Lac pandap di bhum taneh Cà Mau min urak ini arieng tasik hu raong di jaik abih dom tỉnh tapen tasik miền Tây Nam bộ yau Bến Tre, Trà Vinh, Sóc Trăng... Tapa duah thau di dom labik palao raong di urang nong brei mboh, dom adit jaik di ini, yaom arieng rilaow khik di tanut biak glaong. Amuk Nguyễn Thị Bé, po sa labik blei arieng tasik di ban sit Duyên Hải (Trà Vinh) brei thau, urak ini amuk daok blei arieng janih 1 yaom meng 350.000 - 400.000 đồng sa kg. Arieng janih 2 meng 300.000 - 350.000 đồng sa kg. Daok arieng gạch, janih arieng bingi di abih hu yaom jaik 800.000 đồng sa kg. Meyah dut haong tukvak arieng tagok yaom glaong di abih (puac thun 2021) ye urak ini jeng oh ka samu, min dut haong rilo tukvak karei, ini lac yaom biak glaong .

Sa-ai Nguyễn Văn Hiệu, urang hu danao raong arieng di huyện Cầu Ngang (Trà Vinh) brei thau, bhian di nyu dom po raong arieng meda pataom pren ka dom bilan jaik Tết. Hadei di Tết yaom arieng trun, min thun ini nyu cagar veik.

Jeng tagok yaom khang jaik sa bilan mai ini, lac ikan kèo. Urak ini dom puk palei hu rilo urang nong hu mbaok tame raong ikan kèo lac Tiền Giang, Đồng Tháp, Long An saong Bến Tre…, rilo meng lac sang urang nong raong sit sot. Yau nan min, bruk ikan kèo tagok yaom khang hu ba mai rilo bui sambai ka urang nong, tui nan, rilo sang hu salih tapa raong ikan kèo kayua raong mbuan, tukvak mek veik phun jien lac katut panak.

Urak ini yaom ikan kèo di rilo tỉnh, ban miền Tây Nam bộ hu pablei meng 160.000 - 200.000 đồng sa kg, tagok jaik 3 mbang tukvak dahlau di Tết. Dut haong dom tukvak karei, yaom ikan kèo jeng tagok jang jaik 4 mbang. Yaom ikan kèo tagok glaong kayua lac urak ini hu takik urang raong saong bruk blei piah ngak nguyên liệu tagok khang.

Yaom lac oh tagok yaom khang yau dom janih kaya ikan karei min 2 adit mai ini, yaom ikan pra di miền Tây jeng tagok 4.000-5.000 đồng sa kg, meng 27.000 đồng tagok jeng 31.000-32.000 đồng sa kg. Yaom tagok oh glaong min jeng ba mai siam mekre ka rai diuk di biak rilo urang raong ikan, kayua ini lac janih ikan hu raong rilo abih di bhum, meng Long An, Đồng Tháp tal An Giang…  

Dom sang raong ikan di tỉnh An Giang brei thau, dalam adit ini, yaom ikan tra tagok khang, abih di nyu lac, doanh nghiệp trun tal danao raong caik jien cọc dahlau nan ye urang nong thei jeng bui sambai. Urak ini yaom ikan  pra meng 29.000 - 30.000 đồng sa kg, tui yaom ikan tagok meng 31.500 - 32.000 đồng sa kg, ye urang raong ikan pra daok hu laba.

Tui kuhria mboh dahlau di dom chuyên gia kinh tế, yaom ikan pra daok tagok jang dalam tukvak anak tal kayua darak pasa prong lac Trung Quốc bahrau peih pabah mbang gilac veik saong bruk blei daok tagok glaong. Tui ong Dương Nghĩa Quốc - Akaok Hiệp hội ikan pra Việt Nam, yaom ikan pra meda tagok tal  40.000 đồng sa kg. Yaom ikan pra tagok lac kayua hu rilo doanh nghiệp pablei tabiak negar langiu bahrau hu mboh tangin brei tame darak pasar  Trung Quốc saong urak ini lac oh ka tal bilan cap mek ikan pra piah pablei.

Dreih yau nan, yaom hadang nguyên liệu tukvak tapa jeng tagok tui saong bruk blei di urang pablei salih jeng tagok glaong. Ong Trần Công Danh – Phaok akaok sở Ngak nong saong patagok palei pala tỉnh Kiên Giang brei thau, urak ini yaom hadang nguyên liệu piah ngak pandap caik la-ar pablei tabiak negar langiu meng 130.000-133.000 đồng sa kg, tagok jaik 5.000 đồng sa kg dut haong bilan dahlau. Rilo doanh nghiệp pablei hadang tabiak negar langiu hu rilo đơn hàng jang meng darak pasar Trung Quốc.

Oh njauk lac taong abih dom janih kaya ikan hu raong di bhum taneran kraong Cửu Long jeng tagok yaom dalam dom bilan akaok thun 2023 min meng dom siam lagaih meng darak pasar Trung Quốc saong dom hagait daok rah tabiak di anak meta, mboh lac tukvak anak tal rilo janih kaya ikan dalam aia di bhum ini meda tagok yaom, tagok bruk bruk raong rilo jang. Hadei di jaik 3 thun gaok kan kandah di jit ruak, ini lac tukvak bo rilo urang nong di miền Tây Nam Bộ meda sanang hatai buh jien tame ngak, oh daok duh hatai rilo ka yaom kaom tuk tal bilan mek pablei yau dom thun dahlau diah./.