Soạn giả Mộc Quán - Nguyễn Trọng Quyền ndih tapui thun 1876 (lac thun Bính Tý), di palei Thạnh Hòa Trung Nhứt, tổng Định Mỹ, quận Thốt Nốt, tỉnh Long Xuyên; urak ini lac phường Trung Kiên, quận Thốt Nốt, TP. Cần Thơ.

Bruk pakacah sap daoh cải lương giải “Mộc Quán - Nguyễn Trọng Quyền” thun ini hu 43 urang mai meng 12 kapul daoh tamia daok dalam saong langiu công lập meng dom tỉnh, ban dalam taneh ia. Urang umo sit di abih lac 19 thun, urang umo praong di abih lac 67 thun. Urang pakacah angan Định Thị Nga, mai meng Nhà hát cải lương Việt Nam, ban Hà Nội brei thau: “Bruk pakacah ini dahlau di abih lac oh neh rabha umo thun, daong palagaih ka taong abih dom nghệ sĩ hu mbaok tame. Tuk mai haong bruk pakacah, dahlak kham merat pasram saong duah gru piah pasram, pahat meng yaok panuac daoh, yaok nốt nhạc.”

Bruk pakacah thun ini rah tabiak njauk di tuk pahadar 70 thun harei palăng lahik di soạn giả Mộc Quán - Nguyễn Trọng Quyền (1953-2023). Langiu dom mbang pakacah daoh, urang pakacah daok hu mbaok tame cuh gilau, pok bingu di labik pahadar Mộc Quán -Nguyễn Trọng Quyền. Ini lac bruk biak hu makna brei mboh hatai iek praong di dom nghệ sĩ, abih di nyu lac dom urang pakacah daok ranaih umo thun brei ka “hậu tổ” hu rilo prein yava pabak ka sân khấu cải lương Nam bộ. Urang pakacah angan Lê Ánh Hoa, Hội sân khấu TP. Cần Thơ saong urang pakacah angan Trương Bùi Quang Vinh, Pasak Ilamu nghệ thuật tỉnh An Giang khan lac:“Tuk hu mbaok tame bruk pakacah “Mộc quán – Nguyễn Trọng Quyền” ye dahlak biak uan tabuan, chreih chrai saong eng drei tut angan tame, piah ngak jeng talei pambuak ka dam dara harei hadei patagok ilamu nghệ thuật meng kan.”.“Bruk pakacah ini peih praong ka dom nghệ sĩ hu blaoh thành tích, nan ye jeng hu áp lực min nan jeng lac labik siam ka dahlak saong dom ayut sahabat bac megru, paglaong ilamu.”

Tapa 2 vòng pakacah sơ tuyển saong bán kết, Hội đồng Giám khảo pilih ruah hu 12 urang gheih di abih tame dhi puac di abih, pakacah gauk saong pok brei giải. Dalam dhi puac abih, dom urang pakacah brei daoh 1 bài vọng cổ tui bốc thăm saong javap jalei panuac sua tangi di mBan giám khảo ka dom bruk pambuak tal raidiuk, bruk ngak saong dom rik daong ka cải lương di aruah soạn giả Mộc Quán - Nguyễn Trọng Quyền. Meng kuhria caga tani tanat, 12 urang pakacah hu ba mai dom kadha biak gheih brei ka urang takre. Amuk Lý Phương Phương, daok di quận Ninh Kiều, Cần Thơ, lac: “Tapa dom trích đoạn cải lương hu dom nghệ sĩ parang me-in, dahlak mboh anit ranam cải lương jang. Tapa nan, dom urang ranaih hu parang me-in rilo jang dom tích tuồng di aruah soạn giả hu vak tabiak.”

Tui mBan peih bruk, 12 urang pakacah hu Hội đồng giám khảo taong yaom glaong gah daoh, diễn saong ngak ka urang caik hatai, pabak hu bruk sahneng duah bahrau di mbang pakacah. Tiến sĩ Nguyễn Đăng Chương, Phaok Chủ tịch Hội nghệ sĩ sân khấu Việt Nam mboh lac: “Dom nghệ sĩ hu mbaok jeng lac dom nghệ sĩ daok ranaih. Dom adei daoh, diễn biak gheih, caik veik dalam hatai di urang maong iek. Abih di nyu lac, tapa dom panuac javap jalei, mboh lac dom adei hu duah thau biak cambaih laih ka raidiuk, bruk ngak di Mộc Quán - Nguyễn Trọng Quyền, sa urang hu rik daong praong ka  cải lương.”

Puac di abih, mban peih bruk hu pilih ruah 5 urang pakacah gheih di abih piah jao Huy chương ameh saong 7 urang hu taduan Huy chương pariak. Ong Nguyễn Minh Tuấn, Yam ndok Sở Ilamu, Thể thao saong Du lịch TP. Cần Thơ brei thau, meng ilamu di mbang peih ngak, Cần Thơ brei pambuak bruk haong Hội Nghệ sĩ Sân khấu Việt Nam khik ramik peih bruk pakacah Cải lương “Mộc Quán - Nguyễn Trọng Quyền” yaok 3 thun 1 mbang./.