Sa-ai Y Hương, bangsa Xơ đăng daok di tỉnh Kon Tum brei thau, dom thun jaik ini hu mbaok tame rilo mbang pakacah yau ye:  Urang pathau khan naih joi ka dak padang urang kumei zaman bahrau bhum bangsa, agama, salamat ka urang kumei saong uranai…nan ye rup drei saong rilo urang kumei thau hu ka dom bruk bangsa, agama, hukum likei kumei samu gauk, hukum lakhah caga saong baoh sang…: “Tapa rilo mbang pakacah dahlak hu thau biak rilo ka bruk urang kumei, dom asal kadha ka danak dak bruk ngak negar ka bhum bhap bini bangsa takik saong bhum ceik tukvak 2021- 2030. Dom bruk ka agama, ka labik dang di urang kumei, khang hatai jang dalam taom gaok, ndom biai nao mai, dalam dom bruk puk palei, bruk chính trị”.

Bruk njauk biai nan lac thun ini di Kon Tum, dom adei bangsa takik jeng hu mbaok tame danak dak ndom biai nao mai di Hội đồng uranaih haong Thường trực HĐ bhap bini tỉnh Kon Tum. Ini lac labik lagaih piah ka uranaih di tỉnh brei thau hatai caong piah Thường trực HĐ bhap bini tỉnh jeng yau dom pakat karja brei mboh bruk sangka, iek glang, caik hatai pang sap ndom di uranaih. 

Dom thun tapa, gam haong bruk daong jalan ngak mbang duah jien piah daong adei sa-ai kumei patagok kinh tế, dom pakat kapul urang kumei di Đắk Lắk daok kham merat peih ngak dom bruk padang kadung jien piah blei BHYT alin hadiah ka dom hội viên kan kandah. Sa-ai Đặng Thị Bình, daok di palei 1, xã Ea Kpam, huyện Cư Mgar tuk taduan hu thẻ BHYT hu kapul urang kumei xã alin brei, sa-ai mboh hu sanang hatai.“Sang dahlak daok kan kandah, hu kapul urang kumei xã brei 1 harak BHYT, dahlak thau dhar phor lo, hu thẻ dahlak nao iek ruak jeng hu sanang hatai, trun meneing trak damak glaih glar gah jien padai tuk nao iek ruak ka rup drei.

Bhap bini bangsa takik di tỉnh Lai Châu hu rilo adat cambat, tanarakun klak oh daok lagaih, urang kumei tok thau ngak bruk sang saong ndih tapui anek, oh hu mbaok tame ginum biai dom bruk dalam sang. Dom adat cambat ini nyu mbang dalam tame meng rai ini tapa rai daih, piah salih hu hatai sahneng di bhap bini, urang ngak bruk pathau khan brei thau cambaih ka ilamu di yaok bangsa, thau sap di mikva. Meng hu jalan patahu khan lagaih, tal urak ini, urang kumei di Lai Châu hu labik dang, hu sap ndom puac dalam baoh sang.

Sa-ai Ma Thị Chư, daok di bản Phìn Chải, xã Giang Ma, huyện Tam Đường brei thau: Tui adat cambat dahlau daih di bangsa Mông, yaok bruk dalam sang lac di urang likei. Meng hu urang jakar bhain mai palei pathau khan, jak ba, urak ini pasang likei haong tamaha likei hu salih jalan sahneng, jalan ngak, thau daong ka diuk anek rilo jang:“Yaok harei bruk di adei lac ngak puh, raong menuk ada di sang. Jala pandiak, diuk tagok puh mai sang hu pasang likei daong diuk tahanek lisei. Harei senecar, harei adit hu padeih ye pasang nao daong amaik ame, daong diuk kumei ngak puh, ngak bruk sang. Urak ini sang hu raidiuk tani tanat, pasang oh taong paoh diuk anek hagait, diuk pasang njauk gauk bui sambai, haniem phul”.

Meng kham merat ba tangin tame bruk di dom mintri, dom gah, dom kapul nyaom saong pakat uỷ, karja dom puk palei, dom tỉnh ban, urang kumei saong uranaih bangsa takik dak harei dak hu khik caga quyền saong dom kein laba njauk adat hukum. Urang kumei, uranaih bangsa takik hu nao bac da-a, paglaong ilamu, hu mbaok tame dom bruk puk palei, hu iek glang prein yava, khik caga quyền, kein laba njauk adat hkum…Abih di nyu lac ngan saong uranaih bangsa takik biak kan kandah hu daok dalam dom baoh sang salamat, siam mekre, oh hu bruk taong paoh./.