Di bhum gah akaok kraong Cửu Long, harei 15.7 di ấp Vĩnh Bình (xã Vĩnh Trường, Huyện An Phú, tỉnh An Giang) hu 2 labik glut jaleih jaik gauk di takai kraong gah pai kraong Hậu, atah jaik 50 m. Tui Sở Tài nguyên môi trường tỉnh An Giang, kuhria dalam 6 bilan akaok thun ini, hu 16 labik glut jaleih, ra-ai talah taneh takai kraong, ribaong, atah labaih 800m, khat lahik jaik 954 triệu đồng.

Patui kraong Cửu Long, tỉnh Vĩnh Long jaik di ini jeng lac labik hu rilo bruk glut jaleih takai kraong. Dah page harei 18.7, jalan ar pacang pambuak haong jalan radaih tapen kraong Măng di palei Thanh Phong, xã Tân Long Hội, huyện Mang Thít jeng rah tabiak bruk glut jaleih. Labik glut jaleih bahrau nyu atah 35 m, praong 7 m. Tui mBan Chỉ huy pacang caga bala meng langik tasik, daong duah urang gaok bala tỉnh Vĩnh Long, dalam 6 bilan akaok thun ini, glut jaleih rah tabiak di 29 labik, ngak brei lahik labaih 1 km takai kraong, ribaong.

Di dom tỉnh tapen tasik, bruk glut jaleih dak trak damak jang. Di tỉnh Cà Mau, dalam jaik 2 bilan tapa, dom bruk glut jaleih ar tasik bhain rah tabiak. Chủ tịch UB bhap bini tỉnh Cà Mau njauk tabiak bruk khẩn cấp ka bala meng langik tasik ngan saong bruk glut jaleih ar tasik gah pai haong 5 labik atah jaik 2,7 km, di 2 huyện Trần Văn Thời haong huyện U Minh. Urak ini, 5 labik ini hu glai pacang caga biak lipih atau oh daok. Dalam 254 km takai tasik, urak ini hu 189 km daok dalam glut jaleih, hu dom labik daok glut trun. Tỉnh Cà Mau hu pok panuac tagok likau Trung ương pasang iek, daong brei jhul samar bruk buh jien tame ngak pasiam ar tasik, labik caong hu ngak samar drah urak ini, lac labik meng kraong Năm Rạch Chèo tal gah Nam Sông Đốc, atah 23 km, caong hu 700 tỉ đồng piah ngak.

Pok ar, padang kè piah pacang glut jaleih bhian lac jalan ngak camereip abih hu kuhria tal. Min jalan ngak ini urak ini oh ba mai siam lagaih suai lavik saong biak palai pajoa jien padai, prein yava kayua oh langyah hu asal di bruk. Pagap yau ar tasik di Cà Mau thun halei jeng dang anak bruk glut jaleih tuk tame bilan hajan ribuk. Atau danak dak kè pacang glut jaleih takai kraong Tiền, labik darak pasar Bình Thành (Huyện Thanh Bình,  Đồng Tháp) ngak abih labaih 90 tỉ đồng min rilo mbang glut jaleih.

Thạc sĩ Nguyễn Hữu Thiện, urang ilamu gah sinh thái học bhum taneran kraong Cuu Long, mboh lac: Asal di bruk glut jaleih bhum taneran kraong Cuu Long urak ini, lac kurang phù sa haong cuah, kayua thủy điện pacang abih cuah haong phù sa, saong daok kayua bruk kuac mek cuah. Jalan ngak danak dak abih biak rilo jien padai saong oh siam lagaih, khik caga labik ini ye labik karei saong pak di labik ngak bloh nan, lavik lavik harei jeng jaleih trun. Kayua yau nan ye, jhui ngak bờ kè rilo. Tok ngak kè khik caga dom labik halei mboh lac biak njauk ngak, oh klaak tapa hu. Salih tame nan, jien piah ngak kè njauk hu pandar piah panduan ba rahra tabiak truh dom labik biak mbuan glut jaleih.

Tui PGS-TS Lê Anh Tuấn, dahlau daih ngak Phaok akaok Viện Roh duah biến đổi khí hậu, Sang bac ĐH Cần Thơ, kurang phù sa lac bruk haong gauk, min yaok labik jeng hu bruk karei. Di bhum gah akaok kraong di An Giang, bruk glut jaleih takai kraong lac kayua kurang phù sa gam haong bruk kuac mek cuah biak rilo ngak brei salih jalan ia nduac ba tal glut jaleih. Daok di Cà Mau, taphia bruk glut jaleih daok hu bruk glut taneh. Makna di bruk ini lac kayua dom danak dak pacang ia mbak, khik ia hajan piah pala drak./.

Urang lang: M.Phuong