Urang ngak nong urak ini hu jien mek tame tani tanat jang

Harei halei jeng yau nan, amuk Mai Thị Lượm, daok di ấp 4, xã Thạnh Lợi, huyện Bến Lức haong urang ngak pah trun bein sangka rau má. Meng 1hecta mateh taneh pala kruac aik, baoh drum, hu tuk kan pablei hu, sang amuk Lượm haong dom urang dalam HTX Thạnh Hòa pala pabak rau má VietGap tui panuac kakei di Cty cổ phần Pachrieh bruk pablei salih CCV Group, sa kapul daok buh jien tame pala rau má di pak ini. Pala hu tanut chuan ye njauk sangka, pruh ia tani tanat jang, min taong abih dom rau má jeng hu blei veik abih. Meng nan, jien mek tame di amuk Lượm saong rilo urang ngak nong yaok harei tagok tal dom triệu đồng, bruk raidiuk jeng hu trun manieng dom kan kandah.

HTX Dịch vụ ngak nong Thạnh Hòa, huyện Bến Lức pambuak gauk pala rau má ka Cty CCV di mangaok taneh praong 25 ha, saong pala hu hadom jeng hu blei veik abih. HTX pablei tabiak meng 15 tal 20 tấn rau má sa harei haong yaom 24.000 tal 25.000 đồng sa kg. Yaok thun, sang bein paik hu takik di nyu meng 3 tal 4 mbang, yaok mbang laba hu labaih 40 triệu đồng sa ha. Công ty CCV peih praong bruk pala rau má VietGap di huyện Bến Lức tagok tal 70 ha saong huyện Đức Huệ 10,8 ha. Bhum pala rau má ini daok ba bruk ngak tani tanat ka 120 urang. Pala rau má VietGap hu daong ka urang nong hu jalan nao bahrau dalam bruk pala drak, pandar taneh hu kein laba, bo daok hu daong ka mikva hu bruk hit ngak mbang, pasiam raidiuk. Ong Phan Văn Út, daok di ấp 1, xã Bình Hòa Nam, huyện Đức Huệ kaoh phun rau má mbang pah ngan haong jien mek tame meng 9 tal 10 triệu đồng yaok bilan, khan lac:“Sang jeng hu pala, min jeng hu ngak ka Cty hu dom thun paje. Urak ini harei halei jeng hu bruk piah ngak, meng nan raidiuk di mikva jeng hu tani tanat. Mikva daok vil val ini hu raidiuk tani tanat lac meng hu Cty rau má ini”

Bến Lức hu 2 janih phun pala praong lac padai saong phun kruac aik. Hadei di bilan pandiak bhang thun 2019-2020, labaih 30% taneh pala lac jaik 2.000 ha, dalam nan hu phun kruac aik njauk kan kandah. Dom urang nong hu salih tapa pala dom janih phun karei. Phun rau má jeng janih phun meda cakrok di anak tal, peih jalan tabiak bahrau ka kinh tế- xã hội di pak ini. Urang nong meng pala tui jalan meng kan, buh khak tui ilamo, urak ini hu salih abih jalan  ngak, pala njam patam, baoh kayau siam salamat, ba mai kein laba glaong.

Tui ong Mai Văn Tuấn, Yam ndoc sản xuất labik Long An, Công ty CP Pachreih bruk pablei salih CCV Group, kapul peih ngak danak dak pala phun rau má VietGAP di dalam tỉnh Long An meng di bilan 8/2020, danak dak pala tui jalan gam pambuak gauk blei veik abih, gam pah taneh di urang nong piah pala. “Sa  ha mek hu 8 tấn yaok mbang paik. Sa thun meda paik hu tal 10 mbang. Tuk halei mikva jeng hu bruk piah ngak, hu njam piah paik. Khol dahlak biak caong dalam thun ini meda padang hu bruk halain hatain pala drak, hadei di nan ba rau má ngak jeng pandap tabung pablei tabiak darak pasa negar langiu”.

Bruk pala phun rau má VietGap oh lac ba mai kein laba bo bruk praong jang lac ngak brei salih bahrau biak siam jalan saneng saong jalan ngak di urang nong, daong ka urang nong thau lac, dalam bruk ngak mbang pablei salih ye chất lượng pandap meng lac bruk praong di abih piah khik ramik saong cak rok patagok angan je./.

Urang lang: Thu Thao – 21/04