Danak dak jalan nduac samar TPHCM - Thủ Dầu Một - Chơn Thành daok dalam tukvak kuhria caga

Meng thun 2016 tal thun 2020, tỉnh Bình Dương hu ba tabiak dom danak dak, jalan ngak cambaih laih ka patagok dom jalan mbak nao mai praong, pabak bruk cakrok KTXH. Tal akaok quý 2 thun 2022, thaik thaok dom jalan vành đai pambuak Bình Dương haong TPHCM, Bình Phước, Tây Ninh, Đồng Nai daok hu mblo tabiak.

Danak dak Vành đai 4 - TPHCM labik tapa tỉnh Bình Dương atah labaih 48km, hu 8 jalan radaih nduac samar, mbaok jalan praong 74m, urak ini daok hu ngak labik atah jaik 27km nao tapa dom labik hu rilo labik ngak kong. Abih di nyu lac, piah peih jalan Vành đai 4, tỉnh Bình Dương kuhria pataom tame ngak dom labik Đất Cuốc - VSIP 3, VSIP 3 tal VSIP 2A saong labik meng VSIP 2A tal Mỹ Phước 3 atah abih tih jaik 15km.

Njauk thau lac, Danak dak jalan nduac samar TPHCM - Thủ Dầu Một - Chơn Thành daok dalam tukvak kuhria caga, tỉnh Bình Dương, Bình Phước, TPHCM hu rilo harak ndom biai nao mai haong pakat hu thẩm quyền ka jalan ngak, jalan radaih… UBND tỉnh Bình Dương hu panuac ieu jabat karja hu thẩm quyền peih ngak danak dak ini tui jalan “tự lực, tự cường”, pambuak bruk haong dom mintri, dom gah piah ba gauk ngak. 

Gam haong nan, danak dak peih praong jalan roya 13 meng 6 jalan radaih tagok 8 jalan radaih jeng lac sa dalam dom bruk pambuak gauk praong piah paglaong prein pajeng ba, nao mai haong TPHCM daok hu tỉnh Bình Dương kham merat peih ngak. Bruk peih praong jalan roya 13 jeng hu pambuak haong danak dak peih praong jalan ĐT743 tagok 6 jalan radaih jaik salah, daong lang talaih bruk oh lagaih dalam nao mai di pasak labik ngak kong di bhum Đông Nam bộ.

Baoh tatua tapa kraong Sài Gòn pambuak Bình Dương haong Tây Ninh jeng hu ngak jaik salah, hu yaom jien buh tame ngak jaik 370 tỷ đồng. Saong piah hu samu gauk jalan pambuak di 2 tỉnh, Tây Ninh jeng hu ngak jaik salah Danak dak pok paglaong, peih praong jalan Đất Sét - Bến Củi pambuak atah, pambuak pagam haong jalan ĐT744. 

Dalam dom jalan nao mai pambuak haong Tây Nguyên, miền Tây saong TPHCM, jalan mbak di Bình Phước daok hu takik. Kayua yau nan ye, bruk ngak rilo jalan pambuak gauk tapa tỉnh Bình Phước daok lac bruk njauk ngak chip. Ong Nguyễn Mạnh Cường, Bí thư Tỉnh ủy Bình Phước brei thau, urak ini meng Tây Nguyên saong Bình Phước nao mblang kapal haoh Long Thành saong pabah lamnge Cái Mép - Thị Vải meyah nao tui jalan ĐT753 meda katut panak jang 60km duk haong nao tui jalan urak ini.

Danak dak jalan nduac samar Gia Nghĩa (Đắk Nông) - Chơn Thành (Bình Phước) hu quy hoạch blaoh, lac labik jalan dalam jalan nduac samar Bắc - Nam gah Pai, atah abih tih jaik 140km. Dua tỉnh Bình Phước saong Đắk Nông hu ginum biai saong hu harak pathau khan Thủ tướng, Mintri Jalan mbak Pajeng ba pasang iek, samar brei ngak dahlau piah caga peih ngak dalam vaktu 2021-2025 piah daong ka Bình Phước saong Tây Nguyên cakrok patagok.

Gam haong nan, Bình Phước jeng hu likau Quốc hội, Rajaei pasang iek, brei patui bruk buh jien tame ngak pasaim danak dak jalan Hồ Chí Minh labik Chơn Thành - Đức Hòa piah pasiam bruk nao mai pambuak pagam bhum saong samar peih jalan nao mai tui quy hoạch hu mbaoh tangin blaoh. Ini lac jalan praong pambuak Bình Phước haong dom tỉnh bhum taneran kraong CL./.

Lang sap: Mousa Phương – 18/05