Luac 9 thun tapa, yaok bilan, sa-ai Nguyễn Văn Tiến, urang jakar Văn phòng Đảng ủy xã Buôn Tría, huyện Lắk, tỉnh Đắk Lắk yaok bilan buh tabiak 10 ribau đồng piah rik tame Kadung jien patak pataom ngak tui panuac Wa di jabat. Sa-ai khan lac: Yaom jien rik daong oh rilo, min hu ba mai jak jeng siam mekre hu mboh di anak meta:

 “Dahlak mboh bruk kadung jien patak pataom ngak tui panuac Wa ini nyu biak siam, nan ye hu rilo urang đảng dalam Đảng bộ jeng yau urang đoàn di dom puk palei biak abih hatai pachreih tui. Yau urang đảng daok ranaih khaol dahlak yaok bilan rik tame 10 ribau đồng".

Kadung jien patak pataom ngak tui panuac Wa lac bruk ngak hu meng bruk pakacah gauk “Patak pataom ngak tui panuac Wa” hu Ban Thường vụ Huyện ủy Lắk khik ramik dalam rilo thun tapa piah daong ba dom baoh sang hu rai diuk kan kandah. Tui nan, yaok urang jarka, urang đảng, urang đoàn, công chức, viên chức, urang dalam huyện yaok 3 harei patak pataom takik abih 1.000 đồng; đoàn viên, hội viên di cơ sở yaok 10 harei patak pataom takik abih  1.000 đồng. Kadung jien ini kayua Ban Tuyên giáo Huyện ủy khik iek. Amuk Đào Thị Thanh An, Phaok Bí thư Thường trực Huyện ủy Lắk brei thau, meng jalan ngak ini dalam 9 thun tapa huyện rik pataom hu jaik 3 tỷ đồng, daong ka yaok rituh urang kan kandah, urang daok sa drei, urang njauk ruak kan kandah...

  “Ba danak dak ini dak harei dak pambak prong saong ba mai yaom biak siam piah brei mboh bruk daong gauk, daong pambak tabiak hatai ranam tal bhap bani rah ra, dak harei dak klah rabha dom kan kandah naong trak tal dom urang hu rai diuk rambah rambup, daok sa drei, njauk dom janih ruak kan kandah piah ka dom urang nan hu pabak pren khang, bui sambai dalam rai diuk”.

Bruk “Patak pataom ngak tui panuac Wa” hu pambak prong, khik ramik hu siam di rilo puk palei dalam tỉnh Đắk Lắk. Dalam dua thun tapa, bruk ngak ini patak pataom hu labaih 10 tỷ đồng, tapa nan daong padang ngak hu 89 baoh sang, 2 duk daok ka gru pato, alin hadiah yaok riyuh pok pandap ka dom baoh sang sarak karja, urang buh prein ka cách mạng.

Hu dom palei hu jalan peih ngak biak siam ka bruk patak pataom, ieu pataom hu rilo urang đảng saong bhap bani hu mbaok tame. Pagap yau dom bruk “Patak pataom daong ka urang đảng hu rai diuk kan kandah” di Thành ủy Buôn Ma Thuột; “Padang ngak labik vệ sinh sang bac” di Huyện ủy Cư M’gar, “Sổ patak pataom Búa Liềm vàng” di Thị ủy Buôn Hồ... Ong Phạm Minh Tấn, Phaok Bí thư thường trực Tỉnh ủy Đắk Lắk taong yaom: ini lac dom bruk ngak biak siam saong hu kein laba dalam bruk “ngak tui Wa, peih bruk patak pataom” meng gah ala.

“Bac megru saong ngak tui  jalan ngak di Hồ Chí Minh nan lac sa bruk ngak gam gam. Tỉnh uỷ hu tacei pato biak cambaih laih meng chi bộ cơ sở, tal yaok urang đảng njauk ba bruk bac megru, ngak tui Wa hu jeng bruk gam gam saong ba tame dom mbang sinh hoạt yaok mbang, yaok bilan piah ka yaok urang njaom tame saong ngak tui piah ngak habar nyu hu jeng sa bruk halan hatian ba mai siam mekre dalam bruk daong gauk tapa truh kan kathaot, padang ngak palei pala bahrau, piah ngak siam bruk hu jao brei”.

Oh tok lac phong trào, “Patak pataom ngak tui panuac Wa” hu jeng sa bruk ngak gam gam hu yaok urang jakar, urang đảng saong bhap bani di Đắk Lắk halan hatian peih ngak. Jalan ngak sit min yaom glaong saong bruk pambak tabiak di nyu lac biak prong, ba mai bui sambai ka rilo urang kathaot meng dom baoh sang khang kajap, atau bruk daong ba chip tuk gaok kan kandah. Bruk ngak ini, hu ngak brei patagok ilamu meng kan “daong ba gauk, anit ranam gauk” siam mekre di bangsa, lac jalan ngak gheih piah bac megru saong ngak tui jalan hadah krah di Hồ Chí Minh./.