Tukvak masa ini yau ye dom thun, urang taong ikan di xã Phước Tỉnh, huyện Long Điền, tỉnh Bà Rịa – Vũng Tàu hu caga blaoh dom janih taong mek ikan, pandap mbang, manjek karak piah brei gilai nao taong ikan masa akaok thun, min tapi thun ini, dom urang taong ikan oh thau bien halei meng meda tabiak tasik taong cap ikan hu.

Ong Nguyễn Tấn, daok di tổ 9, ấp Phước Hương, xã Phước Tỉnh brei thau, thun 2001, ong hu ngak bahrau sayau gu gilai taong ikan mang jan halam katung abih labaih jaik 6 tỷ đồng. Tal bilan 2/2023, chruh gilai hu angan Hino njauk khut trak, oh ngak pasiam hu, kayua nan ye ong brei salih jamariah angan Cummin tapa mada pandar blaoh, hu gam prein nduac khang labaih 480 CV.

Labaih 1 thun dalau, jabat ieik glang đăng kiểm taong yaom jeng brei ka ong, min tapi urak ini oh ngak hu kayua dua janih: hasa di nyu bruk srah jan mek ikan oh njauk hu brei pachreih yang ka dua di nyu jammariak pasalih njauk jammariak barau tamo 100%. Ong Tấn haduh hatai khan lac:

  "Tal urak ini gilai di dahlak hulin ndih angaok ar labaih blaoh 1 bilan paje, mayah adat oh langyah peih ye mbang nao tasik masa akaok thun 2024 drei meda oh tabiak tasik hu. Dahlak caong khin lac, Kanja langyah, oh brei talaih ka drei ta eng bo daok brei ka rilo mikva urang taong cap ikan di Phước Tỉnh ini hu salih mac klak piah patui veik bruk ngak mbang, pambuak haong tasik. Kayua lac jammariak mac klak mada lagaih haong kadung jien di rahra, jammariak bahrau hu yaom biak glaong, labaih jien tỷ đồng".

Daok tui ong Huỳnh Văn Đỏ, urang taong ikan daok di xã Phước Tỉnh lac, srah jan, taong ikan meng dui halam dui jan ieu lac sa bruk ngak mbang meng kan di urang taong cap ikan di ini, yaok rabau urang taong cap ikan di Phước Tỉnh bhian ngak kaya tagok mada. Urak ini, Kanja brei adat oh brei salih jamraik ndah tapa pandar blaoh, ngak ka urang taong cap ikan oh pambuak tambak haong tasik ngak mbang hu: "Gilai ikan di sang dahlak hulin daok caga paatah masa taong yaom đăng kiểm piah akaok thun tabiak tasik, min tapi tal urak ini jeng ka oh tabiak hu. Kanja oh brei taong yaom đăng kiểm yau nan ye akaok thun ini urang taong ikan oh tabiak tasik hu. Dahlak caong khin kanja taoh talaih ka mikva di Phước Tỉnh kayua lac bruk ngak mbang tasik biasa giã cào ieu lac sa bruk ngak meng halei mai di ong muk ong kei caik veik brei pambuak haong tasik. Mayah Kanja daok pandar adat yau daok ndom mayai ye urang taong cap ikan oh daok jalan piah peih bruk mbang ngui".

Tui Yaok pataom di UBND xã Phước Tỉnh, dahlau deih dalam xa hu labaih 1.200 chruh gilai taong cap ikan tasik. Kayua taong cap ikan bhian khat lahik, rilo po gilai pablei gilai ka bhum palei karei, yau nan ye urak ini dalam xa daok 850 chruh, dalam nan 80% chruh taong ikan meng dui jan chrah jan halam, janih ngak mbang oh brei pachreih tui Sarak ka 208 thun 2023 di Thủ tướng Rajaei ka danak dak salih dom bruk taong cap kaya tasik brei ngak kan kandah tal kein lagaih saong alam labik daok di dom janih dalam tasik. Kayua yau nan ye, tui Jabat So Ngak nong saong patagok palei pala tỉnh Bà Rịa – Vũng Tàu, bruk gilai ikan pak di xã Phước Tỉnh oh hu dui atah masa kayua gah jabat kanja ngak tui adat sarak nan.

Ong Phan Thạch, Akaok UBND xã Phước Tỉnh brei thau lac, di bhum palei hu peih ngak tui jalan salih bruk ngak ka urang taong cap ikan, min tapi tal urak ini oh kein lagaih: "Hu rilo bruk kan cak tapik urang taong cap ikan, gilai taong ikan haong gilai dui jan halam karei di gauk biak rilo, mayah salih njauk salih gam jamraik, gam rup gilai… phun jien biak ralo yau nan ye urang taong cap ikan oh ganup prein salih hu. Di xã Phước Tỉnh hu dom urang taong cap ikan salih bruk ngak blaoh min oh hu kein lagaih, mikva salih gilac bruk ngak klak. Likau tagok kanja hu sarak piah daong ka urang taong cap ikan meng bruk brei phun jien masaiy mek laba bier, tukvak suai lavik piah ka rahra ngak mbang sanang".

Tui urang pan akaok So Ngak nong saong patagok palei pala di tỉnh Bà Rịa – Vũng Tàu, Jabat Sở daok likau panuac di UBND tỉnh brei ka bruk padang ngak, ba tabiak dom bruk ngak tui Sarak lek ka 208 thun 2023 di Thủ tướng Rajaei. Daong ba kein lagaih piah ka urang taong cap ikan sahanang dalam bruk ngak mbang pambuak haong tasik, po angan tasik, po akaoh pulao./.