Sang saai Pupur Thị Lệ daok di xã Phước Bình, huyện Bác Ái, tỉnh Ninh Thuận daok hu 3 rai daok haong gauk saong jeng tok pasang tuk umo 14, 15 thun. Amuk Pupur Thị Phin, amaik di saai Lệ dahlau deih tok pasang tuk umo 14 thun. Saai Lệ jeng tok pasang tuk umo 16 thun. Tal anek umei di saai Lệ lac Pupur Thị Huệ jeng tok pasang tuk umo 16 thun.

 "Pupur Thị Lệ Anek kumei kachoa 16 thun ye nyu oh khin bac. Nyu bac jeng oh hu, nyu klak bac blaoh tok pasang".

Tỉnh Ninh Thuận hu 32 bangsa takik, dalam nan rilo meng lac  bangsa Cam saong Raglei. Kanja palei, gah y te saong dom kapul nyaom hu jhul khang bruk ba tangin tame, rik daong paglaong chat luong rahra, meng nan, bruk tok gauk tuk oh ka tal umo thun brei adat saong tok gauk dalam but pajaih dak harei dak hu jhul kadun likuk. Min, kayua raidiuk bhum urang bangsa takik daok kan kandah, kurang bruk ngak, rilo dam dara nao ngak mbang atah nan ye dom amaik ame biak kan dalam bruk khik iek, pato pakai anek bhik,  mbuan hu bruk tok gauk tuk oh ka tal umo thun brei adat.

Hu tain manek tuk ka oh ginup umo thun brei adat, uranaih manek tabiak bhian kurang bilan, hanjul kilo saong dom ruak kik karei biak trak damak ka prein yava tuk daok lac anek kamar. Khoa Sơ sinh sang iek ruak uranaih Gia Lai urak ini hu 7 uranaih manek kurang bilan hu amaik dalam umo meng 15 tal 17 thun. Dom uranaih ini jeng caong hu bruk sangka iek glang biak karei dalam vaktu atah. Bruk kurang ilamo sangka ka rup pabhap saong raong uranaih lac bruk bo dom urang amaik lac ranaih bahrau praong daok gaok. Sa amaik lac ranaih bahrau praong brei thau: "Adei thun ini umo 16 thun. Adei tok pasang tuk umo 15 thun. Adei manek kurang bilan 32 adit. Anek di adei trak 1 ký 6. Anek di adei daok biak sit, sangka iek glang lac biak kan, kayua anek adei manek kurang bilan. Bác sĩ ndem lac biak kan sangka, nan ye adei biak haduh hatai".

Tui dom bác sĩ, bruk ngak amaik di umo ranaih bahrau praong meda caik veik rilo kanjah jhak oh thau dahlau, kayua rup pabhap anek kumei ka oh ginup abih janih. Daok dom urang tok gauk dalam but pajaih, dom kanjah jhak caik veik jeng biak trak damak. Dom uranaih manek tabiak meng dom amaik ame tok gauk dalam but pajaih ye njauk gaok ruak kik tal luac rai. Pagap yau bruk di Lầu Kim Đồng daok di xã Phì Nhừ, huyện Điện Biên Đông, tỉnh Điện Biên, manek tabiak njauk ruak bạch tạng. Yaok bruk mbang huak, nao mai, daok dang jeng gaok kan kandah kaya mata oh maong mboh cambaih.

" Adei bac tal pakat dua ye padeih. Nao bac mboh mata maong oh cambaih, oh bac hu. Adei nao ngak bruk yaok harei ye mata maong oh cambaih jeng gaok kan kandah, oh ngak hu rilo."

Lầu Kim Đồng lac brei mboh ka bruk oh siam mai meng tok gauk dalam but pajaih di saai Lầu Chờ Dễ saong saai Vàng Thị Nếnh, lac anek saai likei tok anek adei kumei, dua adei saai tok gauk hu 5 urang anek ye hu tal 2 urang njauk ruak kayua đột biến di truyền oh hu jru taong ruak. Abih 2 anek di saai Dế saong saai Nếnh jeng klak bac mateh dhi kayua njauk thoái hoá võng mạc, oh maong mboh akhar vak di mangaok papar: “Tuk drei taha nao ye anek bhik meda gaok rambah rambup, oh hu thei piah sangka iek glang, oh hu thei brei mbang, brei cuh khar aw. Mayah anek likei lac daok hu. Daok anek kumei ye oh tok hu pasang ye biak kan. Meng tuk drei thau hu ye drei oh brei tok gauk yau nan veik”.

Tok gauk dalam but pajaih lac bruk tok gauk di dom urang hu gam ralow darah haong gauk, hu but pajaih haong gauk biak jaik. Tuk diuk pasang tok gauk dalam but pajaih, ngak jeng dom gen ruak kik di urang pasang saong urang diuk pambuak haong gauk, manek tabiak anek jaoh jo atau ruak “di truyền”. Dom trak damak mai meng bruk tok gauk dalam but pajaih jeng ngak kanjak jhak tal chat luong rahra, ngak trun bruk manek saong chat luong di manuac ngak bruk./.