Ong Trần Bá Linh, Tổng yam ndok Công ty trách nhiệm hữu hạn sa thành viên Công nghệ glaong Điện Quang, di Công ty Cổ phần Tập đoàn Điện Quang ndom lac, gah ngak kong điện tử di Việt Nam cak rok suai damuai, oh ka brei mboh hu labik dang praong dalam gah patagok kinh te di taneh ia lac kayua kurang bruk buh ginup prein yava jien padai tame roh duah saong cak rok patagok dom công nghệ praong, abih di nyu nan lac kurang menuac hu ilamo ngak gah bruk ini: “Gah điện tử vi mạch bán dẫn ye khol drei ka oh hu nền tảng, rilo meng lac daok blei meng negar langiu mai. Meng blaoh sarau kadau gah bán dẫn, hu dom urang pambuak bruk di gah langiu tame, caong jhul khang ngak samar ye kol drei njauk klaih klaoh gah pabak pandap. Urak ini hu Labik kong nghe glaong blaoh daok pambuak bruk haong dom mban, dom gah pataom prein tame cak rok patagok gah ini biak rilo saong caong lac samar hu jak jeng”.

Piah ba Việt Nam jeng pasak ngak tabiak vi mạch di bhum saong di dunya, tui PGS.TS Nguyễn Anh Thi – Akaok Mban khik ramik Labik Kong nghe glaong TP.HCM ye njauk peih bahrau, peih praong bruk pato pakai gah ini hu glaong tagok tal tiến sĩ, thạc sĩ, gam haong nan, pato pakai paglaong ngan haong dom urang ngak meng dom gah lagaih, gah jaik. TP.HCM njauk padang Kadung cak rok vi mạch praong labaih 3 triệu USD piah daong pato pakai ka menuac ngak hu makna ini. Anak tal, Mban khik ramik labik Kong nghe glaong TP.HCM meda pok panuac tagok UBND ban raya patabiak danak dak patagok ilamo ka gah vi mạch bán dẫn:“Kol drei meda dui pachreih menuac ngak lac urang Việt daok ngak bruk, thiết kế vi mạch di negar langiu mai gilac veik meng sarak jien je saong dom sarak daong palagaih piah dui pachreih urang naih joi bo Sarak ka 98 hu brei adat. Meyah caong ngak samar drah ye kol drei pilih ruah dalam 5 thun piah dui pachreih dom urang ngak gah nan mai biak samar, piah cak rok patagok gah ini, piah mek hu bruk ba tabiak di drei”.

Di Sang bac Đại học Công nghiệp TP.HCM, dom kadha bac pambuak tal ngak tabiak vi mạch, công nghệ bán dẫn jeng hu ba tame danak dak pato magru meng lavik mai. Tukvak ini, sang bac daok buh jien tame dom bilik ngak iek, nền tảng phần mềm piah caga ka bruk pilih ruah saong peih bruk pato pakai meng thun 2024.

Tui PGS.TS Trần Mạnh Hà, Phó mban pato pakai - Đại học Quốc gia TP.HCM, bruk pato pakai urang ngak gah vi mạch brei ngak suai lavik, gaok mai kỹ sư 5 thun jeng ka oh ngak hu bruk bo njauk bac tagok glaong saong daok brei bac magru dalam pak di doanh nghiệp:“Bruk pilih ruah sinh viên hu mbaok tame gah vi mạch jeng lac sa bruk bo drei njauk pasang iek. Nan lac menuac daok hu, điểm jeng biak glaong min tui bruk urak ini, sinh viên caong bac piah tamat samar, piah nao ngak bruk duah jien, hu biak takik menuac caong daok veik bac suai lavik jang. Ieu dom urang ini bac veik lac biak kan. Kayua yau nan ye, njauk hu dom sarak ka jien bac piah pachreih ba dom adei sinh viên nan hu mbaok tame bac dalam di gah ini”.

Mintri Pato magru daok dang tabiak padang ngak Danak dak pato pakai, cak rok patagok menuac urang hu ilamo glaong pabak ka công nghệ glaong, piah pok tagok Thủ tướng Rajaei di puac thun, dalam nan hu jalan likau sarak daong dui pachreih urang ngak dalam gah điện tử, bán dẫn vi mạch./.