Yaok blah khan bai ndung bak hatung hatai di urang kumei Ê Đê

Tari taring tapen kik menyim, caik abih hatai sangka tal yaok rak merai ngak jeng bingu la ka blah khan bai, nghệ nhân H’Blong Knul daok di buôn Ja, xã Ea Trul, huyện Krông Bông khan lac, ngan saong urang Ê Đê, meng tuk daok sit, dom uranaih kumei hu amuk, hu amaik pato menyim. Dom blah phui, dom blah khan atau ao khan bai oh lac piah pandar dalam sang, bo daok lac pandap ba nao sang gah likei tuk tok pasang, khin likei. Brei mboh bruk gheih tangin di urang kumei Ê Đê tuk tal umo thun khin likei, atau ngak pandap alin hadiah tuk hu bruk praong, gaok mai lac drap ar piah palao menuac metai. “Dahlak hulin thau menyim meng tuk umo 15 thun, mbiah tal harei ini tuk hu anek blaoh lac menyim biak gheih. Meng dom tal dahlak pato, hu rilo menuac thau menyim saong mek hu  giải glaong tuk nao pakacah, jeng yau padang veik bruk menyim khan bai ini."

Yau dom bangsa daok di Tây Nguyên, urang Ê Đê saman dahlau mek kapah piah ngak merai menyim khan bai. Bruk ini nyu ngak jeng kadha biak karei, mbuan thau khan bai Ê Đê lac dom bingu la hu dom sambo màu pandar rilo lac jhuk, meriah bhong, kanyik katam, xanh lam haong mbong patih. Labaih 60 thun kak kajap haong kik menyim, amuk H’Nun Byă, daok di buôn Cư Êbông, xã Ea Kao, ban Buôn Ma Thuột brei thau, kapah hadei di paik mek mai hu ngak brei pasaoh, dui jeng rak merai bloh nhuộm sambo meng gluh, hala, gha kayau atau kanduh phun glai. Tuk hu dom rak merai hu sambo màu yau hatai caong khin, urang ba tagok kik menyim, ngak jeng bingu la: “Bingu la bhian pandar dom sambo màu mbong patih, juk saong bhong meriah lac rilo di abih. Hu rilo janih bingu la lô, janih 15, 17 rak merai jeng hu, 27 rak merai jeng hu, gaok mai 35 rak merai jeng hu. Kan di abih lac ngak kngăm, janih bingu la ngak brei hadah tagok thaot binguk drei khin ngak brei mekre.”

Bingu la khan bai bhian brei mboh dom janih dalam raidiuk yaok harei. Nan lac dom drei cim, kara kanduh, cin cak; dom janih bingu, phun kayau yau dương xỉ, njam dớn, baoh trám; atau dom janih pandap yau lasung saok brah, sang tual... Tui yaok janih khan ao, urang Ê Đê hu jalan ngak brei mekre saong rami ramik bingu la karei di gauk. Urang likei bhian “đóng khố”, luai drei atau cuk ao tangin atah, takuai gul cuk meng akaok. Ao likei nyu biak karei meng hu candaih tanyiak bhong meriah anak cada hu lauk dreih yau seok cim đại bàng. Dom jalan bingu la menyim rah tui 2 gah rup ao, pandar bingu la yau binguk ine girai atau cim đại bàng, brei mboh bruk khang kadang saong hatai caong chinh phục langik tasik. Urang kumei ye cuk khan haong ao cuk meng takuai gar. Khan di urang kumei Ê Đê lac sa blah khan bai praong, tuk cuk hu mbar vil val ka-ing, atah tal meta laiy. Khan ao cuk yaok harei hu menyim mbuan jang, takik bingu la jang. Daok khan ao cuk dalam dom rija, roya, hu ngak tani tanat jang, sambo màu hadah tanyak, nền jhuk saong bingu la nduac jeng talei atah gar rup ao, jih ao saong jih tangin.

Bingu la mangaok khan ao daok brei mboh bruk kaya meda saong quyền uy di menuac cuk. Tui nghệ nhân H’Yar Kbuôr, daok di xã Drai Sap, huyện Krông Ana, urang Ê Đê hu ilamu menyim hu maong lac tabung glaong di bruk ngak mekre khan bai. Ini lac ilamu pandar bingu la haong 2 sambo màu bhong meriah – mbong patih nduac bingu gar gauk pambuak haong talei baoh nyuk atau asar mbo mbo dak jaik jih ao atau takai khố, takai khan. “Ilamu cờ tê ye urang Ê Đê saman dahlau bhian pandar ka dom blah khan ao cuk ngak adat, cuk tuk rija roya saong khan ao di urang kaya meda. Kteh lac ilamu kan ngak, oh lac urang halei jeng ngak hu, saong harei ini jeng hu takik menuac bac hu.”

Meng dom bingu la biak karei di drei, yaok urang kumei Ê Đê hu bruk sahneng duah, ngak jeng bingu la bahrau, pabak tame rak merai, lai tame sambo màu piah ngak jeng blah khan bai gheih mekre jang. Tui amuk H’Yam Bkrông, daok di xã Ea Kao, ban Buôn Ma Thuột, yaok blah khan bai ndung bak hatung hatai di urang kumei. Yaom lac menyim tuk salah bruk ngak nong, min piah ngak tabiak sa blah khan bai meng kan, brei hu hatai tari taring, gheih tangin saong abih rilo tukvak, prein yava. Kayua yau nan ye, khan bai hu maong lac brei mboh tangin gheih ngak saong tari taring di urang kumei Ê Đê./. 

Urang lang: M. Phuong – 16/10