Phó Thủ tướng Trần Lưu Quang bahrau dang akaok mbang nyaom ka sa Mban pato tacei jalan peih ngak rami ramik hành chính pakat huyện, pakat xã tukvak 2023-2030. Tui pataom iek danak dak rami ramik di bhum palei, meng urak ini tal thun 2025, 50 huyện saong labaih 1.200 xã di dalam taneh ia meda hu pagam haong gauk piah patakik dom urang ngak hành chính, trun phun jien sarak kanja, paglaong kein lagaih di bruk khik ramik saong chat luong di jit vu công. Tui kuhria, hadei di tuk rami ramik meda brei trun 633 đơn vị hành chính pakat huyện, xã.

Mintri Pato Megru hu harak ieu dom tinh ban patagok bruk khik caga salamat saong khik kajap bruk hu ginup mbaok anek saih dalam dom labik pato bac bhum bangsa takik saong bhum ceik. Gam haong nan, jhul khang bruk pathau khan, pato pakai meng rilo jalan ngak karei di gauk, piah paglaong akaok sahneng ka anek saih saong amaik ame ka pacang caga dom adat cambat klak oh daok lagaih, bruk khin gauk tuk daok sit ba tal bruk anek saih klaak bac, sangka pablak tame danak dak pato pakai di sang bac brei thau dom kadha oh siam meng bruk khin gauk tuk daok sit saong khin gauk dalam but pajaih.

Bilan dam dara thun ini hu Ban Thường vụ Tỉnh đoàn Hậu Giang peih ngak jeng biak meng asal kadha “Thanh niên Hậu Giang - 20 thun halain hatain kayua raidiuk di rahra”, hu peih tabiak tal luac bilan 3 ini. Dalam bilan Dam dara ini Tỉnh đoàn Hậu Giang hu jao alin 10 paok pandap ka dom baoh sang sarak kanja; alin 20 paok jien bac “Truac hadah hatai caong di uranaih Hậu Giang” ka dom adei anek saih gaok kan kandah di ban Vị Thanh, yaok paok pandap saong paok jien bac hu yaom 500.000 đồng.

UBND tỉnh Sóc Trăng peih nyaom biai pataom iek veik bruk peih ngak “Harei Biên phòng abih bhap bini” tukvak 2019 - 2024. Dalam 5 thun tapa, dom pakat, dom gah hu daong ka bhap bini bhum biên giới tasik, urang jakar, bộ đội biên phòng tỉnh 110 baoh sang jum pataom, sang sahabat yaom abih tih labaih 6 tỷ đồng; daong anek saih kan kathaot yaok pluh rabau baoh siphau, yaok ratuh pok jien bac, radaih juak yaom yaok tỷ đồng. Langiu di nan, hu iek ruak brei jru ka jaik 25 rabau mbang urang, kuhria tabiak yaom jien lac 1 tỷ 200 trieu đồng.

Tỉnh Tây Ninh urak ini hu jaik 35.000 ha bei plom, tagok labaih 20% duut saong tukvak ini thun blaoh. Piah pabak hatai caong pajaih bahrau, pajaih hacih takik ruak, Pasak pachreih bruk ngak nong tỉnh Tây Ninh hu padang ngak danak dak “pala rilo pajaih bei plom bahrau pambuak haong sang mac blei tame di Tây Ninh” saong peih ngak di dalam huyện Tân Châu ngan haong taneh pala praong 25 ha, huyện Châu Thành 10 ha. Tapa nan, rik tame ngak trun manieng dom cuang kandah saong dak harei dak yah klak ruak khảm hala bei plom di pak ini.

Mỹ saong Hàn Quốc brei peih bruk pasram mesruh haong gauk hu angan ieu lac “Lá chắn tự do” dalam dom harei anak tal. Bruk ini rah tabiak dalam tuk bhum taneh Triều Tiên daok catang tagok hadei di tuk Triều Tiên brei peih ngak veik bruk quân sự labik taphia negar haong Hàn Quốc. Bruk pasram mesruh haong gauk di Mỹ - Hàn mbang ini tui kuhria gaok bruk cagar veik khang meng Triều Tiên. Chủ tịch Kim Jong Un bilan blaoh hu panuac lac oh duah jalan yasa haong Hàn Quốc. 

Pambuak tal bruk Công ty Điện lực Tokyo (TEPCO) di Nhật Bản harei ini brei peih mbang tathuak tabiak 7.800 tấn ia nerak tapa langyah blaoh di sang mac dien nguyên tử Fukushima ka 1 tabiak tasik, urang brei panuac di Mintri Ngoại giao Trung Quốc Mao Ninh hu panuac cagar veik biak khang haong bruk ngak ini kayua meda ngak kanjak jhak, ngak tachrauk nerak alam ka dunya, gam oh lagaih haong hukum dunya saong jeng biak oh sahaneng tal urang karei. Trung Quốc khang hatai cagar veik saong ieu kakei Nhật Bản padeih ngak bruk ini.

Tui panuac khan meng Jabat Tị nạn Liên minh châu Âu (EUAA), dom harak likau tị nạn di Liên minh châu Âu (EU) tagok 18%, lac 1 triệu 140 rabau menuac di thun blaoh. Ni lac glaong di abih dalam tuk 4 triệu 400 rabau urang Ukraine hu duah labik plaih bala di dom taneh ia Liên minh châu Âu bo oh cang ngak harak gar. EU brei khik catang jalan tapen negar gah langiu saong hukum tị nạn kuhria meng di tuk bruk srau kadau di cư 2015-2016 tuk hu tal 2 triệu 500 rabau menuac likau tị nạn./.