Urang đảng Đặng Dậu Quý ndih tapui thun 1983 daok di xã Cư Suê, huyện Cư M’gar, bac tamat đại học bloh tame ngak dalam sa gilang pariak di Đắk Lắk haong yaom jien bilan glaong. Min hadei di jaik 10 thun, sa-ai padeih bruk piah nao tui hatai takre di drei lac bruk ngak nong. Hu 1,6 ha puh hu amaik ame parabha brei, gam haong phun jien patak pataom hu tuk ngak di gilang pariak, sa-ai pala veik taong abih 800 phun cà phê taha, mesraiy di gilang pariak pala pablak 300 got amriak kalu saong jaik 100 phun durian.

Tuk camereip, kayua hu takik ilamu, rilo phun durian, amriak kalu nyu metai ba tal khat lahik. Oh kadun likuk, sa-ai nao nyim sraiy di gauk gar, di ayut sahabat piah pala pabak veik dom phun metai; bac megru ilamu meng dom chuyên gia ngak nong, blaoh pala tui jalan hữu cơ khang kajap. Hadei di mbang khat lahik, sa-ai hu jak jeng haong bein phun rilo janih brei năng suất glaong. Sa-ai Đặng Dậu Quý brei thau:“Lac sa urang đảng, drei brei thau bruk di drei lac ba akaok nao dahlau dalam patagok bruk ngak mbang, kinh tế, saong hu cakrok meng daong hu ka sang saong daong ka urang karei. Yau thun meng blaoh, drei pala hu  6 tấn durian pablei hu labaih 300 triệu; 2 tấn amriak kalu hu 120 triệu saong bein pabam, cà phê jeng hu labaih 100 triệu. Kaoh abih dom yaom jien buh tame ngak, drei daok laba hu labaih 300 triệu đồng.”

Urang đảng Võ Văn Hoàng umo 64 thun, daok di xã Ea Tu, ban sit Buôn Ma Thuột meng tari taring, oh huac glaih glar saong bak hatai anit menuac. Urak ini, hadei di rilo thun ngak mbang, ong hu 5 ha puh pala durian pablak haong dom janih phun mbang baoh... Abih tih jien mek tame meng ngak bein yaok thun hu 4 tỷ đồng, kaoh abih phun jien buh tame ngak, ong daok laba hu labaih 2 tỷ đồng. Hu jien ndo, ong halan hatian daong ka dom sang kan kandah ka phun jien, ka pajaih, khak drak saong an sinh xã hội jeng yau padang ngak palei pala bahrau di xã. Ông Võ Văn Hoàng khan lac:“Drei thau ilamu pala drak hagait ye drei tacei veik ka mikva, daong gauk patagok. Mboh sang halei kan kandah ye drei daong, sang kan kandah takik ye drei pablei tavak, daok dom sang kan kandah lo ye drei alin hadiah brei, dom sang kan kandah ka sang daok bo ngak sang anit ranam ye dahlak daong yaok sang 5 triệu,  10 triệu, iek tui sang. Drei jeng daong jien ngak jalan, jak ba mikva palei 3 ngak abih dom jalan dalam palei.”

Amuk Lại Thị Loan – Akaok Kapul urang ngak nong tỉnh Đắk Lắk taong yaom, jaik abih dom urang đảng jeng brei mboh hu bruk ba akaok nao dahlau dalam ngak mbang, pala drak, patagok kinh tế. Piah ka bruk patagok ngak mbang, patruh eik patrun kathaot di kapul dak harei dak praong khang jang, dom urang đảng dalam kapul dak harei dak rilo jang, anak tal kapul biak iek praong bruk patagok parilo urang đảng, peih tabiak jalan lac dak harei dak hu rilo jang dom kreih camin urang đảng naih gheih:“Kol dahlak biak iek praong bruk yaih khan urang naih gheih dalam kapul piah ba tame đảng. Dalam dom jalan ba tabiak, gam haong dom kapul nyaom karei, kol dahlak hu dom jalan ngak cambaih laih yau ye brei bruk ka dom urang đảng, dom akaok dhar kapul tacei pato dom urang dalam kapul urang ngak nong naih gheih piah meyah mboh hu, ye ba tame đảng.”

Oh lac sami samar dalam bruk ngak kinh tế naih joi, dom urang đảng yau sa-ai Đặng Dậu Quý atau ong Võ Văn Hoàng daok lac urang abih drei tacei pato ilamu, daong ka rilo urang dalam kapul gaok kan kandah ba gauk patagok bruk ngak mbang, pala drak, paglaong jien mek tame, tani tanat raidiuk, abih drei rik daong padang ngak palei pala bahrau di labik drei daok./.