka 2481 ka bruk peih ngak danak dak. Tui kuhria, danak dak sang cuh caik di huyện Tuy Phong meda ngak salah saong ba tame pandar dahlau di thun 2025. Min, tui Mban Khik ramik danak dak buh jien tame ngak di huyện Tuy Phong, ini lac bruk bahrau, caong hu kong nghe glaong saong kan ngak, dalam tuk dom huyen hu jao ngak danak dak ka oh hu ilamo dalam bruk ngak ini, nan ye dalam tuk padang ngak harak gar danak dak jeng hu dom kan kandah. 

 Ong Nguyễn Văn Đảo, urang ngak gah Mban Khik ramik danak dak buh jien tame padang ngak di huyện Tuy Phong, tỉnh Bình Thuận brei thau:

"Meng dahlah mai tal urak ini, Mban ka oh bhian ngak danak dak deih yau ini, nyu karei jang dom danak dak karei, kayua yau nan ye dalam tuk peih ngak jeng gaok kan kandah. Ka dua veik lac danak dak ini daok dalam labik khik piah kaya negat tui Sarak ka 1277 harei 1/11/2023 di Thủ tướng Rajaei, kayua yau nan ye Mban daok peih bruk pilih ruah po thau piah taong yaom bruk khik piah kaya tui njauk adat."

   Daok di huyện Bắc Bình urak ini jeng ka oh njauk gauk labik padang ngak. Tui pathau khan di palei, labik padang ngak sang cuh di labik taneh praong 2.196 m2 di palei Tịnh Mỹ, xã Phan Thanh, lac taneh 5% kayua xa khik iek. Dalam nan, hu 312m2  hu tuh bê tông xi măng piah pabak ka bruk cuh manuac metai ka rahra daok pak palei Tịnh Mỹ tui adat cambat meng kan di urang Cam tui agama Bàlamôn; binah taneh daok veik praong labaih 1.922m2 xã hu jao ka Mban adat cambat cuh manuac metai pak palei Tịnh Mỹ pandar piah pala padai. Tui quy hoạch pandar taneh tukvak 2021 - 2030 di huyện Bắc Bình, taong abih mblang taneh praong labaih 2.196m2 hu quy hoạch lac taneh kubo (sang cuh).

 Ong Nguyễn Mậu Hầu, Yam ndok Mban khik ramik danak dak buh jien tame padang ngak huyện Bắc Bình, tỉnh Bình Thuận brei thau, dalam thun ini, danak dak sang cuh manuac metai hu peih ngak dom bruk caga buh jien tame padang ngak. Urak ini, danak dak jeng daok tavak tavaiy:

 "Dahlau deih danak dak drei likau lac sang cuh meng dien, min tapa pasang iek, bac magru di dom tinh, ban gah pai negar ye nyu lac sang cuh pambuak pagam dien saong ga cuh meng ga, peih ngak meng điện. Cuh meng dien abih rilo jien, bo jien glaong ye mikva oh  ba manuac metai mai cuh."

  Langiu di dom kan kandah nan, labik pabak ka bruk pandar danak dak sang cuh meng dien jeng hu caik hatai sangka yau ye jalan tame sang cuh, jamraik pabak ia saong binek caik ia nerak, gam haong nan lac jalan dien piah pabak ka bruk pandar peih sang cuh. Piah ka danak dak samar drah hu ngak salah, brei hu bruk njauk gauk biak glaong meng gah rahra./.