Dua adit ini mai, amuk Phan Thị Loan (umo 53 thun, daok di An Giang), urang ngak kong di Công ty TNHH Đ.L di phường Hòa Phú, ban Thủ Dầu Một, tỉnh Bình Dương oh thau yau habar drei lahik bruk ngak, tuk sang mac gam  bahbang kayua oh hu harak blei ndapnda. Oh nao ngak di Cty di TP.HCM ngak bruk, amuk padeih bruk piah nao likau labik karei piah ngak. Amuk Loan khan lac, kayua umo praong thun, yau nan ye oh mbuan piah duah bruk ngak, kayua yau nan ye tuk hu sa urang ngak mbang blei salih taduan tame ngak, amuk Loan biak uan tabuan:“Drei daok di palei tagok mai di ini nao ngak meng hu jien piah kuria sangka ka raidiuk kayua hagait jeng njauk blei, oh dreih yau di pak palei. Dahlak caong hu nao ngak miat miat piah hu jien kuria sangka ka anek drei oh piah daong anek bik kurang di kan kandah. Drei oh hu bruk ngak, anek di drei jang mbak tame kan kandah tui”

Hardar dom thun dahlau deih, CTy hu rilo bruk ngak, tagok maong ngak bruk gam gam, nan ye diuk pasang saai Phan Ngọc Tiên, urang ngak kong di labik ngak kong Mỹ Phước I, ban sit Bến Cát, tỉnh Bình Dương hu jien mek tame labaih 18 trieu dong sa bilan. Jien hu daong ginup piah ka diuk pasang saai kuria ka raidiuk, daong ka 3 urang anek nao mbang bac. Min, tapi labaih sa thun blaoh, harak khin blei ndap nda di kongty trun rilo, harei ngak harei padeih. Jien mek tame di dua diuk pasang trun daok 11 trieu dong sa bilan. Saai Phan Ngọc Tiên khan lac: “Tuk dahlau deih, page daok hu nao mbang panan di gah langiu, urak ini ye mbang lisei laar, mì hadang blaoh nao ngak. Dom bilan ini ngak mbang kan kandah, hu tuk dahlak payua jien mai palei ka anek mbang bac, jeng hu tuk oh hu jieng payua. Urak ini di palei hu 2 urang anek daok nao bac, yau nan ye raidiuk oh ginup. Dahlak caong maong dom Cty hu ralo bruk gilac veik yau yaok harei, bruk ngak hu tani tanat mada mai mang anak”

Raidiuk daok di atah palei njauk sangka biak rilo bruk, njauk blei rilo, dalam tuk urang ngak kong lac njauk lahik bruk ngak, oh hu jien mek tame, kan kandah biak rilo. Rilo urang njauk nao masaiy jien mbang laba glaong piah sangka ka raidiuk, tuk halei jeng haduh hatai tuk dom urang brei masaiy mai puac, dok taong paoh, ndok saiy.

Thau cambaih ka dom kan kandah di urang ngak, rilo ngak mbang hu gam klah raba kan kandah haong urang ngak meng rilo jalan ngak, yau ye rik tame yaok phun jien mek tame piah blei pandap panda pandar yaok harei piah alin ka urang ngak; jak ba yaok urang sa hatung hatain haong gauk ngan haong hatai “anit ranam, jumpataom gauk, daong ba gauk”, daong ka dom urang njauk ruak kik, dom urang njauk bala… rilo doanh nghiep daok pambuak haong gilang paraik piah ka urang ngak hu masaiy jien tui njauk adat hukum ngan haong jien laba lap.

Langiu di dom bruk daong ba di urang doanh nghiệp, Công đoàn dom pakat di Bình Dương daok pasang iek piah hu sarak sangka ka urang ngak, urang biak kan kandah meng phun jien di công đoàn saong dom phun jien hu jak ba meng gah karei. Sở Lao động-Thương binh saong Xã hội tỉnh jeng caik hatai ba rup samar drah ngak dom adat langyah ka bảo hiểm lahik bruk ngak, gam tui di nan jeng pambuak gauk yaih khan bruk ngak ka urang ngak njauk lahik bruk ngak. Ong Phạm Văn Tuyên, Phó yam ndok Sở Lao động-Thương binh saong Xã hội tỉnh brei thau lac, dalam klau bilan akaok thun, Bình Dương hu labaih 36.000 urang ngak njauk brei padeih harak pambuak gauk ngak oh hu mbang jien bilan, jaik 18.000 urang ngak tut angan tame bảo hiểm labik bruk ngak: “Tuk masa urang ngak mai ngak sarak bảo hiểm lahik bruk ngak, Sở meda taduan, langyah sarak ini biak samar drah di abih piah ka urang ngak hu sa paok jien daong ka bảo hiểm lahik bruk ngak dalam tukvak kan kandah. Kol dahlak jeng langyah, daong ba, duah bruk ngak bahrau ka urang ngak di mangaok cơ sở dữ liệu bruk ngak daok saoh; langyah, daong ba bac bruk ngak piah salih bruk ngak ka urang ngak”.

Urak ini rilo po sang pah daok di Bình Dương hu patrun jien pah bilik daok meng 20-40%, kaduan veik tukvak kak jien pah bilik daok ka urang ngak piah trun manieng dom bruk haduh hatai. Rilo bo sang brei pah daok jak ba dom urang ngak pahla blei brah, pandap panda pandar yaok harei alin ka dom urang ngak daok sang trọ gaok kan kandah. Bruk sangka klah raba, daong ba gauk dalam tuk kan kandah hu ngak bui sambai hatai urang ngak kan kathaot dalam tuk kan daman. Bruk ngak nan mada brei prein pachreih ba piah ka dom urang ngak kham marat pambuak gam haong doanh nghiep yam tapa kan kandah masa ini./