Dahlau deih, Nem pabui jhuk Bến En di huyện Như Thanh, tỉnh Thanh Hóa bhian kayua dom nhà hàng di dalam huyện pabak ka tuai mai mbang manyum. Meng di tuk hu harak brei angan, chất lượng Nem pabui jhuk Bến En hu darak pasa caik hatai jia, kakei blei rilo jang. Piah ngak jeng janih nem ini, mikva pak ini pilih ruah ralaow pabui jhuk, lac janih pabui pahe, bingi, lac pandap hu angan di bhum ceik. Ralow ngak nem hu pilih ruah lac ralaow bara, ralaow taok hu cakak lapih. Bruk ini jeng hu daong ka mikva bangsa raong pabui jhuk rilo jang saong dak harei dak cak rok patagok. Meng tapon pabui jhuk labaih 100 drei, sang amuk Nguyễn Thị Quy, daok di xã Phượng Nghi meng sa baoh sang kan kathaot urak ini hu jien mek tame tani tanat jaik 200 triệu đồng sa thun. Amuk Nguyễn Thị Quy brei thau:“yaok thun jeng hu labik pablei, drei pablei hu rilo jang nan ye drei raong rilo.”

Urak ini dalam rilo pandap panda hu taong yaom patuk OCOP di darak pasa, urang ngak tabiak, dom doanh nghiệp oh daok jalan halei karei lac njauk kham marat ngak pasiam, paglaong chất lượng pandap panda. Hu yau nan, labik dang di pandap panda angan je di bhum bangsa takik meng hu khik ramik, paglaong hu prein maraik gauk di mangaok darak pasa. Bruk pataom tame ngak pasiam mẫu mã, chất lượng pandap panda hu daong ka dom doanh nghiệp ngak tabiak dom pandap panda angan je di bhum ceik dak harei dak hu peih praong darak pasa, paglaong jien mek tame yaok thun. Amuk Phạm Hồng Hà, HTX ngak nong Nậm Lửu , huyện Trạm Tấu, tỉnh Yên Bái brei thau:“Dahlau daih khol dahlak pala sản lượng yaok thun biak takik, ngak sit sot min urak ini khol dahlak ngak pandap OCOP mek jien tame hu 200%. Jien mek tame meng bruk pablei salih di drei urak ini daok pablei ka dom công ty atau dom cửa hàng pandap hacih di Hà Nội, urang biak takre dom pandap bhum ceik di drei. Kayua pandap di khol dahlak lac pandap hữu cơ saong oh pandar pruh jru halak.”

Di tỉnh Lâm Đồng, mikva bangsa takik jeng daok cak rok patagok hu rilo pandap panda angan je, hu prein pablei tabiak dom tinh, ban karei. Đơn Dương lac sa dalam 2 huyện hu taneh pala njam praong abih di tỉnh Lâm Đồng. Meng pandar công nghệ glaong, rilo pandap panda kaya nong di huyện mek hu tanut kaya nong hacih saat, tanut chuan VietGap jeng hu tauk angan “Đà Lạt pataom dom siam mekre meng taneh siam”. Yaom lac njauk pabak dom tanut chuan biak catang jang di urang blei pandar, min, ini lac bruk brei mboh ka angan je saong chất lượng di pandap panda. Ini jeng lac jalan nao piah ka urang pala patui bruk cak rok patagok pandap panda praong khang saong suai lavik jang. Ong Nguyễn Đình Tịnh, Phó akaok UBND huyện Đơn Dương, tỉnh Lâm Đồng brei thau:“Meng di thun 2019 tal urak ini, abih tih phun jien kanja buh tame labaih 17 tỷ đồng, rahra pabak tame labaih 20 tỷ đồng, peih ngak rilo bruk siam lagaih yau ye pruh ia thông minh, sangka iek glang meng khak thông minh saong pandar dom công nghệ 4.0. Ngan haong Đơn Dương, urak ini hu pandar gam angan di tỉnh Lâm Đồng padang ngak lac Đà Lạt pataom dom siam mekre meng taneh siam nan ye jeng mbuan lagaih dalam bruk yaih khan angan je saong yau ba pandap panda di Đơn Dương tabiak dom tinh, ban jaik taphia.”

Tui dom chuyên gia, caong hu tagok glaong jang ye dom pandap panda di mikva bangsa takik jeng njauk pabak hu bruk pandar hijao, salamat, chất lượng, pabak hu bruk blei pandar bahrau. Ini lac bruk oh mbuan saong lac bruk caong khin di darak pasa. Kayua yau nan ye, padang angan je njauk peih akaok meng ilamo, oh lac bruk pathau khan bo camriep abih meng urang khik ramik, meng mikva hu mbaok tame bruk ngak, meng dom urang pan akaok..brei patagok hu dom asal kadha cak rok patagok khang kajap. Gam haong nan, piah ba pandap panda bhum ceik nao tal tangin urang blei pandar njauk ngak khang công nghệ số, pablei salih điện tử tapa negar./.