Meng bilan 6 tal urak ini, glut jaleih takai kraong ngak brei jaleih 18 baoh sang di rahra pak huyện Ngọc Hiển, khat lahik labaih 1,6 tỷ đồng. Daok di huyện Năm Căn, urak ini hu labaih 65 labik mbuan glut jaleih, atah abih tih labaih 100km.

Labik mbuan glut jaleih takai kraong di huyện Năm Căn daok di labik kênh Đấu Chà - Biện Trượng, xã Lâm Hải. Barau ini, 1 mbang glut jaleih ngak klaoh jalan nao mai. Mbang glut jaleih jeng ngak ka baoh sang di ong Đinh Văn Ngon theik tui ia. Bruk njauk mayai nan lac, ini mbang ka dua ong Ngon njauk panduan ba nao daok di labik karei kayua glut jaleih:

“Tuk nan kraong ini biak sit, sang dahlak padang di tapen kraong, njauk glut jaleih mbang camriep di maong 2 tal maong 3 dah page, mbang ka dua glut jaleih abih sang trun kraong. Mboh yau nan, adei saai pachreih dahlak padang sang tame gah dalam, piah tuk drei nao ngak glaih mai ndih ka nyu bingi”.

Dalam tỉnh Cà Mau urak ini hu labaih 425 km takai kraong, ribaong njauk glut jaleih saong mbuan glut jaleih rilo atau takik. Bruk glut jaleih takai tasik jeng biak pandik akaok, haong 187/254 km takai tasik njauk glut jaleih. Dalam 10 thun mai ini, glut jaleih takai tasik ngak lahik 5.250 ha taneh glai.

Ong Huỳnh Quốc Việt, Akaok UBND tỉnh Cà Mau ndom lac “glut jaleih taneh biak kan kandah” piah ndem ka bruk BDKH ngak kanjak jhak tal bhum palei di drei. Yaok thun, tinh lahik 200 – 300 ha taneh glai pacang caga tapen tasik. Rilo labik nao jaik tal labik glai di rahra. Tuk glai pacang caga glut jaleih abih, tal danao raong hadang di rahra ye bruk glut jaleih biak samar drah. Ong Huỳnh Quốc Việt ndom lac, njauk hu bruk xã hội hóa pacang caga glut jaleih takai tasik:

“Caong brei ngak sarak xã hội hóa piah pasiam labik glut jaleih. Tapen takai tasik hu dom labik meda xã hội hóa, ieu daa bruk buh jien tame hu. Daok sarak taneh glai pacang caga piah cak rok bruk ngak mbang urak ini daok gaok rilo kan kandah, yaom lac dom labik ini glut jaleih lahik glai abih paje. Urak ini dalam tinh jeng daok labaih 20 km takai tasik glut jaleih biak khang. Caong dom mintri, dom gah trung ương caik hatai daong samar drah piah ka tinh ngak pasiam veik”.

Dom thun tapa, Cà Mau ba tabiak ngak dom janih ar pacang piah khik labaih 80km takai tasik. Dom labik glut jaleih khang tapen kraong, mbuan ngak khut hạ tầng, labik rahra daok jeng hu ngak dom ar pacang. Min, dalam tuk glut jaleih daok rahtabiak di rilo labik, dom prein khang di tinh oh pabak hu abih, nan ye dom jabat chuc nang palei daok peih ngak dom jalan ngak piah patrun patakik dom khat lahik di anak mata. Yau di huyện Năm Căn, sa dalam dom huyen njauk glut jaleih biak khang, bruk khan brei thau dahlau dom labik mbuan glut jaleih tuk halei jeng hu ba tagok dang akaok. Daok dom jalan mbak, ar pacang mbuan glut jaleih meda ieu pataom dom kapul pambuak tal daong ka rahra ngak pasiam veik. Dom kraong, ribaong, dom jalan mbuan glut jaleih, kan ngak pasiam meda jak ba rahra panduan ba sang danaok.  

Ong Nguyễn Thanh Tùng, Akaok Chi cục Thủy lợi Cà Mau brei thau, daok brei pasang iek dom labik mbuan glut jaleih piah hu jalan langyah, jalan ngak,, brei pacang caga meng aval, meng di tuk ka oh rahtabiak. Dom puk palei peih bruk quy hoạch, pasang iek, rami ramik gilac veik labik rahra; Pasang iek, khik ramik catang bruk padang ngak, ngak pasiam veik sang danaok, danak dak tapen kraong, tapen tasik; Langyah biak catang bruk lih mek mbaok kraong, takai kraong. Langiu di nan, dom labik glut jaleih khang, Cà Mau jeng brei padang ngak dom danak dak piah pasiam veik labik glut jaleih meda ngak kan kandah jang. Ong Nguyễn Thanh Tùng, ndem lac:

“Kol drei njauk padang dom danak dak ngak pasiam veik bruk glut jaleih. Gam haong nan, njauk hu dom danak dak pasiam veik kraong, takai tasik, khik tani tanat jalan ia nduac di dom labik glut jaleih. Sa bruk tra lac njauk padang ngak danak dak pacang caga glut jaleih khik pacang đô thị, labik rahra daok pataom gauk. Brei hu quy hoạch padang ngak dom labik đô thị, labik rahra plaih dom labik mbuan glut jaleih”./.