Yaok thun An Minh hu labaih 23 ribau ha ngak tui bruk raong hadang, ngak padai

Ong Nguyễn Văn Khánh, Yam ndok HTX hadang, harieng, padai Thạnh An brei thau, thun 2016 tuk bahrau padang tabiak, HTX bahrau hu 13 urang, mblang taneh oh ka tal 20 ha. Tuk nan, mikva urang nong jeng daok pala ngak tui jalan meng kan. Bilan padai trun pajaih oh samu gauk, raong hadang jeng yaok urang sa tukvak karei di gauk, ba tal năng suất bier, raidiuk gaok kan kandah.

Min meng bilan ngak thun 2017, meng khang hatai ngak tui jalan ba tabiak di jabat ngak nong, HTX hadang, harieng, padai Thạnh An jeng HTX ba akaok nao dahlau dalam bruk mbaoh tangin pambuak bruk ngak padai hữu cơ haong Cty. Urak ini, raidiuk di dom urang dalam HTX hu salih bahrau mboh di anak meta. Ong Nguyễn Văn Khánh, Yam ndok HTX hadang, harieng, padai Thạnh An brei thau: “Tuk camereip jien mek tame oh tani tanat, min meng di tuk salih tapa raong hadang pablak haong ngak padai, abih di nyu nan lac padai pablei hu yaom, bo daok hu labik pablei abih nan ye mikva pachrieh tui. Ngan haong bruk raong hadang ngak padai hữu cơ, khak hữu cơ gam jru hữu cơ biak kein ka bruk raong hadang di harei hadei, abih di nyu lac tuk daok raong hadang min pandar khak hữu cơ ni pagam haong raong hadang lac biak siam ka alam môi trường.”

Tapa 4 mbang ngak padai hữu cơ, HTX hu tagok meng 20ha tagok tal jaik 130 ha di thun 2021. Langiu di kein laba kinh tế di anak mata lac hu labik pablei abih meng di akaok vu saong yaom tani tanat, bruk ngak padai hữu cơ angaok mblang taneh raong hadang daok ba mai rilo kein laba suai lavik, yau ye: daong khik caga prein yava ka urang nong, ngak pasiam viek taneh riya, khik tani tanat năng suất padai, tagok năng suất vụ hadang,…. Angaok dom mblang padai katam jangaih, sap mac suốt gam haong sap ndem klao chreih chrai. Bilan ngak thun ini, padai hữu cơ di HTX Thạnh An mek hu năng suất labaih 6 tấn sa ha, Cty mbaoh tangin pambuak bruk blei abih meng akaok vụ ngan haong yaom 6 ribau 800 đồng sa kg.

Yaok thun An Minh hu labaih 23 ribau ha ngak tui bruk raong hadang, ngak padai. Meng di tuk gah ngak nong ba jalan tabiak salih bruk pala drak tapa ngak tui jalan hữu cơ hu maong lac jalan siam di abih daong paglaong yaom kaya nong di huyện. Ong Nguyễn Văn Tùng, Phó jabat ngak nong saong patagok palei pala huyện An Minh daok brei thau lac: “Huyện rilo meng lac raong hadang haong ngak padai. Sản lượng hu meng 4 tấn meteh tal 5 tấn. Khol dahlak brei cak rok patagok padai ye brei ngak tui jalan paglaong yaom,  daok sản lượng ye du nan oh meda paglaong jang kayua drei raong hadang. Yau nan tuk yaom phun padai tagok ye bhap bini daok khik bruk raong hadang haong ngak padai, plaih dom labik oh ngak padai nyu ngak ka bruk kein laba di raong hadang bier jang.” 

Akaok thun ini, mikva urang ngak nong pala padai hữu cơ di An Minh hu pabak sa bruk bui sambai nan lac hu Mintri ngak nong saong patagok palei pala pilih ruah ngak iek 500 ha bruk raong hadang haong ngak padai hữu cơ, gam haong rilo sarak daong jhul patagok bruk ngak mbang, pala drak. Gah ngak nong huyện jeng daok caga ngak salah adat tut angan harak chứng nhận OCOP ka padai hữu cơ An Minh piah padang angan pablei salih, ngak jeng jalan yaih khan suai lavik, daong ka mikva cak rok patagok kinh tế khang kajap./.

Urang lang: Thu Thao – 25/02