Dalam tuk mbeik drei yam tame yau urak ini, dom janih ilamo meng kan di urang Cam daok mbuan si lahik nao, oh daok hu patoa veik, min dom janih daoh, tamia bhap bani jeng daok hu dom urang Cam khik ramik saong cak rok patagok, abih di nyu lac rai rah dam dara. Pagap yau Kapul tamia Cam di xã Phú Lạc, huyện Tuy Phong, tỉnh Bình Thuận daok hu khik ramik piah duh pamere dalam dom harei rija, roya di bhap bani Cam. Ini oh lac mblang ma-in siam mekre ka dom urang halei takre daoh tamia bo daok lac labik pataom rilo dam dara hu hatai takre dreih yau gauk. Kadha vak di Jasi – Urang vak di Rayo sap ndom VN daok di TP.HCM hu ndom tal kapul tamia Cam ini:

Hu padang tagok jaik pluh thun ini mai, Kapul tamia Cam di xã Phú Lạc, huyện Tuy Phong, tỉnh Bình Thuận hu rilo menuac thau tal kayua biak gheih saong abih drei ka bruk ngak di yaok urang dalam kapul. Dalan nan, dom dam dara tuk halei jeng lac dom manuac khik ramik dom kadha daoh tamia meng kan di urang Cam.

Sa-ai Lý Kim Y, lac urang hu mbaok tame kapul tamia meng di harei akaok mereip bahrau padang tabiak khan brei thau, akaok meti kapul hu 12 urang, rilo meng lac dom anek saih, sinh viên takre daoh tamia bhap bani Cam. Oh lac tok hu mbaok parang me-in dalam dom rija, roya, tuk ngak adat di urang Cam, bo Kapul tamia Cam xã Phú Lạc daok lambaok ka huyện Tuy Phong nao pakacah dom danak dak daoh tamia bhap bani pakat tỉnh saong mek hu giải glaong.     

  Meng ilamu hu blaoh dalam rup, tuk akaok kapul khan brei thau tapa nyaom zalo caong hu kadha tamia dalam dom mbang pataom ngak adat di puk palei ye dom urang dalam kapul tamia jeng hu mbaok.

Sa-ai Kinh Thị Mỹ Tuyên hadar veik dom harei bahrau tame kapul tamia, sa-ai abih rilo tukvak meng pathram hu sa ragam tamia. Yau nan bo urak ini dom ragam tamia Cam hu jeng bhian randap haong sa-ai. Yaom lac bruk ngak di yaok urang nyu karei di gauk min jeng hu hatai saneng dreih yau gauk lac anek taco urang Cam njauk thau dom ragam tamia  meng kan di bangsa drei. Ini jeng lac hatai saneng mboh bruk khik ramik ilamo hadah krah di urang Cam dalam rai rah dam dara. Kadha ini nyu pachreih ba sa-ai Mỹ Tuyên jeng yau rilo dam dara di xã Phú Lạc khang hatai tui bruk lac “urang tamia bhap bani” luac tukvak tapa, pak di tuk nao bac, tuk nao ngak atah sang.

Kapul tamia ini daok khik bruk ngak dalam luac tukvak tapa lac meng hu bruk ieu pataom, jak ba di sa-ai Bích Thị My Nết – Bí thư Xã đoàn Phú Lạc. Sa-ai My Nết brei thau, dom urang dalam kapul tamia daok jaik gauk, min rilo meng lac dom anek saih, sinh viên saong urang đoàn.         

 Sa-ai My Nết daok brei thau lac, kayua kapul tamia hu padang tabiak meng lavik mai saong dom urang dalam kapul urak ini nao ngak bruk di labik karei atau nao bac atah di langiu tỉnh. Nan ye, anak tal UBND xã meda daong brei padang Klup kapul daoh tamia Cam piah ngak brei khang veik bruk manuac urang; pilih ruah urang dang akaok Klup kapul saong ngak bruk tui adat hukum kayua Akaok UBND xã ba tabiak.  

 Daoh tamia bhap bani Cam hu kak kajap haong dom adat ngak Rija kayua ong Ka-ing, amuk Pajuw, ong Raja, amuk Raja, dang tamia dom ragam tamia bhap bani yau: Tamia kadik, Tamia tanyiak, Tamia kaik tapang dieng, Tamia hawei, Tamia juak apuei, Tamia wah ghaiy, … Dom ragam tamia bhap bani Cam bhian nao gam haong Ginang, kadeit Saranai, Baraneng saong chieng, ngak jeng ragu ragam din dang lamang ndaih min jeng biak drut droi laik dalam hatai.

 Ndom ka Kapul tamia Cam, ong Chế Quốc Minh, sa urang Cam daok di palei Cawait Lạc Trị, xã Phú Lạc, huyện Tuy Phong brei thau, Kapul tamia Cam xã Phú Lạc hu rik daong khik ramik, yuk suan yava ilamo tamia Cam nao tal dom dam dara. Ong jeng lac urang rik daong pren yava haong dom dam dara ba ilamo yao klak Cam tal dom dam dara dalam dom harei akaok mereip bahrau padang kapul saong urak ini jeng daok halar hatian rik daong pren yava haong dom dam dara piah padang sa Kalup kapul daoh tamia Cam ka nyu siam gheih jang saong chuyên nghiệp jang:

Meyah hu padang ngak siam mekre, Klup kapul daoh tamia Cam Phú Lạc meda lac labik pataom dak harei dak hu rilo jang dom dam dara hu hatai takre yau gauk. Ini oh lac mblang ma-in siam mekre ka dom urang ranam ilamo daoh tamia bhap bani Cam bo daok lac labik piah pato pathram ilamu nghệ thuật di dom dam dara, urang daok ranaih umo thun piah pabak manuac urang khik ramik saong cak rok patagok ilamo Cam di puk palei./.