Thanh long di Long An daok jhul khang bruk pala tui chuẩn VietGAP, GlobalGAP, padang mã labik pala, cih vak angan je

  Hadei di labaih 2 thun tui ngak, ong Trần Văn Thanh daok di xã Quê Mỹ Thạnh, huyện Tân Trụ, tỉnh Long An hu salih taong abih 4ha thanh long phổ thông tapa thanh long hữu cơ. Meng hu yau nan, tukvak jaik di ini, tuk rilo urang nong gaok kan kandah dalam bruk pablei tabiak ye baoh thanh long di ong jeng nao tame hu dalam darak pasar kan tame yau: Nhật Bản, Hàn Quốc, Pháp, Mỹ... Tui ong Thanh, urang nong jeng thau pala thanh long hữu cơ meda mbuan si duah hu darak pasa bahrau min piah ngak tui oh lac mbuan. Urak ini, yaom khak hữu cơ vi sinh, jru khik caga phun pala jeng tagok glaong, hàm lượng jru hu khan brei thau jeng oh ka njauk abih saong tukvak di nyu jeng atah jang kayua yau nan ye meyah oh caik hatai ye tal tuk paik baoh thanh long meda oh mek hu tiêu chuẩn. 

Ong Nguyễn Vạn Thành, Akaok HTX Vạn Thành, huyện Châu Thành, sa HTX urak ini hu 100 ha thanh long hữu cơ jeng mboh lac dom thong tin di dom janih pandap panda pacang khik phun pala oh ka njauk daok ngak kan kandah ka urang nong: “Kan kandah di abih nan lac tukvak padeih pandar jru, oh daok labaih kandaon jru pacang khik phun pala angaok baoh thanh long, gaok tuk mai labik ngak jru oh cih vak njauk tuk vak brei padeih pandar jru. Labik ngak tabiak jru pacang khik phun pala cih vak 15 harei ye par abih jru min biak di nyu tal 20 harei meng abih. Drei caik baoh di phun veik dom harei ye jeng abih, min baoh kayau bo caik veik angaok phun dom harei ye bruk pablei tabiak negar langiu jeng gaok kan kandah”.

Yaom pablei jeng lac sa kan kandah tra di urang ngak thanh long hữu cơ. Ong Lê Văn Chín Nhỏ, daok di xã Long Trì, huyện Châu Thành, tỉnh Long An pala 1.900 got thanh long hữu cơ hatai bhong labaih 4 thun ini mai. Bein thanh long di ong tamuh siam, hu baoh prong, tathak bhong, mekre. Urak ini baoh thanh long hữu cơ di ong Chín Nhỏ hu doanh nghiệp blei veik abih piah pablei tabiak negar langiu ngan haong yaom meng 15.000 – 25.000 đồng/kg. Yaom pablei tabiak yau nan tok ginup jien buh tabiak ngak, oh hu laba min ong Chín Nhỏ jeng khang hatai kak kajap haong thanh long hữu cơ piah duah jalan nao bahrau saong jeng lac tui samu haong jalan ngak nong khang kajap: “2 thun dahlau diah, jien mek tame meng thanh long lac biak siam, rilo mbang mek hu 7-8 rituh triệu atau 1 tỷ. Min thun ini, khat lahik abih dom rituh paje, min yaom lac yau habar jeng oh brei pandar khak pandaih panda hu. Pandar khak hữu cơ nyu brei baoh siam jang, blaoh daok khik ka môi trường oh njauk nerak”.

  Dalam huyện Châu Thành urak ini hu labaih 9.100 ha thanh long bo bahrau hu 4 baoh sang pala thanh long hữu cơ ngan haong 2,5 ha. Hu dom urang nong oh ka njauk hatai haong yaom tui harak pambuak bruk blei veik abih di kong ty nan ye sa binah prong thanh long hữu cơ daok hu pablei di gah langiu.   

Tỉnh Long An, urak ini hu jaik 12.000 ha thanh long, dalam nan hu jaik  2.100 ha pala tui chuẩn VietGAP. Urak ini darak pasar janih baoh kayau ini daok gaok bruk meriak gauk biak catang, meyah caong khin pablei tabiak hu ye chất lượng baoh njauk siam jang saong thanh long hữu cơ nan lac jalan njauk nao tui. Gah chức năng saong dom puk palei hu mblang taneh thanh long meda pachreih ba, daong ka urang nong salih jalan ngak, piah pabak hu dom kadha ba tabiak di dom darak pasar kan tame angaok dunya, daong peih prong darak pasar piah pablei pandap.  

Ong Nguyễn Tuấn Thanh, Yam ndok Sở Công thương tỉnh Long An ndom lac, ramik veik jalan ngak, paglaong chất lượng baoh thanh long nan lac jalan piah cak rok patagok khang kajap. Piah ngak hu bruk ini, dom puk palei njauk duah thau ka nyu cambaih laih mblang taneh pala, manuac urang pala thanh long, meng nan patui veik bruk pathau khan, jak ba, tacei pato urang nong paglaong chất lượng: “Dahlau diah khaol drei bhian ndom lac Trung Quốc nan lac darak pasar mbuan di abih ye urak ini jeng daok caong khin ka chất lượng glaong jang. Tui nan tỉnh Long An daok ba tabiak jalan paglaong chất lượng piah pabak hatai caong khin di darak pasar ini. Sa gah tra pamaong tal bruk duh ka darak pasar dalam taneh aia, saong abih di nyu lac duh ka darak pasar dom negar cakrok patagok”.

Pamaong tal bruk pala, ngak khang kajap phun thanh long oh njauk lac tok padang dom labik pala prong, caik hatai tal sản lượng bo daok njauk sangka tal chất lượng. Piah ka baoh thanh long hu labik dang angaok darak pasar  saong ngak njauk hatai dom gah biak catang, kan tame... anak meta tỉnh Long An oh peih prong mblang taneh pala thanh long bo daok pataom tame daong ka urang nong salih karei, pamaong tal phun thanh long hữu cơ, paglaong chất lượng pandap panda meng thanh long./.

Urang lang: Jasi – 11/05