Umur labaih 70 thun, tapimin ong A Thiếu, urang bangsa Gia Rai daok di palei Lung, xã Ya Xiêr, huyện Sa Thầy, tỉnh Kon Tum jeng daok ba akaok nao dahlau dalam bruk ngak mbang, duah jien. Ong brei thau lac, thun 2022 tuk Đảng uỷ xã hu Sarak ka bruk pasiam veik apuh pakak oh hu kein, sang ong halain hatain hu tut angan tame peih ngak, hu daong ka 20 phun panat saong 50 phun durain. Piah lagaih ka bruk sangka iek glang, ong blei 50 phun durain saong buh jien tame blei jamraik pruh caga tukik ia:

“Mayah drei pala, drei pala klak yau nan, dom baoh sang karei ndem mayai lac Kanja brei pajaih oh siam, nan lac oh njauk bo lac kayua drei. Mayah drei sangka iek glang siam, phun njauk tagok siam. Sang dahlak hulin taeng drei kuac rok lubang, blei mac jamaraik njuk ia gam haong kuac bingun, peih talei gom eng ka nyu pruh ia drah samar jang. Sang dahlak hulin jeng kham marat pala phun diuk siam piah hu jien mek tame, cak rok patagok bruk mbang ngui, duah jien dalam sang ka mikva urang bangsa takik tabiak truh kan kathaot khang kajap, karo”.

Xã Ya Xiêr, huyện Sa Thầy hu labaih 1.600 sang rahra, rilo di nyu urang bangsa takik. Piah ka bruk ngak pasiam bein apuh pakak hu kein lagaih, Đảng uỷ xã hu pato tacei brei ka dom chi bo pambuak haong urang jakar pasang iek yaok bruk, yaok urang cambaic laic, dalam nan brei ngak dahlau di abih lac sang kathaot, sang di dalam sarak kanja, sang bangsa takik min tapi njauk khik tani tanat kein lagaih ka taneh riya saong gah ia piah pruh meng daong phun pajaih. Tui jalan ngak ini, dalam 3 thun tapa xã Ya Xiêr hu jak ba rahra ngak pasiam bein apuh hu labaih 54 héc ta bein salih tapa pala phun mbang baoh, rilo di nyu hu phun durain.

Piah hu kein lagaih daong pajaih phun mbang baoh ka rahra di 11 xa, ban sit pasiam bein apuh pakak oh hu kein, huyện Sa Thầy hu jak ba meng rilo gah. Kuhria meng di thun 2023 tal urak ini, meng gah phun jien rahra daong lac jaik 2 tỷ đồng, huyện hu blei labaih 15.000 phun durain pajaih saong phun mắc ca daong ka rahra urang pala. Dalam 4 bilan akaok thun ini, hu 177 baoh sang urang bangsa takik dalam huyen pasiam hu 52 ha bein apuh piah pala phun mbang baoh. Amuk Nguyễn Thị Luyến, Phaok jabat Ngak nong saong patagok palei pala huyện Sa Thầy, brei thau lac:

“Huyện hu peih ngak gam gam rilo danak dak, pablak tame rilo phun jien, meng dom danak dak bruk ngak negar, phun jien daong peih bruk mbang ngui daong tapa dom bruk ngak pachreih nong, ba dom pajaih bahrau mai daong ka mikva, biak caik hatai sangka tal mikva urang bangsa takik. Patagok dom yaom glaong konomi ngak mbang ka rahra di ini, ye huyen hu peih ngak mblang taneh pala durain lac biak rilo, rahra biak chreih chrai bui sambai ngak tui saong kham marat sangka iek glang”.

Hadei di 3 thun peih ngak Danak dak ka 07 brei bruk pasiam bein taneh oh hu kein, di huyện Sa Thầy hu salih biak lagaih dalam bruk cak rok patagok mblang taneh pala phun mbang baoh. Pataom sit jeng praong, mayah taong abih mblang taneh pala phun mbang baoh dalam huyện di puac thun 2020 bahrau hu 285 héc ta ye tal puac thun 2023 Sa Thầy cak rok tagok jaik 1.600 héc ta, dalam nan taeng phun durain hu pala di labaih 660 héc ta. Ong Nguyễn Minh Tuấn, Bí thư Huyện uỷ Sa Thầy, ndem mayai lac:

“Tui mikva urang bangsa takik hu mbaok tame ngak pasiam mblang taneh bein apuh oh hu kein di dalam huyện, abih di nyu lac hu mbaok tame bruk pala phun mbang baoh, tuk camriep ieu lac mboh hu kein lagaih saong rahra urak ini tut angan tame ngak biak rilo. Thun 2025 patui veik peih bruk daong phun pajaih pala di taneh apuh ngak pasiam veik tapa di nan brei salih jalan sahaneng, jalan ngak di mikva yam tapa ngak mbang kaya mada”.

Gam haong jalan ngak pasiam taneh apuh cakak pala ralo janih, daong ba, pato tacei brei ka rahra tapa pala phun mbang baoh patagok bruk ngak mbang, duah jien dalam sang, Huyện uỷ Sa Thầy jeng hu dom panuac pato pakai tantu cambaic laic piah patagok yaom kaom di apuh bein pal phun mbang baoh. Tal urak ini huyen hu 2 baoh sang hu brei lektaka ma so bhum pala durain ngan haong taneh praong labaih 31 héc ta. Bruk pala phun mbang baoh hu peih ngak tui jalan huu co, khang kajap. Tui jalan atah dhua suai lavik, kanja huyện Sa Thầy daok daa urang ngak mbang blei salih doanh nghiep buh jien tame padang ngak sang mac jamaraik ngak jeng ndap nda meng baoh kayau piah pambuak talei urang pala haong urang blai ndapnda  kaya urang ngak nong./.