Labaih sa adit ini mai, diuk pasang ong Võ Văn Cao, daok di tổ 10, palei Bồng Lai, xã Hiệp Thạnh, huyện Đức Trọng, tỉnh Lâm Đồng mbang oh hu, ndih oh var, nduac grauk labik piah duah jalan taong ruak ka tapon limo. Langiu di 4 drei limo ia tasau daok matain jeng daok khang kadang, abih tih 96 drei limo ia tasau daok veik di sang ong jeng mboh lavang lavaih, aih traoh tabiak darah, dalam nan hu 2 drei metai. Ong Võ Văn Cao brei thau, dom drei limo njauk ruak jeng bahrau klauk jru vaccine pacang caga ruak laka ndaih baoh dahlau di nan: “Dahlak brei klauk vaccine ka abih 96 drei, tok daok 4 drei jaik manek oh klauk. Urak ini 10 drei aih traoh, 2 drei metai paje. Dom drei mbang biak takik, dom drei karei mboh glaih glar, dahlak biak haduh hatai yau daok angaok apui. Urak ini yaok harei dahlak jeng ba jru tame ka tapon limo, praong sit hagait jeng brei mbang jru abih. Jru jeng kayua drei eng drei nao blei di gah langiu, daok jru pabak brei ye bahrau hu di harei kabroi, min tok hu janih C-gluco min”.

Sang amuk Huỳnh Thị Kim Phượng, daok pak palei Lạc Nghiệp, xã Tu Tra, huyện Đơn Dương jeng hu 76 drei limo ia tasau njauk ruak, 2 drei metai blaoh. Bruk ini nyu rahtabiak hadei di dom harei tuk tapon limo klauk jru vaccine pacang caga ruak laka ndaih baoh. Meng di tuk mboh bruk oh siam di tapon limo, sang amuk hu ieu bac si thú y mai taong ruak min mboh oh siam hagait: “Tuk klauk vaccine blaoh ye limo klak mbang, abih tapon drei halei jeng mboh pandiak. Hu drei aih traoh tabiak darah, hu drei aih traoh tabiak ia jhuk yau gluh. 2 drei metai blaoh. Palei di drei hu yaok piluh baoh sang deih yau nan, min hu 8 sang hu limo oh klauk vaccine. 8 sang ini limo oh njauk hagait, daok dom sang hu limo klauk jru ye jeng gaok bruk yau gauk ini”.

Vaccine pacang ruak laka ndaih baoh hu klauk ka tapon limo ia tasau di 2 huyện Đơn Dương saong Đức Trọng lac kayua Công ty Cổ phần jru thú y Trung ương NAVETCO (jabat di tỉnh Bình Dương) njauk thầu saong pabak brei. Bruk klauk jru hu peih tabiak meng harei 22 tal harei 31/7/2024, ngan haong abih tih labaih 10.000 mbang klauk. Meng di tuk rahtabiak bruk ini di tapon limo ia tasauk ngak ka limo njauk ruak saong metai, tỉnh Lâm Đồng hu brei padeih bruk klauk jru vaccine.

Tui ong Nguyễn Văn Long, Akaok Cục Thú y, taduan hu khau tin limo ia tasau pak Lâm Đồng ruak saong metai, bier harei 7/8, urang pan akaok Mintri Ngak nong saong patagok palei pala hu pato tacei brei padang kapul ngak bruk nao pasang iek, peih ngak dom jalan pacang caga jit ruak. Ong Nguyễn Văn Long, Akaok Cục Thú y brei thau:“Kol dahlak hu ieu pataom dom bilik dut iek siam abih di gah thú y Việt Nam, dom urang ilamo naih joi abih peih bruk mek mau piah duah thau makna  ba tal bruk tapon limo njauk ruak, metai di tỉnh Lâm Đồng. Mintri jeng hu pato tacei biak cambaih laih dom jalan pacang jit, jalan khik ramik piah patrun dom drei limo njauk ruak, patakik di abih dom drei limo metai”.

Gam haong bruk daong di Mintri Ngak nong saong patagok palei pala, tỉnh Lâm Đồng jeng hu pataom abih prein tame taong ruak ka tapon limo njauk ruak piah daong ka urang ngak nong trun biar di abih dom khat lahik. Yaom lac yau nan, min dom drei limo tamuh ruak saong metai jeng daok tagok. Tal abih harei 10/8, tỉnh Lâm Đồng hu mboh jaik 4.500 drei limo labuh ruak saong 193 drei metai, tagok jaik 600 drei limo ruak saong 21 drei limo metai dut saong sa harei dahlau di nan. Gam haong bruk pacang caga jit ruak, dom gah chuc nang daok duah thau makna ba tal ruak di tapon limo ia tasauk tỉnh Lâm Đồng./.