Thun 2007, Pasak Khik ramik inem krung tinh Khanh Hoa hu ba bruk nao rivang iek saong parang ngak iek di bhap bani urang bangsa Cam duh ka tuai damuai di bimon Pô Nagar. Dalam nan, njauk khan tal dom inem krung ilamo biak daneiy angan yau ye : ragam tamia Cam, menyim jih dahlah palei Caklaing, ngak lan am hamu craok… pasak hu pambuak bruk, daa rilo urang ngak gheih tangin, urang Cam meng di tinh Ninh Thuan klak hu mbaok tame bruk prang ngak iek, yaih khan inem krung ilamo di bangsa drei.

Mai meng bruk hu mbaok di dom urang ngak gheih tangin manuac urang bangsa Cam di Khu Inem krung bimon Pô Nagar hu ngak kaya meda jang inem mek ilamo Cam di palei gilau pahe. Dalam dom thun tapa, rilo janih ilamo, inem krung di urang Cam pachreih hu bruk sangka, duah thau di tuai damuai mai meng langiu nagar.

Ong Piter Kalender, sa urang tuai damuai mai meng Phan Lan brei thau: “Ong hu duah thau ini lac inem krung ilamo di urang Cam saong hu mbaok tame bruk parang ngak iek lan am di inem krung bimon kalan Pô Nagar. Njauk ndom mayai lac biak karei, bhap bani hu ngak tabiak sa janih pandap lan am biak gheih mekre bo tok hu ngak meng tangin. Ong jeng hu mbaok tame bruk jirah rivang iek bruk ngak lan am gam haong dom urang ngak gheih tangin, min biak di nyu lac biak kan piah ngak tabiak sa janih pandap lan am gheih mekre yau mikva ngak tabiak”.

Amuk Nguyễn Thị Thuý Hằng, Akaok Mban Khik iek inem krung bimon Pô Negar brei thau:

“Mban Khik iek Inem krung bimon Pô Nagar jeng thau hu bruk nan saong anak tal meda hu dom danak bruk atah dhua jang saong abih di nyu lac meda pataok yaom asal di nyu jang, piah ka bruk pambuak inem krung ilamo Cam jeng yau ba hu dom yaom lingai, dom hagait siam abih di ilamo Cam jeng yau rai diuk ilamo dalam bhap bani Cam mai tal haong tuai damuai rilo jang.”

Tui pataom yaok brei thau, hadei di pagam pataom tame hasa jeng tinh Khanh Hoa nan lac puk palei hu bhap bani urang bangsa Cam saong urang bangsa Raglai diuk rai rilo abih dalam negar. Urang bangsa Cam hu labaih 65.000 urang, meblah 41,6% dalam taong abih urang bangsa Cam dalam taneh aia. Urang bangsa Raglai nan lac labaih 126.000 urang, meblah 86% urang bangsa Raglai di Viet Nam.

Kayua yau nan ye, meda ndom lac tinh Khanh Hoa patui bruk kaya meda saong parilo janih inem krung ilamo di dua bang sa, dalam nan hu dom inem krung ilamo hu brei angan lac drap ar ilamu pakat nagar, inem krung di taneh aia biak karei, inem krung ilamo oh mboh di meta pakat negar saong inem krung ilamo oh mboh di meta di dunya hu Unesco brei angan. 

Ong Lê Văn Hoa, Phaok akaok So Ilamo, Padhih saong Rivang ma-in tinh Khanh Hoa brei thau, tinh ba tabiak jalan ngak cak rok patagok dom yaom ilamo meng kan di urang bangsa Cam – Raglai yau dom adat cambat tanarakun meng kan, ragam tamia bhap bani, ragu ragam meng kan hu panduan jao tapa rilo rai rah. Ini jeng lac yaom lingai inem krung hu khik ramik saong cak rok patagok dalam tuk vak anak tal.

“Khanh Hoa saong Ninh Thuan hadei di tuk pagam pataom ye jeng hu chung sa taneh ilamo saong janih ilamo. Nan lac kadha mbuan laghaih brei ka tinh drei hu sa bruk giao thoa, pambuak pagam di ilamo Khanh Hoa saong ilamo Ninh Thuan. Abih di nyu nan lac nyaom ilamo di bangsa Cam saong Raglai ye ngak brei ka khaol drei hu bruk pambak prong jang saong hu bruk pambuak pagam gam gam jang dalam jalan nduac ilamo. Saong meng di nan, khaol drei mbuan laghaih jang, rilo janih jang saong hu rilo yaom ilamo jang dalam bruk peih ngak dom  su kien, dom bruk meyaih khan ilamo, ilamo urang bangsa Cam, ilamo urang bangsa Raglai.”

Dom thun tapa, mai meng peih ngak siam bruk khik ramik saong cak rok patagok dom yaom lingai ilamo dom bangsa Cam saong urang bangsa Raglai hu khik ramik saong carok patagok. Dom inem krung ilamo ini oh lac tok hu patui khik dalam rai diuk mbang angui dalam bhap bani di bangsa Cam saong Raglai bo daok ngak tabiak dom janih pandap ilamu, rivang ma-in ndung bak kadha biak karei di dua bhum taneh Khanh Hoa saong Ninh Thuan dahlau diah.

Ini lac dom kadha caik anak tal Khanh Hoa roh duah, ba tabiak jalan ngak prong ka bruk khik ramik saong patui bruk patagok yaom ilamo di dom urang bangsa Cam, Raglai ndom karei jeng yau bhap bani dom urang bangsa takik daok diuk rai dalam bhum palei./.