Tapa blaoh 3 bilan, min bruk pui khuah tuk dalam sang daok ndih jeng daok lac bruk huac kanda di sang amuk Võ Thị Tuyết Em daok di xã Phú Xuân, huyện Nhà Bè. Nan lac dah page harei 15/3, papan kakuh mangaok gác di sang nyu chập điện, apui khuah. Tuk madeih mbau thak apui par tagok meng bilik kakuh, amuk Tuyết Em nduac tabiak kateik chuong brei thau lac khuah di Tổ liên gia khu phố, hu caik anak pabah sang. Sap chuong sring tagok grauk labik dalam khu pho, puk paga jaik taphia ye menuac pan bình pruh, manuac teik xô ia, mac njuk ia, nding ia nduac mai piah padam apui.

Sahaneng veik bruk sang daok dalam jalan sit, radaih padam khuah kan  tame hu, amuk Tuyết Em drut drui ndem lac biak patuah tuk hu chuông brei thau lac khuah di Tổ liên gia, bruk oh huac metai lahik, daong abih drei puk paga, urang daok jaik taphia:“Sang dahlak tuk nan ka oh thau ngak hagait, ye hu dom adei saai dalam puk palei ba gauk tame padam apui. Kayua khuah di mangaok gác, oh huac kan kandah, urang ba gauk ndik tagok, ndik trun piah padam apui. Tuk radaih padam khuah mai tal lac apui padam hu blaoh paje. Tal urak ini, dahlak jeng oh thau ndem panuac hagait piah dhar phol dom adei saai, daong ka sang dahlak”. 

Tapa rilo mbang apui khuah dalam ban brei mboh cambaih dom kein lagaih di bruk Kapul dom baoh sang pambuak gauk pacang khuah padam khuah. Bruk padam khuah, daong duah urang njauk bala tuk camriep lac sa dalam dom bruk  piah trun khat lahik ka manuac saong drap ar.

Anak bruk mbuan hu apui khuah, patuh, piah ka bruk ngak di Kapul dom baoh sang hu siam lagaih, Công an TP.HCM brei patagok bruk pathau khan, pato pasram ilamo langyah tuk hu khuah, patuh. Meng nan, rilo rahra hu thau ka dom bruk ngak dom ilamo ka pacang khuah padam khuah saong hu bruk salih bahrau siam mekre cambaih laih, meng bruk huac apui salih tapa khang hatai jang tuk hu apui khuah, patuh di labik rahra. Ong Nguyễn Hữu Tân, lac urang dalam kapul liên gia di puk 4, xã Lê Minh Xuân, huyện Bình Chánh, khan lac: “Ilamo praong abih tapa dom mbang pasram lac ngak ka drei saong rahra khang hatai tame padam apui khuah. Nan lac tuk mboh khuah drei oh plaih nyaik atau huac hagait. Dahlau di nan, dahlak oh thau ka bruk padam khuah, sahneng lac khuah ye padam meng ia, oh thau  janih apui khuah heli njauk padam meng hagait, oh thau pandar bình padam khuah  CO2 saong bình tapung.”

Lac urang dalam Kapul liên gia naih joi abih daok kham marat pasram, piah lambaok ka TP.HCM tame pakacah Kapul liên gia salamat pacang khuah padam khuah pakat bhum labik, saai Trần Thị Ngọc Nữ, daok pak xã Lê Minh Xuân, huyện Bình Chánh daok caong pato veik dom ilamo padam pui bo drei bac megru hu brei ka rahra thau:“Lac gru pato, dahlak mboh dom ilamo ini biak siam ka dom adei sit. Mayah hu lagaih dahlak meda peih pato ka dom adei dom tal pasram deih yau ini. Dom ilamo ini meda rik tame ngak pasiam veik meng tuk daok sit ka dom adei piah hu ilamo padam khuah tuk bala rahtabiak”. 

Tui Đại tá Huỳnh Quang Tâm, Akaok Jabat Cảnh sát pacang khuah padam khuah saong daong duah urang njauk bala - Công an TP.HCM, tukvak ameh piah padam khuah lac mala 5 minit hadei di tuk apui khuah. Kapul pacang khuah padam khuah pak di labik lac biak hu yaom glaong saong hu brei thau lac padam hu halei oh. Kayua yau nan ye tuk hu apui khuah njauk ieu pataom abih dom kapul, sruh radaih ngak tui asal kadha lac “4 di labik”:“Kapul Pacang khuah padam khuah pak di labik saong abih di nyu nan lac rahra mayah caga hu dahlau dalam bruk pacang khuah padam khuah ye oh caik rahtabiak apui khuah. Saong tuk rahtabiak apui khuah ye hu kapul, sruh radaih padam khuah saong jalan caga dahlau langyah chip meng tuk camriep meda ngak trun manieng takik abih dom khat lahik. Kayua yau nan ye labik ngak, dom yaom glaong di kapul pacang khuah padam khuah pak di labik lac biak hu yaom glaong saong hu brei thau lac padam khuah hu halei oh pak di labik daok, labik ngak bruk”.

Khuah, patuh oh kuhria hu dahlau. Di dom đô thị praong yau TP.HCM, Hà Nội,.. mayah oh padam khuah hu samu, dom khat lahik di dom mbang apui khuah lac biak praong. Dom pandik harao meng dom bruk apui khuah bahrau blaoh brei mboh dom yaom glaong di bruk caga dahlau meng di labik, pandar tukvak ameh piah padam khuah, kayua yaok mbang apui khuah praong jeng tamuh tabiak meng dom asar apui biak sit./.