Melam trun, sa kapul urang halan hatian di Gia Lai jar var haong bruk ngak pasiam veik jalan. Saai Lê Tuấn Thành, akaok kapul ini brei thau, dahlau di tuk ngak pasiam veik mbaok jalan khut, mbaih mbaoh, kapul hu nao pasang iek saong likau adat kanja, jak ba phun jien piah ngak pasiam. Bruk ngak pasiam jalan di tuk melam piah plaih ngak cuang kandah tal bruk nao mai.“Ngak sa bruk hagait nan hu kein ka raha piah pambak tabiak dom bruk hu makna tal abih gauk, abih di nyu nan lac urang ranaih. Padang ngak saong peih ngak “labik jalan saron mbon” lac ngak pasiam veik dom labik mbaih mbaoh, labik jalan sit khut piah daong ka rahra nao mai hu siam jang”.

Tuk kapul halan hatian ba tangin tame ngak, rahra biak pachreih hatai daong meng bruk katung talei dien truac gom hadah, daong pabak ia piah sarau ciment, daong pabak ia manyum, pandap mbang ka dom urang ngak dalam kapul di tuk padeih padei. Ong Nguyễn Văn Thuyết, Akaok tổ dân phố 10, phường Ia Kring ndem lac.“Labik jalan pak ini hu rilo labik mbaih mbaoh, biak kan nao, harei ini, dam dara halain hatain mai piah daong ka mikva saong ngak pasiam veik dom labik mbaih mbaoh lac biak chreih chrai. Dahlak caong dam dara patui veik patagok dom bruk daong ka mikva nao mai hu tani tanat, salamat jalan mbak jang”

Oh lac ngak pasiam jalan di Pleiku, kapul halain hatain daok ngak di rilo labik jalan di dom labik pak tỉnh Gia Lai. Uan tabuan kayua jalan mbak nao mai hu ngak pasiam, nao mai hu lagaih, saai Trần Trọng Trung, rahra daok pak xã Ia Yok, huyện Ia Grai brei thau.“Jalan nao mai khut biak rilo, nao mai biak kan, jeng hu mbang hu urang labuh trun ribaong. Kapul halan hatian trun ngak pasiam veik jalan, mikva biak haniem phul, saong jeng tabiak daong bruk haong dom adei saai”.

Danak dak “labik jalan saron mbon” hu peih ngak meng di bilan 9/2023, tal urak ini hu peih ngak 19 mbang bal jalan palei atah abih tih 30km di dom huyện Ia Grai, Đak Đoa saong ban Pleiku, tỉnh Gia Lai. Danak dak hu dui pachreih yaok ratuh urang halain hatain hu mbaok tame. amuk Lê Kiều Thị Minh Thư (daok pak xã Tân Sơn, ban Pleiku) - urang dalam kapul halan hatian ndem lac:“Dahlak haong anek likei di drei jeng hu mbaok tame bruk “labik jalan saron mbon” daong ngak gheih dom labik jalan piah yaok rahra nao mai hu lagaih jang, daong pambak tabiak dom bruk ngak gheih ka rahra, haong hatai lac rik prein tame daong”

Yaom lac hu tuk bruk bal jalan hu ngak salah di tuk dah page mesup, dom urang halan hatian jeng mboh biak bui sambai saong haniem phul. Danak dak “labik jalan saron mbon” oh lac rik tame ngak gheih mekre dom jalan palei, khik ka salamat jalan mbak nao mai, bo daok pambak tabiak dom bruk ngak siam gheih, rik tame dak padang bruk jumpataom gauk dalam bol bhap rahra./.