Sang ilamu xã La Dạ, huyện Hàm Thuận Bắc, tỉnh Bình Thuận dalam dom harei tapa mboh chreih chrai tagok meng dom sap ndom klao bui sambai  haong sap kaoh kreim, mbeik havei ia… Dom urang dalam tal bac pak yot jeng daok ranaih, hu dom nghệ nhân praong thun tacei pato. Jalan pato rilo meng lac pan tangin tacei bruk piah ngak tabiak pandap meng mbuan tal kan, hana.

 Maong dom plaak tangin di dom adei tuk camereip ngak oh ka lagaih, kaoh havei ia jeng oh samu gauk saong bhian jaoh, klaoh…, min dom adei jeng kham merat daok la yaok mon piah bac.

 Urang bac angan Xim Hoàng Xem chreih chrai brei thau, urang praong meng 50 thun tagok thau ngak bruk ini biak rilo, daok urang ranaih yau adei urak ini takik menuac thau ngak.

"Dahlak takre bruk ngak ini. Piah ngak hu baoh yot, baoh jangoa, boah la-i, abih 10 harei. Piah ngak hu, brei tapa rilo bruk yau ye pak, kak talei…, hu manuac thau kak, hu menuac oh thau kak. Daok dahlak ye dahlak jia lac, hadei di 10 harei bac ye dahlak thau ngak. Hadei ini gheih bruk, dahlak pato veik ka dom adei sit".

Tal pato tok hu 2 nghệ nhân umo labaih 70. Yaom lac brei padeih bruk tagok hamu nao puh, min dom nghệ nhân thei jeng bui sambai kayua anek kamuan dalam xã sangka bac megru.

Ong Lê Văn Lĩnh, sa dalam 2 urang pato bruk pak yot di xã La Dạ brei thau, piah ngak tabiak sa pandap, dom nghệ nhân brei tapa rilo bruk, brei tari taring, tani tanat. Meng bruk camereip abih lac tame glai duah pandap, blaoh ba mai tram ia, pambu thu, kaoh tabiak ka nyu samu gauk blaoh ka meng pak jeng yaok labik, yaok janih di pandap. Yaok pandap brei ngak gam meng 5 - 7 harei, dalam nan hu yot kapal piah parang me-in dalam harei pataom saong caik brah, caik tangei, caik piah pajaih ye tukvak ngak suai di abih:

"Baoh yot, baoh jangoa, mbaik to, mbaik thong drei bhian pandar yaok harei ye oh klaak hu. Urang praong meng 50 thun tagaok daok thau ngak, daok dom urang ndih tapui meng thun 1980 ye oh thau ngak. Peih tal bac ini lac biak uan tabuan".

Urang K'ho xã La Dạ, huyện Hàm Thuận Bắc, tỉnh Bình Thuận ngak mbang duah jien meng bruk pala drak, raong glang, cap mek ikan angaok kraong, craoh nan ye brei hu rilo pandap pabak ka bruk ngak mbang nan. Nan ye bruk pak yot hu meng lavik zaman saong patoa veik meng rai ini tapa rai hadei. Meng phun kreim, phun tang, havei ia…., tapa plaak tangin gheih ngak di urang K'ho hu ngak jeng dom pandap pabak ka raidiuk yau ye la-i, canaih, jangoa, yot… biak mekre mata.

Amuk Lê Thị Kim Liên, Phaok akaok UBND xã La Dạ, huyện Hàm Thuận Bắc, tỉnh Bình Thuận brei thau, dalam xã hu 4.321 menuac min daok jaik 15% menuac thau pak yot, dalam nan rilo meng lac urang taha, praong thun, daok dam dara urang ranaih ye oh daok mbak carak haong bruk bac bruk ngak. Min karja palei mboh lac oh caik ka bruk ngak meng kan ini lahik nao:

"Peih tal pato pak yot ini piah ngak habar ka taong abih dam dara urang ranaih saong bol bhap drei daok patagok hu yaom glaong meng kan di ong muk caik veik. Labik du lịch di Hàm Thuận Bắc cakrok, dalam tuk  xã La Dạ daok angaok jalan du lịch nao Đa Mi saong jaik labik inem mek Căn cứ Tỉnh ủy zaman taong Mỹ peih tabiak jalan piah jeng labik du lịch bhap bini hu rilo tuai vaih tame. Pak ini, tuai hu maong iek dom pandap pak meng kreim, la-a, gam khik hu siam ka langik tasik, gam khik hu bruk ngak meng kan".  

Amuk Lư Thái Tuyên, Phaok Yam ndok Miuyim tỉnh Bình Thuận brei thau, peih ngak Danak dak “Khik ramik, patagok yaom glaong ilamu meng kan siam mekre di dom bangsa takik kak haong cakrok du lịch” (danak dak 6) di Danak dak bruk ngak negar patagok kinh tế - xã hội bhum bhap bini bangsa takik saong bhum ceik tukvak 2021 – 2030, dalam thun 2024 ini, Miuyim tỉnh Bình Thuận peih biak rilo tal pato yau ye pato bruk pak yot di urang K’ho daok di 3 xã Đông Giang, Đông Tiến saong La Dạ di huyện Hàm Thuận Bắc.

" Tal pato di La Dạ salah blaoh, urak ini daok pato di Đông Tiến saong tuk pato salah, kol dahlak brei peih tal pato pak yot di xã Đông Giang, huyện Hàm Thuận Bắc".

Bruk pak yot lac bruk ngak meng kan di urang K'ho, saong daok lac ilamu gheih mekre brei hu khik ramik, patagok. Tuk hatai sahneng di rahra hu salih karei, cakrok jeng palei ngak, meda daong yaih khan ka langik tasik, anek manuac, prein khang daok hu, saong dom kaya pandap di bhap bini pabak ka patagok KTXH di puk palei./.