Urang taong ikan angan Ngô Văn Khanh (umo 50 thun, daok di puk Mỹ Khê, xã Tam Thanh, huyện kaoh pulao Phú Quý) hu pambuak haong tasik jaik labaih 30 thun, dalam nan hu jaik 20 thun ngak dom ja nih daong ka bruk taong cap ikan. Sang ong Khanh urak ini hu 2 chruh gilai ikan khang labaih 400 CV. Dom thun tapa, ong jang yau dom urang taong cap ikan karei di huyen pulao Phú Quý mek pulao Trường Sa saong bhum labik baoh majam sang DK ngak labik pasak brei taong cap ikan.

Yaok thun, kapal gilai di ong Khanh bahrau taong mek ikan gam pataom blei di tasik meng 250.000 tal 300.000 tấn ikan kaya tasik. Di tasik, tuk gilai bak ikan lac ong Khanh brei gilac mai mbaok taneh piah pablei ka urang blei di dom pabah lamnge Cà Ná (Ninh Thuận), Nha Trang (Khánh Hoà),… Tui yaok tukvak, ong Khanh biyar jien bilan ka dom urang nao gilai meng 8-20 triệu đồng sa urang sa bilan. Langiu di bruk pataom blei ikan kaya tasik, ong Khanh daok ngak dom janih daong ka urang nao tasik yau ye pablei njam patam, sang manyek kapal gilai ka urang nao taong mek ikan di tasik.

“Drei pataom blei ikan ye pabak gilac pandap mbang, daong ia patau, ia, xang manyek ka mikva. Drei leih pandap trun, blaoh pajeng kaya mai, mikva daok veik nao tasik jaik sa bilan blaoh mai. Tuk gaok gilai ikan di mikva njauk khut ye drei lac ba pataok tame ar. Gam taong mek ikan gam khik quyen ngak po tasik kaoh pulao di negar”

Huyện pulao Phú Quý urak ini hu 1.675 kapal gilai taong ikan, dalam nan hu labaih 37 chruh kapal gilai ngak dom janih daong urang ngak mbang di tasik. Langiu di kapal daong ka dom baoh kapal gilai praong taong mek ikan, kapal daok brei pakhang kapul dom kapal ilai pataom blei kaya ikan di tasik. Bruk pataom blei di dom chruh kapal gilai daong bruk ngak mbang tasik daong ka dom chruh kapal gilai taong mek ikan di atah pahamu masa pablei di tasik, pakurang hu vaktu nao mai, manyek gai urang ngak mbang di tasik.

Trung tá Nguyễn Minh Hải, sa urang Politik di Bilai Jalan tasik pabah lamnge negar di Pulau Phú Quý brei thau, dom chruh kapal gilai ngak daong ka urang ngak mbang tasik rilo meng lac hu mbaok tame pataom blei di labik sang majam DK.

“Di sang majam Phúc Nguyên, dalam nan hu mikva drei daok ngak mbang tasik. Dom chruh kapal gilai ngak dom bruk daong urang di dom kapal ngak mbang di tasik ngak siam dom adat, dom bruk mbang ngui jang yau daong ba gauk dalam bruk taong mek kaya tasik”

Huyện pulao Phú Quý atah di ban Phan Thiết, tỉnh Bình Thuận 56 hải lý, ini ieu lac sa pasak di dom chruh kapal gilai taong mek ikan tasik kurudong. Kayua yau nan ye, huyen pulao Phú Quý pataom rilo chruh kapal gilai ngak dom janih daong dom urang di kapal gilai ngak mbang tasik. Dom kapul kapal gilai pataom blei kaya ikan di tasik jeng hu padang ngak samar drah piah samu khik ramik pandap panda kaya tasik hu siam makre jang, trun manieng phun jien ka yaok mbang nao tasik, patagok jien mek tame brei ka mikva ngak mbang tasik.

Piah daong ba kein lagaih ka urang taong mek ikan pambuak haong tasik, dalam thun 2023, UBND huyện Phú Quý hu pambuak gauk brei pasang iek, pabak angan urang taong mek ikan tasik di atah hu daong sang manyek 2 mbang ngan haong paok jien jaik 185 tỷ đồng. Ong Huỳnh Văn Khải, Phó akaok Chi cục kaya tasik tỉnh Bình Thuận brei thau lac:

“Kapul gilai ngak bruk daong urang ngak mbang tasik di Bình Thuận pataom prein rilo abih pak huyen kaoh pulao Phú Quý, di bruk ngak mangaok tasik, kapul gilai ini biak kham marat ngak bruk. Urak ini di bhum palei ka oh hu sarak halei piah daong ka dom chruh kapal gilai ini, min di pakat angaok. Kanja drei hu sarak daong ka urang taong cap ikan di atah angaok tasik, ye jeng caong hu daong ka dom sruh gilai ini sa paok phun jien, piah ka mikva hu jien piah pataom blei kaya tasik meng dom chruh kapal gilai karei daok taong mek atah angaok tasik".

Ikonomi tasik ieu lac sa janih praong glaong dalam jalan cak rok patagok ekonomi di huyen pulao Phú Quý. Kayua yau nan ye, bruk buh jien tame gah ini hu tinh, huyen biak caik hatai sangka. Huyện Phú Quý urak ini daok ngak salah blaoh mblang ka mik va pakandaok hujan hangin ribuk brei dom chruh gilai ikan pulau Phú Quý (mbang ka 2). Labik ini meda daong ka urang taong mek ikan daok taong mek kaya ikan di bhum tasik Mraong Kreih nagar Trung bộ, Trường Sa, sang DK1 tame pataok pakandaok hajan ribuk. Gam haong dom kein lagaih karei, urak ini pulao Phú Quý daok brei mboh prein khang di drei ka dom chruh kapal gilai daong urang ngak mbang tasik./.