Dom kapal gilai di  tỉnh Kiên Giang tabiak tasik hu tagok min biak takik

Ong Nguyễn Văn Diều, daok di palei Vĩnh Hội, xã Vĩnh Hòa Phú, huyện Châu Thành hu 10 kapal taong ikan di tasik atah, công suất meng 500 CV sa sruh tagok, dok tong cap di mangaok tasik 6 sruh. Dalam tuk jit COVID-19 tamuh khang di tuk vak meng bloh, phun jien tabiak tasik tagok glong di abih kuhria meng dahlau mai, abih di nyu nan lac yaom menyek, ong Diều song mik va tong ikan pak ni gaok biak rilo kan kandah, rilo po kapal gilai brei padeih peih bruk tong cap.

Tui ong Diều, sa mbang tabiak tasik ka sa gu gilai nao tong cap brei hu phun jien buh tabiak tuk camereip meng 2 tỷ đồng tagok. Dalam tuk nan, kaya ikan di angaok tasik daok takik nao, tong cap oh hu hadom, yaom kaya ikan oh tagok, oh tani tanat, hu tuk trun biar .

Saai Trần Minh Mẫn daok di palei Vĩnh Hòa, xã Vĩnh Hòa Phú, huyện Châu Thành, hu 10 kapal gilai tong ikan di tasik atah, pren khang meng 750 CV/sa sruh, urak ni hu 4 sruh brei padeih tong cap.

Kan kandah dalam tong cap urak ni di urang tong ikan Kiên Giang lac kurang phun jien tuk camereip, tong cap oh hu hadom min bruk bayar jien laba, jien phun tal harei bayar gilang pariak dok lac sa bruk kateik trak ngan song rilo mik va tong ikan. Rilo po kapal ikan ieu pablei kapal gilai yaom tok samu meteh phun jien buh tame ngak, gaok mai daok trun bier jang min oh hu thei blei, bo kapal gilai daok angaok thu lavik harei nyu samar khut, gam oh hu jien bayar jien laba, bayar jien phun mesraiy di gilang pariak, sang oh daok hu jien.

Patui di nan, kan kandah dalam tong cap di Kiên Giang, urak ni lac kurang biak rilo urang ngak angaok kapal gilai. Lambaok urang pal akaok sở ngak nong song patagok palei pala Kiên Giang brei thau, phun jien piah nao tong cap di angaok tasik tagok glaong, kurang urang ngak, nan ye tong cap kaya ikan di tasik atah gaok rilo kan kandah.

Ong Nguyễn Văn Diều ndom lac: “Meyah gilang pariak dong ka mik va urang taong ikan “khoanh nợ”, oh mek laba atau trun yaom jien laba 5-7 bilan, ye mik va sahanang hatai tabiak tasik tong cap, pasiam bruk tong cap kaya ikan. Urak ni, kayua trak damak gah jien laba yaok bilan, bayar phun jien tui bilan, yau nan ye, mik va kan ba kapal gilai tabiak tasik, bo ba tagok thu padeih tong chap dok tagok rilo”. Urang tong ikan jeng cong khin duah hu rilo labik jang piah pablei kaya ikan.

Piah langyah dom kan kandah ni, tỉnh Kiên Giang daok pasang iek, lang talaih kan kandah dalam bruk tong cap song khik caga kaya ikan , piah ka urang tong ikan ba kapal gilai tabiak tasik tong cap. Dalam nan, gah chức năng patagok bruk khik ramik, ngak bahrau, tut angan tame, đăng kiểm gilai ikan biak catang, paglong bruk khik piah pandap hadei di tuk tong cap, piah paglong yaom kaya ikan song kein laba bruk tong cap.

Tỉnh daok peih ngak samu gauk, siam lagaih dom jalan pasiam bruk “thẻ vàng” di Ủy ban châu Âu, padeih abih bruk urang tong ikan lih tame bhum tasik negar langiu tong cap kaya ikan suan hukum, salih bruk tong cap tui jalan jhul pakhang bruk tong cap di tasik atah, takik tong cap di takai tasik, pachreih patagok dom bruk hu palih ruah glong, song pakauk oh brei dom bruk taong cap ngak brei lahik abih kaya ikan; Gam song nan, peih bruk tong chap kaya ikan tui jalan ba gauk khik ramik pambuak song bruk khik caga patagok kaya ikan, padang dom kapul pambuak gauk tong cap piah palagaih ka urang tong ikan patagok bruk ngak, gam song nan lac liên doanh, pambuak bruk di doanh nghiệp chế biến song hợp tác xã, kapul pambuak bruk, doanh nghiệp tong cap kaya ikan song urang tong ikan dalam bruk pablei pandap./.

Urang lang: Hani Pha – 07/10