Puk palei Cham dak harei dak patagok, rai duik mik va hu siam mekre 

Tal pato akhar haroh di ong Đô Hô Sên daok dalam sang megik di urang Cam. Gah dalam hu bảng jhuk, hu bàn ghế, gom điện haong sa tu tapuk. Bruk pato akhar haroh ka anek kamuan jeng hu ong roh duah, iek tui harak pato akhar haroh di urang Cam daok di dom tỉnh: An Giang, Ninh Thuận, Bình Thuận saong bruk klah rabha di dom urang hu angan je dalam bhap bini. Meng 26 akhar haroh, ong Sên sahneng duah jalan pato habar ka urang bac mbuan thau, mbuan kanal. Langiu di bruk pato haroh, ong Sên haong dom mikva Cam daok hu lang dom dalikan ka jalan diukrai siam mekre meng sap Ả-rập, sap Việt tapa sap Cam piah pato ka anek kamuan dalam palei. Ong tuk halei jeng mboh dalam hatian lac: Dom urang thau bac saong thau vak, thau cih haroh Cam dak harei dak takik nao. Meyah drei oh peih tal pato akhar haroh ye sap ndom, panuac puac, akhar vak, haroh cih di bangsa lavik lavik harei jeng meda lahik nao.

Tuk jeng urang hu angan je di bhap bini Cam, ong Sên pathau khan haong karja xã ka bruk khin peih tal bac saong likau daong siphau, mbut, kalam, bàn ghế, điện truac hadah. Bloh ong nao tal yaok sang jak ba dom amaik ame brei anek nao bac. Tuk camereip tal bac peih pato tuk melam, hu oh ka tal 10 adei, min ong kham merat pato haroh Cam haong pato sap Việt ka dom adei oh hu nao bac. Mboh anek bhik di drei bac naih, vak gheih, rilo amaik ame, rilo ong muk taha jeng likau tame bac.

Urak ini, di Sang megik di urang Cam hu 2 tal bac hu 60 urang, dalam nan hu tal pato haroh ka dom adei sit. Jien tapuk siphau, mbut kalam jeng kayua ong Sên nao jak ba urang ngak pahla daong brei. Tal bac hu jao veik ka 2 Tuan daok ranaih iek pato, daok ong Sên tui iek abih bruk dalam - langiu di sang megik. Bruk bui sambai di ong Sên lac hu daong anek kamuan urang Cam ndom biai cambaih, cih vak njauk akhar haroh dak harei dak rilo, eng drei cih harak ngak hồ sơ nao ngak bruk di Cty.

Tui UB bhap bini xã Bình Sơn, ong Sên lac urang hu angan je, rilo mbang hu karja dom pakat pok brei harak meyaom kayua ngak hu rilo bruk praong ka bangsa, ka agama saong rik daong khik ramik, patagok dom yaom glaong ilamu meng kan.

Meda lac, bruk peih tal pato akhar haroh ka anek kamuan urang Cam daok di xã Bình Sơn langiu di bruk daong khik ramik saong patagok dom yaom glaong di ilamu bangsa Cam, daok hu daong ka anek kamuan urang bangsa takik dalam xã paglaong ilamu, hu thau rilo jang./.

Urang lang: Mousaphuong -21/8