Rilo doanh nghiep thau lac bruk gam diukrai siam makre, salamat, pasang iek hu jit ruak Covid-19

Huyện Củ Chi thau lac bruk gam diukrai siam makre, salamat, pasang iek hu jit ruak Covid-19, khik tani tanat prein yava saong raidiuk di bhap bini, gam khik tani tanat ka doanh nghiệp (DN). Amuk Phạm Thị Thanh Hiền, akaok UBND huyện Củ Chi brei thau, dalam thun ini, huyện hu peih dom sarak daong ba saong samar caik hatai tui pang dom kan kandah, tavak tavaiy dalam bruk ngak mbang, pablei salih di DN. Gam haong nan, jeng ngak talei pambuak bruk piah ka dom DN pambuak gauk gam cak rok patagok, gam ba mbuan lagaih tui jalan daong ka DN pasiam viek bruk ngak saong dom DN bahrau mai tal buh jien tame hu labik ngak mbang siam lagaih, khang kajap. Huyện jeng pataom tame jhul samar bruk salih bahrau hành chính, ngak pasiam viek khang bruk buh jien tame ngak mbang. Gam haong nan lac pasang iek, pambuan saong katut panak viek tukvak ngak harak gar ka dom kapul nyaom, DN saong manuac urang buh jien tame ngak, pablei salih.

Piah nao gam haong DN, Quận 1 hu peih bruk brei ka dom kapul nao rivang saong duah thau bruk di DN piah samar lang talaih dom kan kandah. Quận jeng hu peih bruk pambuak gilang pariak saong DN piah daong phun jien; peih nyaom biai nao mai di gah kak je haong DN piah pang dom panuac di dom DN ka bruk miễn, trun, giãn thuế; jhul khang bruk salih bahrau dom harak gar hành chính, abih di nyu nan lac dalam gah taneh riya, buh jien tame, padang ngak, jien je, bruk ngak…; tapa nan khik tani tanat bruk pablei salih salamat, mariak gauk siam lagaih, kein laba. Phó akaok UBND quận 11 Trần Thị Bích Trâm brei thau: Quận ba tabiak jalan ngak lac mek bhap bini saong DN ngak pasak piah duh, pamere, tapa nan padang dom jalan ngak siam lagaih dui katut panak tukvak ngak harak gar; brei thau cambaih jalan ngak saong khang hatai langyah  dom urang jakar ngak kan kandah ka DN.

Piah nao gam haong DN pasiam bruk ngak mbang, pablei salih, Giám đốc Sở Công thương TPHCM Bùi Tá Hoàng Vũ brei thau, dalam thun 2022, sở pambuak haong Gilang pariak kanja Việt Nam – Dhar TPHCM peih danak dak pambuak gilang pariak saong DN. Gam haong nan, sở pambuak bruk haong dom kapul bruk ngak, UBND dom puk palei peih nyaom biai pambuak bruk, nyaom biai tui dom asal kadha tui caong di DN piah samar lang talaih dom kan kandah gah phun jien ka DN. Langiu di nan, ba tabiak sarak daong jien laba tui danak dak pachrieh bruk buh jien tame di ban ngan haong dom harak gar samar di abih.  

Taphia di nan, Sở Công thương TPHCM hu peih ngak dom bruk pachrieh pablei salih dalam saong langiu taneh ia, daong DN peih praong darak pasa tapa dom danak dak khuyến mại; pambuak bruk pablei salih, pambuak cung cầu pandap panda di TPHCM haong dom tinh, ban; dom bruk pachrieh daong ka DN peih praong darak pasa pablei tabiak negar langiu.

Phun jien ngak mbang, pablei salih tuk halei jeng lac bruk hu DN caik hatai sangka dahlau di abih. Urang lambaok Gilang pariak kanja Việt Nam – dhar TPHCM brei thau, thun 2022, dhar gilang pariak ini peih ngak siam dom sarak ka jien mesraiy, gilang pariak piah khik tani tanat jien laba, tỷ giá saong dom danak dak brei mesraiy daong ka DN. Gam haong nan brei jhul khang dom bruk ngak, danak dak saong jalan talaih kan kandah ka DN yau ye: danak dak brei masraiy laba bier, brei mesraiy jien cakrok patagok bruk ngak nong palei pala, patui veik bruk pachreih dom kapul brei mesraiy trun jien laba ka DN./.

Urang lang: Thu Thao – 24/02