Yam tame sang bac Tiểu học Phú Hòa 3, di Ban TP.Thủ Dầu Một, pak mblang pasak, sa labik sit hu ramik ngak meng kreim, kayau hu dui pachreih dom meta maong. Nan lac “labik ilamo Wa Ho”, labik dom adei anek saih duah thau ka urang pan akaok ba jalan biak praong di bangsa.

Ngan haong dom pandap kaya randap bhian yau thaong kalik juak cao su, talimo cối khan bai, haong dom thaot binguk meng kal ka Wa, labik sit ini yau sa miuyim sit, daong ka dom adei thau cambaih jang ka raidiuk saong bruk ngak ka taneh ia di Wa. Dom kadha ndom ka Wa Ho saong dom anek uranaih hu khan gilac meng sap ndomlai la-an, bingi pang, hu ngak brei medeih tagok dalam tung tian dom adei ka hatai anit ranam praong haong Wa.

Hatai sahneng padang "labik ilamo Wa Ho" tabiak meng hatai caong di nai gru Lê Thị Kim Thúy, Akaok sang bac, tuk mboh dom adei anek saih biak caong khin duah thau ka Wa. Gru Thúy hu pandar veik dom pandap kaya, gam saong bruk daong di dom cei nai gru, amaik ame anek saih piah ngak jieng sa labik gam hu yaom glaong, gam oh abih rilo jien.

 “Ndom ka Wa ye biak praong, nan ye brei padang asal kadha, ilamo jaik taphia abih haong dom adei. Kayua yau nan ye, sang bac hu ginum biai, dak padang, ba tabiak jalan ngak, asal kadha cambaih laih jaik saong dom adei saong dom kadha pato bac pambuak tal Wa. Meng nan, pilih ruah angan kadha piah dom adei bhian randap, mbuan thau ka Wa”

Daok di anak mblang pasak sang bac Tiểu học Lý Thường Kiệt, di Ban Dĩ An, "labik ilamo Wa Ho" yau sa mblang taneh ganreih ka Wa, dui pachreih anek saih, gru pato saong amaik ame anek saih mai rivang iek yaok harei.

Meng dom bruk gheih meta yau tapen Nhà Rồng, sang tual Wa, atau gok Pác Pó, dom adei sit yau hu mai gilac veik dom thun bilan sajarah, gam haong Wa duah jalan daong ka taneh ia. Abih di nyu nan lac, kỳ đài ngak dreih yau Quảng trường Ba Đình hu ramik caik angaok tu kapuk hu ngak yau thaik bingu 5 saok haong makna panuac ndom bebat di Wa jeng daok danei miat tal dunya.

Gru Triệu Quốc Thanh, Akaok sang bac, brei thau: Kol dahlak caong khin labik ini hu jieng labik raong ba hatai anit ranam taneh ia, hatai thau dhar phol Wa Ho dalam yaok rai anek saih.

 “Tui pato tacei di Thành ủy Dĩ An ye sang bac tiểu học Lý Thường Kiệt jeng kham merat brei thau cambaih bruk bac ta-a, ngak tui jalan sahneng di Hồ Chí Minh dalam sang bac biak tantu tapa thaik sit, thaot binguk, phim sajarah, tapuk mbao piah hu bruk jaik taphia. Meng nan, urang jakar, urang ngak yaok harei meda bac megru paglaong ilamo, bruk daok dang di drei saong taong abih anek saih meda ba drei tame, ravang iek, bac pasram hu siam di abih saong jaik taphia abih”

Peih praong dom bruk ngak jak jeng ini, tui kuhria, tal puac thun bac 2024-2025, taong abih dom sang bac hu labik kieng Wa Ho, labik ilamo Wa Ho. Amuk Nguyễn Thị Kim Tuyết, Akaok jabat Pato Megru mầm non - Tiểu học Sở Pato Megru tỉnh Bình Dương ndom: Bruk padang labik ilamo Wa Ho hu jeng sa bruk ngak bhian randap, hadah krah, pambuak haong dom bruk pato megru di sang bac. Amuk Tuyết lac.

 “Dalam labik nan langiu di parang iek ka nyu gheih mekre ye gah tiểu học brei pabak tame tu tapuk, bruk puac tapuk di gilang tapuk, khan kadha ka Wa tame di ini haong asal kadha njauk haong thun umo. Brei ngak habar piah pathau khan ka dom adei takre saong khin duah thau, hu hatai caong duah thau ka Wa. Meng di nan meng daong ka dom adei thau anit ranam Wa Ho, piah hadei ini praong tagok dom adei meng thau bac megru saong ngak tui jalan hadah krah, siam mekre di Hồ Chí Minh”

Meda mboh lac, bruk padang “labik ilamo Wa Ho” di dom sang bac tiểu học di Bình Dương lac sa bruk ngak biak cambaih laih piah pato pakai rai hadei ka hatai anit ranamtaneh ia. Ini oh njauk lac sa kieng sit dalam sang bac bo daok lac sa asar pajaih pabam tame hatung hatian yaok anek saih. Asar pajaih nan praong tagok, jeng bingu jeng baoh, daong prein padang sa taneh ia khang kajap, ginup meda, siam mekre, yam takai nao samu haong dom negar praong, kaya meda karei yau panuac pato di Wa Ho./.