Dung Quang Nho kham merat dalam bruk chaoh mbanh dit blong di drei 

Ndih tapui thun 2000 di Phan Thiết, Bình Thuận, Quang Nho lac urang bangsa Cam, menek tabiak dalam sa baoh sang kan kandah meng tuk daok sit. Min bruk naih gheih gah caoh mbanh, dit blong di Quang Nho hu brei mboh meng biak aval. Kadha ini ngak ka ong Dụng Quang Kít, ame di Quang Nho samar caong tal sa harei anek likei di drei hu jeng urang caoh mbanh chuyên nghiệp, saong nan jeng lac makna bo ong brei ba Quang Nho nao pakacah pilih ruah tame khóa 3 labik pato pakai uraniah hu angan je, lac Hoàng Anh Gia Lai (HAGL) di thun 2013. “Adei jeng daok hadar kanal cambaih harei nao pakacah tame Học viện HAGL. Tuk nan lac mon 3 dah page, dua ame anek meng Bình Thuận nao Ninh Thuận, tal labik pakacah lac mon 5. Tok dil mbang  ổ bánh mì blaoh tame pakacah. Oh sahneng lac drei hu gam tame. Tuk hu tame học viện bloh harei halei jeng hiay kayua uan sang lo, oh ka mbang halei nao atah sang. Ame harei halei jeng ieu phone tangi sua, ieu kakei kham merat pasram, pachreih ba adei biak rilo”, Quang Nho hadar veik yau nan.

Meng hatai takre, hu dalam rup darah naih gheih meng sit mai, saong oh padeih pasram di labik pato pakai chuyên nghiệp, Quang Nho samar cakrok bruk bac saong samar yam tapa dom ayut sahabat umo thun dreih gauk daok bac di labik pato pakai ini. Gam haong bruk naih gheih dalam caoh mbanh, prein yava siam mekre rup pabhap khang kadang saong hatai tuk halei jeng khin yam tagok, nan ye cầu thủ urang Cam ini hu jeng sa dalam dom urang bac naih gheih abih di khóa bac.

Thun 2016 tuk yam tapa umo 16 thun, Quang Nho hu kalup kapul HAGL ba tagok kapul U19 piah pakacah giải U19 pakat negar, 2 thun hadei, urang dit blong palei daok di Phan Thiết hadah mbaok meta hu HLV Hoàng Anh Tuấn ieu tame kapul U19 Việt Nam saong hu mbang caoh biak siam. Meng nan angan Dụng Quang Nho hu jeng bhian randap haong urang takre dit blong, caoh mbanh Việt Nam, abih di nyu lac dom cổ động viên di kalup kapul HAGL.

Thun 2019, Quang Nho hu ieu tagok kapul U22 Việt Nam tame pakacah giải vô địch U22 Đông Nam Á di Campuchia. Dalam thun nan, Quang Nho hu HLV Park Hang-seo vak angan tame kapul U22 pakat negar caga ka SEA Games 30. Min hadei di nan Quang Nho oh patuah njauk chấn thương nan ye oh nao hu haong kapul tapa Philippines. Oh hu buh prein yava ka đội tuyển, Quang Nho biak damen min sa-ai oh kadun likuk. Tukvak puac bilan pakacah V.League thun 2019, Quang Nho hu HLV di kapul bhum ceik glaong tuk nan, lac Lee Tae-hoon ba angan tame kapul ka 1 saong sa-ai brei mboh lac drei me-in biak gheih, biak siam. 

Quang Nho di gah langiu hu urang taong yaom lac biak slut mbut, takik ndom biai min angaok mblang caoh mbanh, sa-ai biak khang kadang. Quang Nho lac hậu vệ gah hanuak biak gheih, min sa-ai jeng meda me-in hu di rilo labik karei di gauk. Urang caoh mbanh lac urang Cam ini hu prein yava khang kadang, biak sami samar, tuk me-in biak khang hatai nan ye hu gah chuyên môn pagap yau Nguyễn Trọng Hoàng di  tuyển Việt Nam.

SEA Games 31 daok mai jaik tal, saong ini lac bruk daok pamaong tal praong abih di Quang Nho haong dom ayut sahabat dalam kapul di thun ini, gam haong vòng loại U23 châu Á 2022 di puac bilan 10 tal. Meyah me-in siam, Quang Nho hu jeng asal praong dalam bruk khik caga baoh Huy chương ameh SEA Ganmes 31 di kapul U22 Việt Nam saong dhi puac abih U23 châu Á 2022 (meyah Việt Nam tapa hu vòng loại) di thun hadei. Tuk nan, cầu thủ urang Cam ini tantu hu dom takai yam praong dalam bruk caoh mbanh di drei, piah hu nao jaik jang haong bruk daok caong khin, daok pamaong tal lac hu mbaok tame đội tuyển Việt Nam.

Urak ini, mikva Cam biak uan tabuan, mboh hadah mbaok meta kayua hu 1 Dụng Quang Nho, saong mikva jia lac, meng dom chreih chrai nan, Dụng Quang Vinh, adei likei di Dụng Quang Nho daok lac urang caoh mbanh di kapul U15 di Học viện bóng đá Hoàng Anh Gia Lai meda tui jalan, saong lac prein pachreih ba khang kadang ka bhap bini Cam cakrok gah caoh mbanh, dit blong piah vak veik dalikan ka “dom urang tamia Champa” angaok mblang hareik./.

Urang lang: Mousaphuong -27/3