Prein khang du lich di tỉnh Long An hu biak rilo janih, langiu di sinh thái bhum Đồng Tháp Mười, Long An daok hu paha “chùa Nổi” (huyện Vĩnh Hưng), paha Tôn Thạnh, Sang ratuh mbaik gheng, Đồn Rạch Cát (huyện Cần Đước), labik inem mek Vàm Nhựt Tảo (huyện Tân Trụ), sang kubo Nguyễn Huỳnh Đức (ban Tân An)... Tukvak tapa, dom labik nao tal daok hu caik hatai buh jien tame ngak, yau ye: Palei angaok kraong Tân Lập; Labik jru tavao – Mblang hamu atah; Labik phức hợp Happyland… Min, tal urak ini bahrau lac labik padeih takai oh ka lac labik labik ravang ma-in dui pachreih tuai damuai.

Pagap yau labik ravang me-in sinh thái Palei angaok kraong Tân Lập, langiu dom tour rivang iek gam haong mbang huak, labik ini bahrau hu peih dom bruk: cắm trại, vah ikan, rilo labik check-in bahrau, danak dak pablei harak vé combo rivang iek saong mbang buffet jala pandiak haong dom pandap mbang di bhum kraong ia. Min tuai mai tal ini ka oh rilo. Dom labik ravang ma-in karei di Long An jeng daok dalam bruk dreih yau nan.

Rilo menuac ndom lac, urak ini pandap du lịch di Long An hu rilo min ka oh pachreih urang nan ye anak tal, tỉnh brei pilih ruah tabiak dom labik ravang ma-in hu angan piah buh jien tame ngak ka nyu siam lagaih jang. Abih di nyu nan lac, tinh ba tabiak jalan ngak du lich hu ilamo, oh ngak mateh dhi, tinh brei padang ngak dom pandap du lich pakat glaong saong hu ilamo jang.

Tui ong Nguyễn Văn Hiển, Yam ndok Labik du lịch sinh thái Chavi – Akaok Kapul Du lịch Long An, kan kandah praong abih piah cak rok patagok du lịch urak ini jeng lac jalan mbak. Hu biak rilo labik du lịch hu taong yaom glaong min ka oh pambuak hu haong gauk. Ong Hiển ndom lac: “Urak ini tal labik du lịch jalan mbak di Long An jeng daok rilo labik ka oh siam. Hu labik nao tal hu tatua oh brei radaih praong nao tapa, nan ye radaih du lịch 45 kik ka oh nao tal labik hu. Kayua yau nan ye, yaom lac pambuak haong rilo labik peih bruk ravang me-in, min radaih oh nao tal hu nan ye urang oh khin ba kapul mai ravang ma-in”.

Tukvak tapa, Long An tuk halei jeng kham marat ba du lịch jeng gah kinh tế praong di tỉnh. Min anak mata mboh lac, du lịch di Long An jeng ka oh pabak hu hatai caong di tuai damuai; jeng daok tavak tavaiy dalam bruk dui pachreih, yaih khan du lịch, ka oh hu rilo pandap du lịch angan je...

Piah ka du lịch Long An cak rok khang kajap dalam tukvak anak tal, rilo urang ilamo caong Long An buh jien tame padang ngak pandap du lịch hu prein khang, yau ye: du lịch sinh thái, padeih padei, du lịch pambuak haong ilamo, inem krung, pandap mbang; njauk buh jien tame ngak dom bruk ba drei  paglaong ka tuai damuai; patagok bruk pato pakai ka urang ngak hu ilamo glaong piah pabak hu hatai caong di tuai damuai; padang ngak jalan mbak pambuak haong dom labik du lịch, dom pasak đô thị...

Tui Yam ndok Sở Ilamo, Thể thao saong Du lịch Long An Nguyễn Thành Thanh, Long An njauk pamaong tal bruk cak rok patagok du lịch ngak kong, pambuak haong dom labik ngak kong piah peih ngak danak dak ravang ma-in ba drei tame, pabak ka dom chuyên gia negar langiu saong urang ngak di dom labik ngak kong gah barak, gah Tây Nam TP.HCM saong tỉnh Long An: “Kan kandah praong abih di urak ini jeng lac bruk tuai ndih veik saong dom labik lữ hành ka oh cak rok rilo, kol dahlak meda kham marat ba tame quy hoạch patagok kinh tế-xã hội Long An. Tỉnh ba tabiak jalan caong lac patagok du lịch, rik daong yaih khan thaot binguk du lịch piah duui pachreih urang buh jien tame ngak mbang saong cak rok patagok hu gah dịch vụ ini”.

Gam haong ilamo, taneh riya, kraong ia, Long An daok gaok rilo kan kandah tuk pambuak haong dom tinh ban di bhum taneran kraong Cửu Long padang ngak tour, jalan karei, plaih yau gauk haong dom tinh, ban jaik taphia saong hu ilamo karei di drei. Gam haong nan, patagok bruk pambuak gauk saong du lịch TPHCM piah duah jalan raok tuai dalam taneh ia saong dunya. Bruk dui pachreih meng prein khang pabak ka hatai caong pak di labik jeng lac dom jalan nao hu siam lagaih, hu caong lac meda peih tabiak jalan tani tanat ka du lịch Long An dalam tukvak anak tal./.