Khan bai Ê Đê brei mboh bruk gheih tangin, tari taring di urang kumei Ê Đê meng kan

Melam sup bilan 4, dalam baoh sang di sa-ai H Ler Êban, daok di buôn Kniết, xã Ea Ktur, huyện Cư Kuin, tỉnh Đắk Lắk, 3 urang jhik daok samar ngak ka nyu salah piah samu jao pandap. Sa-ai H Trim Êban brei thau, 30 bộ khan ao ini hu sa nhà hàng ngak lakhah di Buôn Ma Thuột kakei blei piah ngak đồng phục ka menuac ngak dalam nhà hàng. Ao haong takai khan sambo màu jhuk, di mangaok takuai ao, tangin ao saong jhih khan hu dom bingu la khan bai menyim tangin di bangsa Ê Đê. Sa-ai H Trim khan lac, jaik 5 thun tapa, meng bruk kham merat jhik pandap labik ini di tuk melam, sa-ai hu jien mek tame biak rilo. “Yaok bilan jeng hu 3 triệu, nan lac kuhria tuk melam saoh, daok meyah ngak gam harei ye yaom karei.”

Daok sa-ai H Yăm Bkrông, daok di buôn Cư Êbông, xã Ea Kao, ban Buôn Ma Thuột, meng bruk ngak tuk salah bruk ngak nong, menyim khan bai hu jeng bruk ngak mbang di sa-ai dalam labaih pluh thun tapa. Urak ini, abih 3 rai dalam sang jeng thau menyim, saong hu 5 urang daok ngak dalam Hợp tác xã menyim khan bai Tơng Bông, ban Buôn Ma Thuột: “Drei bac saong thau menyim, thau ngak merai blaoh mai sang drei tacei ka adei di drei. Patui di nan, drei tacei ka 2 urang anek di drei, blaoh kol nyu jeng thau menyim abih. Tame hợp tác xã ye drei ngak saong mbang jien bilan di pak ini, daok pak ini drei menyim jamriak, daok nao sang drei menyim meng tangin.”

Pabak hatai caong ka khan ao meng khan bai di bhap bini, pandap lưu niệm, pandak ngak mekre ka dom labik du lịch, nhà hàng khách sạn, urang kumei Ê Đê daok di rilo puk palei Đắk Lắk daok mai veik kak kajap haong kik menyim. Rilo palei hu padang dom hợp tác xã, kapul pambuak bruk menyim khan bai, yau ye di  buôn Tơng Jú saong buôn Bông (ban Buôn Ma Thuột), xã Ea Tul (huyện Cư Mgar), xã Ea Blang (ban sit Buôn Hồ), buôn Mùi 2 (xã Cư Né, huyện Krông Buk)… Dom adei sa-ai kumei daok hu ngak dom khan ao meng khan bai Ê Đê salih bahrau saong ngak jeng angan je di drei.

Sa-ai H Ler Êban, po sang mac Amí Sia, daok di buôn Kniết, xã Ea Ktur, huyện Cư Kuin brei thau, urak ini, yaok bilan sang mac pablei hu jaik 40 bộ khan ao, yaom meng 400 ribau tal 1 triệu đồng sa bộ. Tapa dom blah mạng xã hội, khan ao meng khan bai salih bahrau taduan hu rilo đơn hàng dalam saong langiu tỉnh, hu gam dom tuai lac urang Việt daok di Mỹ, Úc.

Jeng meng hu rilo janih pandap meng menyim tangin, menyim jamriak, Hợp tác xã menyim khan bai Tơng Bông (xã Ea Kao, ban Buôn Ma Thuột) hu ba bruk hit ngak mbang tani tanat ka 45 urang.  Yam ndok Hợp tác xã, amuk H Yam Buôn Krông brei thau, jien pablei pandap thun bloh hu 1,2 tỷ đồng, tui nan, yaok urang yaok bilan hu 3,5 triệu đồng. Pandap khan bai duah hu labik pablei tani tanat di rilo labik dalam taneh ia. Urak ini hợp tác xã daok patagok bruk du lịch cộng đồng, homestay piah ka bruk menyim dak harei dak cakrok, patagok: “Ka sa lac mẫu mã pandap menyim hu rilo janih, langiu khan, ao, kadung… daok hu ao lakhah. Dahlau daih, tuk rija, roya urang meng pandar, daok urak ini harei harei urang jeng pandar pandap khan bai. Ka dua lac jalan patagok pambuak menyim khan bai haong du lịch cộng đồng piah yaih khan haong tuai damuai.”

Meng dua plak tangin gheih ngak, dom urang kumei Ê Đê daok patui jalan di dom amuk, dom sa-ai kumei, sahneng duah bharau rilo janih pandap meng khan bai, menyim jeng dom jak jeng dalam raidiuk bahrau. Menyim khan bai oh lac brei mboh bruk tari taring, gheih mekre di urang kumei meng kan mai, bo daok ngak jeng dom tal urang kumei saman bahrau, sami samar, sahneng duah, ba khan bai jeng pandap piah pablei, ba jien tame ka baoh sang saong puk palei. Meng ilamu meng kan, khan bai Ê Đê daok bak prein diuk rai bahrau./.

 Urang lang: M. Phuong – 16/10