Bù Linh, xã Lộc Phú lac palei hu urang bangsa takik daok biak rilo, raidiuk mikva daok rilo kan kandah. Ong Điểu Khơ, urang hu angan je di palei Bù Linh brei thau: dahlau daih, mikva dalam palei rilo meng lac sang kan kathaot, jalan nao mai biak kan kandah. Meng hu karja sangka buh jien ngak jalan nhựa, bê tông xi măng, ngak sang ilamu, sang anit ranam, daong brei limo, pabe pajaih, palagaih ka mikva hu mesraiy jien yaom laba lap, palei Bù Linh harei ini salih karei biak rilo.

Lac labik puac abih di huyện Lộc Ninh mek hu angan palei pala bahrau, dalam thun 2023, xã Lộc Phú hu parabha brei labaih 20 tỷ đồng padang ngak jalan mbak, hạ tầng. Urak ini palei ngak hu blaoh taong abih 19 tiêu chí palei pala bahrau. Ong Trần Văn Tiến, Phaok akaok UBND xã Lộc Phú brei thau, tabiak meng labik lac xã di bhum biak kan kandah, Lộc Phú gaok biak rilo kan kandah dalam tuk padang ngak palei pala bahrau. Prein khang meng danak dak bruk ngak negar padang ngak palei pala bahrau tagok hu kein laba, hu daong ngak brei salih karei mbaok mata bhum palei pala, bhum bangsa takik di palei.

Kinh tế - xã hội hu dom salih bahrau siam, rilo bruk, rilo hạ tầng hu buh jien tame ngak, dalam nan hu dom thiết chế văn hóa hu ngak pasiam veik meng padang ngak palei pala bahrau paglaong, xã Lộc Hiệp daok dalam tuk pasiam dom tiêu chí gah mblang bein, pasiam darak pasar, sang bac piah yam tal jaik jang haong bruk lac jeng đô thị janih 5 di thun 2025. Ong Nguyễn Trọng Dụng daok di palei Hiệp Quyết khan lac: urak ini taong abih jalan  nao mai hu tuh bê tông, raidiuk bhap bini dak harei dak cakrok. Dom sang ilamu mek hu chuẩn ngak mblang me-in pasram pahat ka bol bhap rahra.

Meng bruk ba tabiak jalan di gah chức năng, gam haong cakrok dom janih phun pala, athur raong meng kan, rahra thau salih meng ngak nong yau meng kan tapa patagok kinh tế ngak nong brei kein laba glaong.

Pagap yau sang ong Lê Văn Giang daok di palei Hiệp Thành, xã Lộc Hiệp. Mboh hu prein khang di darak pasar ikan cảnh, ong Giang buh jien tabiak ngak dom danao raong praong jaik 3.000m2, raong, pabam dom janih ikan hu darak pasar takre. Urak ini, meng labaih 50 janih ikan raong rilo, sang ong laba hu labaih 400 triệu yaok thun.

Amuk Lê Thị Ánh Tuyết, Phaok akaok UBND huyện Lộc Ninh khan lac, huyện hu tabiak dom sarak lagaih gam haong tui iek gam gam piah paglaong chất lượng, siam lagaih bruk padang ngak palei pala bahrau. Salih bahrau siam mekre, cambaih laih hadei di 12 thun peih ngak danak dak bruk ngak negar padang ngak palei pala bahrau lac dom jalan palei di bhum atah bayah, bhum bangsa takik hu hadah, hijao, hacih, mekre; rilo danak dak hu daong cakrok KTXH, patrun kan kathaot khang kajap. Anak tal, huyện pataom tame padang ngak dom labik dân cư kiểu mẫu, xã palei pala bahrau paglaong, patui bruk buh jien ka dom sang bac, bilai y tế piah paglaong chất lượng pato pakai menuac ngak, iek glang prein yava bhap bini.

Mbaok mata palei pala, labik An toàn khu, bhum biak kan kandah di huyện tapen negar Lộc Ninh hu dom salih bahrau cambaih laih, bruk peih ngak saong ngak hu dom tiêu chí kan ngak dalam padang ngak palei pala bahrau saong palei pala bahrau paglaong hu ngak tui jalan samu gauk suai lavik. Gam haong nan, bruk kham merat ngak ka nyu salah, pabak dom tiêu chí huyện palei pala bahrau daok hu kham merat peih ngak, daok ngak jeng prein khang daong paglaong raidiuk, bruk ngak mbang, ngak huak di rahra./.