Cù lao Phố (daok di phuong Hiệp Hòa, Ban Bien Hoa) ieu lac sa di dalam bhum taneh yau ye halau pajeng ilimo Bien Hoa – Gia Dinh. Kaoh pulao ini urakni daok khik hu ralo janih hijao, raidiuk sron mbon haniem phol. 

Padauk drei di dalam jalan palei tapen kraong Dong Nai hu sa baoh sang ngak lan am di muk Mai Ngọc Nhi. Muk Nhi khan brei thau lac, sang di drei meng lavik mai mbiah tal ini rai ka 5 ngak lan am. Kayua bhian randap krein  saong bruk ngak lan am meng daok sit nyu hu tamuh dalam hatai anit ranam bruk ngak lan am di drei: “Lan am Bien Hoa ngak tabiak biak susah, kayua masa suai lavik oh daok patui ngak yau nan ye nyu jaik si matai inum mek dalam raidiuk ngak lan am. Tuk dahlak barau ngak nyu mboh takik manuac urang thau ngak, oh hu manuac ngak, drei njauk brei pato, drei njauk da-a dom jang ngak tui ilamu dahlau piah roh duah thau”.

Yaom mada daok khik ralo ilamu krih krah saong hu sajarah ravik rai, muk Nhi tapak hatian khan lac lan am Bien Hoa mbiah tal ini oh ka mada hu angan je di hatai mikva. Sa kadha njauk ndom mayai lac di nyu kayua ndap nda ngak meng tangin, urang ngak jang ngak njauk gheih tangin yau nan ye ndap nda ngak tabiak oh hu ralo. Kayua yau nan ye, muk Nhi mahu khin ngak mbiah gap pakre kayua ngak tabiak ralo nan asal lan am kurang siam.

“Tui dahlak saneng lac drei takre jang sa palei ngak lan am meng tangin. Ngak meng jammaraik barau jang hu kayua mbuan brei ngak tabiak ralo ndap nda. Min lan am Bien Hoa ini lac ndap nda cih meng tangin, kayua thaik thaot gheih yaok baoh lan am karei karei di gauk ngak ka urang chreih blei jang”.

Tui panuac di Tien si Nguyễn Thị Nguyệt – Phaok akaok Hoi Van hoc Nghe thuat tinh Dong Nai, angan lan am Bien Hoa hadah tanyak di abih ieu lac meng di tuk hu Sang pato bruk ngak Bien Hoa (urakni lac Sang bac Cao dang My thuat Trang tri Dong Nai) peih di jaman Prang meng thun 1903. Tal thun 1925, hadei roh duah thau men, thaik rup, cara cuh am, cih bingu hala… dom rai urang jang naih gheih meng sang bac ini hu ba neh tabiak ralo janih baoh lan am gheih ghang siam makre: “Baoh bingula gheih ghang di lan am Bien Hoa mai meng ia men, thaik thaot jeng ye tangin cih bingu hala. Hadei di thun 1975, ndap nda ngak meng lan am Bien Hoa oh daok yau dahlau diah, kayua nduac tui nghe thuat ngak ka bruk pablei salih oh lagaih, kayua yaom kaom glaong”.

Lan am Bien Hoa danei angan dunya kayua sambo bar men “hijao padai chraoh nerang” biak gheih mata, hu urang Prang ieu lac “vert de Bien Hoa”. Tui barih tanyak hadah di bruk ngak paoh da-ndauk saong srau ia men ralo sambo bar, gam haong dom bingu hala saong thaik thaot, lan am Bien Hoa mada drah samar dang angan je di drei, daong cih inem masa patagok bruk ngak lan am Viet Nam gah Nam Bo dalam jiak jaman barau ini.

Piah yaih khan angan thaik thaot lan am Bien Hoa, yaok thun ratuh Gilang tinh Dong Nai hu peih ngak harei parang yaih iek lan am, pambuak haong dom kapul piah yaih khan dom ndap nda barau siam haong hatai caong di urang blei pandar urakni.

Bruk khik ramik, patagok lan am Bien Hoa oh lac sa janih piah caga khik ramik lan am hadah tanyak bar yau meng dahlau hu angan di dunya, blaoh daok jhul catang bruk yaih khan thaik thaot di bhum taneh hu sajarah lavik thun, pachreih patagok gah jirah rivang urang mai main tal Dong Nai. Dom baoh sang ngak lan am tui haong raidiuk urakni, tui hatai chreih di manuac blei pandar, pandar ilimo barau piah ngak tabiak dom ndap nda gam hu barih ilimo meng kan gam tui haong raidiuk urakni./.