Sap ndom biai di yaok bangsa lac sa asal kadha di ilamo. Gam haong nan, lac jalan piah tamuh tabiak saong pambak prong dom kadha prong di abih dalam rai diuk ilamo di yaok bangsa. Kayua yau nan ye, bruk khik ramik sap ndom, panuac puac bhum urang bangsa takik urak ini nan lac bruk njauk ngak samar drah.

Tui pathau khan di Mentri Ilamo – Padhih saong rivang ma-in, tal urak ini, hu 51 gilang tapuk pakat tỉnh, 541 gilang tapuk pakat huyện saong jaik  2.200 gilang tapuk pakat xã di dom puk palei hu bhap bani bangsa takik daok, urak ini hu tapuk meng dua - dua sap bangsa – sap Yuan. Abih di nyu lac, rilo gilang tapuk daok kham merat số hóa harak gar meng sap bangsa piah khik hu suai lavik.

Urak ini, di dom puk palei, sap ndom saong akhar vak di rilo bangsa takik yaom lac hu công nhận min tok hu pandar di dom labik sit, rilo urang bangsa takik oh ka hu labik piah pandar sap bangsa di drei. Kayua yau nan ye, tuk vak tapa, rilo puk palei hu dom jalan ngak siam lagaih. Pagap yau di tỉnh Khánh Hòa peih tal bac sap ndom, akhar vak di urang Rắc-lây brei ka urang jakar; urang ngak bruk karja, tỉnh Phú Thọ khik ramik sap ndom, akhar vak di bangsa takik tapa bruk pato veik dom kadha daoh, ragu daoh bhap bani, kadha ma-in bhap bani di urang bangsa; tỉnh Ninh Thuận duah, pataom, ngak tapuk akhar Cam, jao brei taduan mek tapuk yao klak Cam saong hu Pasak Khik piah Pakat negar II Ban Raya Hồ Chí Minh pasiam veik, số hóa.

Sa-ai Bhling Thị Tuyền, daok di xã Cà Dy, huyện Nam Giang (tỉnh Quảng Nam) lac urang bangsa Cơ Tu hu mbaok dalam tal pato pathram ndom lac, di dom khóa bac, urang bac hu dom chuyên gia, urang khik iek saong nghệ nhân pato pakai saong tacei jalan ndom puac, jalan cih vak sap ndom panuac puac di bangsa drei. Kadha ini biak hu makna saong biak siam ka bhap bini:  “Hu mbaok tame tal pato pathram dahlak biak bui sambai saong hadah mbaok meta. Ini lac mbang akaok meti dahlak hu mbaok tame tal pato pathram ka bruk khik ramik sap ndom, akhar vak di bangsa Cơ Tu di drei. Jeng yau rilo mikva di xã Cà Dy, dahlak tok thau ndom, oh ka thau vak. Caong khin, ini lac tuk piah ka dahlak duah thau saong bac megru dalam jang ka akhar vak di urang Cơ Tu drei jang yau ilamo mengkan di bangsa”.

 Mentri Pato megru jeng hu ba tabiak rilo jalan ngak piah peih prong labik jang, paglaong chất lượng pato sap bangsa takik dalam sang bac. Urak ini, dalam negar hu 6 sap bangsa takik hu ba tame pato dalam dom sang bac nan lac sap: Mông, sap Ê Đê, Ja-Rai, Ba Na, Cam saong sap Khmer di 21 tỉnh, ban. Yaok thun, hu jaik 600 sang bac ngan haong 4.500 tal bac saong labaih 110.000 anek saih hu bac sap bangsa takik. Abih di nyu lac, danak dak pakat negar cak rok patagok kinh tế-xã hội bhum urang bangsa takik saong bhum ceik vaktu 2021-2030 meda hu pabak pren khang brei ka bruk khik ramik sap ndom, akhar vak di dom bangsa takik.

Tui ong Trần Mạnh Hùng, Phaok akaok Vụ Ilamo Bangsa (Mentri ilamo padhih saong rivang ma-in), urak ini, dom puk palei dalam negar hu peih rilo tal bac ka bruk khik ramik sap ndom, akhar vak ka urang bangsa takik, dalam nan hu dom urang taha akaok palei, akaok puk jeng yau urang hu angan je dalam bhap bani. Dom tal pato pathram ka bruk khik ramik sap ndom, akhar vak oh lac bruk ngak hu makna piah paglaong akaok saneng di dom pakat karja saong bhap bani ka yaom glaong ilamo meng kan di dom bangsa, bo daok piah duh ka rai diuk yaok harei, daong cak rok patagok kinh tế, xã hội di puk palei: “Bruk peih dom tal pato pathram lac bruk khik ramik ilamo meng kan dalam negar ngan haong dom puk palei hu rilo bhap bani bangsa takik. Vụ Ilamo bangsa caong khin ini meda lac jalan peih tabiak, ndung bak bruk peih tabiak jalan piah ka bruk pambuak gauk di Trung ương haong puk palei piah ngak habar khik ramik hu ilamo dom bangsa ka nyu siam di abih”.

Yau nan, meng dom kham merat dalam gah ilamo hu palagaih ka sap ndom, akhar vak di dom bangsa takik hu pandar rilo jang, prong jang dalam rai diuk, rik daong peih ngak siam Sarak Trung ương 5 (Khóa VIII) ka dak padang saong cak rok patagok bein ilamo Việt Nam mbak carak  ilamo bangsa./.