Labik kinh tế pabah mbang negar Bình Hiệp (ban sit Kiến Tường, tỉnh Long An) lac labik pambuak pagam bruk pablei salih nao mai haong dom bhum sit kraong Mê Kông di Campuchia haong TP.HCM saong bhum taneran kraong Cửu Long. Min rilo thun tapa bruk KTXH di labik ini jeng oh ka tagok glaong hu yau hatai caong khin. Yaom lac hu taong yaom lac hu rilo prein khang, mbuan lagaih min hadei di tuk nao duah thau ye jaik abih dom doanh nghiệp jeng “tabiak nao oh veik mai”. Sa dalam dom makna praong lac jalan roya 62 oh ka lagaih ka bruk pajeng ba pablei salih nao mai, oh ka pabak hu ka bruk ngak mbang praong, ngak patrun prein meriak gauk gah blei tame, pablei tabiak negar langiu saong kein laba bruk ngak di Pabah mbang negar pakat dunya Bình Hiệp, Long An.

Ong Nguyễn Minh Tùng, Phaok akaok Chi cục Hải quan Bình Hiệp brei thau, hu 24 doanh nghiệp bhian mai tal ini ngak adat hải quan. Dom pandap panda tame tabiak tapa pabah mbang negar pakat dunya Bình Hiệp oh ka hu rilo, lac kayua jalan mbak. Jalan roya 62 sit, urang peih radaih container huac ginuh urang ba tal bala, oh ka pabak hu rilo radaih container saong oh ka hu labik padeih, pataok cang ngak harak gar hải quan saong trun, tagok pandap. Ong Tùng caong lac: “Dahlau di abih lac jalan roya 62 brei praong, laneing piah pandap panda meng pabah lamnge Cát lái - TP.HCM saong dom jalan pambuak meng Nam - Bắc mai pabah mbang negar. Ka dua lac brei hu labik pataok radaih piah cang ngak harak gar, daok urak ini padeih pataok di mangaok jalan roya 62, njauk cảnh sát giao thông ngak biên bản nan ye doanh nghiệp oh bui hatian”. 

Jeng hu jalan sahneng yau nan, Akaok UB bhap bini ban sit Kiến Tường (Long An), Nguyễn Văn Vũ brei thau: kadha praong ngak brei kinh tế mậu dịch labik taphia negar suai cakrok lac kayua jalan roya 62 pambuak haong jalan roya 1A nao tal pabah mbang negar pakat dunya Bình Hiệp atah labaih 66 km, mbaok jalan sit, mbiah mbaoh, lac paga pacang bruk dui pachreih doanh nghiệp mai buh jien tame ngak mbang di labik kinh tế cửa khẩu, dom đô thị pasak di ban sit Kiến Tường saong dom huyện taphia negar.

Piah patagok kinh tế mậu dịch bhum taphia negar Long An, tinh pok panuac likau Trung ương samar buh jien tame peih praong, ngak pasiam jalan roya N2, jalan roya 62, lang talaih tavak tavaiy ka taneh riya, patrun patakik harak gar ka nyu lagaih haong adat hukum.

Ong Nguyễn Văn Vũ, akaok UB bhap bini ban sit Kiến Tường brei thau, ban sit hu caga dom jalan piah taduan raok, tuk ngak salah bruk peih praong, pasiam jalan roya 62, meda quy hoạch dom pasak pablei salih, labik dân cư bahrau saong buh jien tame ngak hạ tầng jalan mbak: “Labik kinh tế pabah mbang negar Long An oh ka tagok khang lac kayua labik ini. Jalan ngak anak tal lac pasiam dom tavak tavaiy nan, hu dom bruk lac di Trung ương, hu dom bruk lac di palei, di tỉnh. Bruk peih praong, pasiam jalan roya 62 ye njauk lac bruk di Trung ương. Urak ini bruk lang talaih tavak tavaiy gah sarak pambuak tal taneh riya, adat hukum padang ngak… meyah hu talaih dom kan kandah ini, dahlak jia lac kinh tế biên mậu meda cakrok patagok”.

Urak ini, dom jalan roya yau ye: 62, N1, N2 daok lac jalan nao mai praong di bhum taphia negar Long An. Dalam nan, jalan roya 62 lac jalan praong abih, lac jalan ka bruk patagok kayua nao tapa jaik abih dom puk palei dalam bhum taphia negar, pambuak haong tỉnh Tiền Giang, Đồng Tháp saong taneh ia Campuchia. Ong Lê Thanh Đông, Chủ tịch huyện Tân Thạnh, tỉnh Long An caong lac: “Bruk urak ini, lac dom jalan daok mbaih mbaoh, daok khut trak, oh salamat tuk nao mai di bhap bini. Abih di nyu lac urak ini biak kan dalam cakrok patagok kinh tế puk palei, kayua dom urang buh jien tame ngak mbang mai ini mboh jalan mbak kan kandah. Meng jalan ngak di anak tal, meyah hu peih praong jalan roya 62 meda daong patagok biak praong ka bhum Đồng Tháp Mười, dalam nan hu huyện Tân Thạnh”.

Urak ini, jalan roya 62 hu Mintri jalan mbak pajeng ba pok tagok Quốc hội vak phun jien labaih 2.257 tỷ đồng piah peih praong, ngak pasiam saong tui kuhria hu peih bruk padang ngak di thun 2024. Bruk kinh tế bhum tapen negar Long An hu siam tagok meyah dom bruk nao mai di jalan roya 62 hu langyah. Daok urak ini, bhap bini saong doanh nghiệp jeng daok nao mai di mangaok dom labik jalan biak kan kandah, mbuan hu bala. Thei jeng daok caong khin hu sa jalan bahrau, praong, siam jang ./.