Amuk H' Blim daok di palei Mơ Nú, xa Chư Á, urang daok di dalam baoh sang urang kan kathaot, thun 2023 sang amuk hu karja palei daong brei sa drei limo binai piah raong brei ka nyu manek. Gam haong bruk raong glang tani tanat, tal ini limo di gait hu hu sa drei limo anek, sanya brei mboh hu ba mai jien mek tame tani tanat ka sang ka amuk dalam harei hadei di nyu.

“Baoh sang amuk meng dahlau daih biak kan kandah, kayua oh hu hamu apuh yau nan ye oh ngak mbang patagok kinh te hu. Jaik di ini mai meng hu bruk daong brei di karja palei brei ka baoh sang dahlak hu raong drei limo pamenek, hadei di dom tukvak raong glang limo jeng praong tagok, caong ka nyu drah menek, piah ka jien padai dalam sang dak harei dak hu tani tanat jang.”

Ngak tui sarak daong brei, ban Pleiku hu daong kat Bao hiem y te ka taong abih baoh sang urang kathaot saong jaik kathaot. Anek kamuan di dom baoh sang ini daok hu daong brei patrun jien bac saong brei bac oh mek jien. Amuk Trần Thị Út, Phaok akaok UB Bhap bini phuong Chi Lăng, ban Pleiku brei thau, urang jakar phuong hu tacei ba mikva salih jalan pala phun ka njauk, peih dom tal pato saong brei kein lagaih piah hu mesraiy jien laba lap.

 “Karja palei hu ngak saong daok pataom tame dom danak dak daong patagok bruk ngak mbang, paglaong gah pato megru sangka prein yava saong pasiam veik dom ha tang ka 3 palei mikva urang bangsa takik. Karja palei jeng hu jak ba ieu dom gah ngak pahla ngak dhar daong ka 7 baoh sang, mikva hu paglaong raidiuk. Daong phun pala saong anek athur raong njauk haong langik tasik di 3 palei piah hu ralo jien mek tame saong tani tanat brei ka raidiuk di rahra.”

Ban Pleiku hu daong dom urang mbang tui sarak hu mesraiy jaik 11 ty dong haong mek jien laba lap. Kadung jien daong urang kathaot jeng hu padang ngak saong ngak pasiam brei ka 95 baoh sang abih jien jaik 5 ty dong. Dom bruk daok peih bruk ngak mbang haong yaom jien labaih 770 trieu dong…Ong Nguyễn Triều Quang, Paok Yam ndok Gilang pariak Sarak xa hoi tinh Gia Lai brei thau lac patui veik pataom tame dom phun jien, abih di nyu nan lac danak dak brei bruk ngak ka rahra.

 “Jabat jeng hu ndom biai haong Ban uy, HĐ Bhap bini, UB Bhap bini salih phun jien jao ka kadung phun jien palei piah blei ka dom urang mbang tui sarak dalam palei mesraiy. Kuhria tal ini taong abih jien brei mesraiy meng dom danak dak sarak hu 402 ty dong, dalam nan phun jien pakat tinh saong ban lac 51 ty dong, hu ty trong dalam bruk brei jien mesraiy tui sarak.”

Ban Pleiku hu padang sa danak dak karei piah jhul khang bruk patrun kathaot khang kajap, paglaong raidiuk di rahra, abih di nyu ieu lac di dom palei mikva bangsa takik dalam masa tukvak 2021 - 2025. Bruk jak ba sa pakat chinh tri tame langyah, padang jalan trun kathaot suai atah saong pandar siam lagaih phun jien meng dom danak dak jalan ngak negar lac bruk pasak ka bruk jak jeng dalam bruk trun kathaot khang kajap di ban. Ong Trịnh Duy Thuân, Bi thu Ban uy Pleiku, ndom meyai lac:

“Meng akaok vaktu ngak bruk tal ini ban Pleiku hu pataom tame bruk pan akaok, pato tacei peih ngak bruk trun kathaot khang kajap pagam haong dom danak dak jalan ngak negar mek hu dom jak jeng siam. Dom baoh sang kathaot mikva bangsa takik haong dom baoh sang kathaot karei hu trun biak samar. Ini lac bruk kham merat biak abih hatai di dom pakat dom gah pagam haong bruk ngak dom danak dak jalan ngak negar.”

Gam haong dom bruk kham merat oh padeih, ban Pleiku daok yam jaik si tal bruk kham merat trun kathaot karo kajap. Dom sarak saong danak dak rik daong hu patagok siam lagaih, daong pasiam veik raidiuk di rahra, abih di nyu nan lac mikva bangsa takik./.