Dahlau di tuk jit Covid-19 tamuh tabiak, yaok thun, dom huyện bhum ceik glaong di tỉnh Quảng Nam yau Phước Sơn, Tây Giang, Đông Giang… taduan raok yaok ratuh rabau mbang tuai damuai. Ralo labik hu tuai dalam saong langiu taneh ia thau tal yau Đỉnh Quế, glai phun inem krung Pơ Mu, Palei du lịch bhap bini Bhơ Hôồng…

Rilo mbang mai tal huyện bhum glaong Tây Giang, sa-ai Lương Thị Hương, Akaok Jabat danak dak kapul nyaom Children Of Việt Nam hu yaih khan rilo tuai dunya mai ini piah thau dom rija roya hadah krah di bhap bini Cơ Tu. Tui sa-ai Lương Thị Hương, langiu di langik la-an bingi, anek menuac siam hatung hatian ye hệ sinh thái glai biak praong biak rilo, hu khik ramik yau daok tamo di Tây Giang lac biak siam piah patagok du lịch sinh thái.“Bruk ngak brei dahlak biak caik dalam hatai lac urang khik ramik hu glai Pơ Mu, urang taong laik thứ tự yaok phun saong jao ka rahra eng drei khik iek. Dahlak jeng biak caik hatai haong rija roya di rahra pak ini, ragu tamia Tâng tung da dá biak dui pachreih tuai damuai, dahlak hu mbaok tame rilo mbang saong kol dahlak hu ba drei tame haong urang dalam ragu tamia nan.”

Rilo thun tapa, huyện Tây Giang hu taduan raok dom kapul tuai dunya mai haong dom tour du lịch bhap bini, duah thau ka raidiuk, ilamu di bhap bini Cơ Tu. Sa-ai Pơloong Plênh, urang jakar Jabat Ilamu – Brei thau huyện Tây Giang, lac menuac pambuak pagam, ba tabiak hatai sahneng biak gheih ka bruk du lịch trải nghiệm. Dalam mbang nao gam haong tuai duah thau glai phun inem krung Pơ Mu, urang likei Cơ Tu ini ngak brei tuai dunya tatuak drei tuk ndom sap Anh piah yaih khan ka ilamu di bhap bini drei.

Dahlau di tuk jit Covid-19 tamuh tabiak, tỉnh Quảng Nam kuhria peih praong labik du lịch, pambak tame prein khang di labik bhum ceik gah pai haong hệ sinh thái glai praong, rilo janih gam haong ilamu bhap bini bangsa takik hadah krah. Ong Arất Blúi, Phaok akaok UBND huyện Tây Giang, tỉnh Quảng Nam brei thau, du lịch labik bhum ceik gah pai tỉnh Quảng Nam brei hu buh jien tame ngak njauk tanut piah tagok hu abih prein khang di nyu. “Kol dahlak caong khin Trung ương saong tỉnh Quảng Nam sangka buh jien tame rilo jang piah ngak jalan mbak, hạ tầng, daong ka bruk nao mai hu mbuan lagaih, hu dom danak, sarak patagok ilamu, thể thao, ravang me-in. Brei sangka tal dom yaom glaong ilamu mboh saong oh mboh di meta piah khik ramik saong pambak praong.”

Dalam jalan cakrok patagok tỉnh Quảng Nam, 5 thun tal tỉnh biak iek praong bruk cakrok du lịch labik bhum ceik gah pai. Ong Lê Trí Thanh, akaok UBND tỉnh Quảng Nam brei thau, patagok ravang me-in bhum ceik Quảng Nam oh neh tabiak bruk khik caga saong patagok hệ sinh thái glai saong khik ramik ilamu pak ini. Meyah khik ramik saong patagok njauk jalan, ini lac dom yaom glaong praong ngak jeng mbaok meta bahrau ka du lịch Quảng Nam tukvak anak tal. “Patui bruk cakrok ravang me-in di dom labik hu prein lagaih ka du lịch sinh thái, du lịch mạo hiểm saong padeih padei. Du lịch sinh thái pambuak haong ilamu pak ini di bhap bini bangsa takik daok di labik bhum ceik. Taong abih dom janih du lịch praong saong sit meda pambuak tame gauk piah ngak jeng 1 prein dui pachreih bahrau ka du lịch bhum gah pai di tỉnh Quảng Nam./.”

Urang lang: M. Phương