Sang khik uranaih, daong ka dom amaik ame lac urang ngak sanang hatai piah ngak bruk

Labaih 4 thun tapa, sa-ai Trần Thị Diễm My, urang ngak di dhar Cty TNHH Pouyuen Việt Nam saong sang di drei hu daok dalam labik daok di urang ngak dalam labik ngak kong Long Hậu, huyện Cần Giuộc. Meng jien bilan takik, oh ka hu jien blei sang, nan ye hu daok dalam labik daok di urang ngak, nyu daong ka sa-ai sahanang hatai ngak bruk. Meng nan, luac dalam 4 thun tapa, sang sa-ai patak pataom hu rilo jien pandar cai. Di labik ngak kong ini, hu 4 talei sang daok, yaok talei sang glaong 5 tal, hu abih tih 600 bilik hu ngak gheih mekre brei ka urang ngak saong chuyên gia daok. Gam haong nan, labik daok ini, daok hu rilo kein lagaih duh ka raidiuk di urang ngak. Sa-ai Trần Thị Diễm My khan lac: “Biak di nyu, urang ngak caong hu mbuan lagaih piah kak kajap haong bruk ngak. dalam tỉnh Long An daok kurang rilo urang ngak. Abih di nyu lac urang ngak daok di dom tỉnh miền Tây meda dui pachreih urang mai ini ngak bruk, min brei hu bruk daong sang daok, daong jien pah sang atau daong jien mbang piah drei tagok hu rilo urang ngak”

Long An urak ini hu 16 labik ngak kong min bahrau hu labik ngak kong Long Hậu, huyện Cần Giuộc padang hu labik daok ka urang ngak, hu abih tih 600 bilik brei ka 2.500 urang saong labik sang daok ka urang ngak di Cty Cổ phần Dệt Đông Quang, huyện Đức Hòa hu labaih 500 bilik brei ka 1.700 urang, duh ka labaih 80% urang ngak lac bhap bini bangsa Khmer.

Tui bruk sangka daong ka urang ngak hu tani tanat labik daok, urak ini, UBND tỉnh Long An hu pasang iek, brei buh jien tame ngak saong daok ba tabiak gilac 13 danak dak sang daok ka urang ngak di huyện Bến Lức, Đức Hòa saong dom puk palei karei. Ong Ngô Thành Lập, Yam ndok nhân sự Cty TNHH giày Ching Luh Việt Nam, labik ngak kong Thuận Đạo, huyện Bến Lức brei thau: doanh nghiệp hu labaih 21.000 urang ngak.  Nan ye bruk sang daok ka urang ngak lac biak praong, bruk karja tỉnh Long An daok sangka tal raidiuk di urang ngak, meda daong ka doanh nghiệp tani tanat hu menuac ngak, padang veik bruk ngak   hu siam lagaih jang dalam tukvak anak tal. “Urak ini kol dahlak daok pasang iek bruk padang ngak sang daok, min kayua urang ngak biak rilo nan ye anak meta Cty oh ka ba tabiak hu bruk puac di abih. Nan ye biak caong khin tỉnh Long An saong huyện Bến Lức daok hu dom danak dak ka sang daok xã hội, dom danak dak daong ka urang ngak. Cty ka oh ngak hu sa danak dak min meda rik daong tui panuac ieu di tỉnh”

Tui panuac khan di UBND tỉnh Long An, tal thun 2030, tỉnh meda padang ngak hu 1 triệu baoh sang daok xã hội ka urang ngak gaok kan kandah ka sang daok. Tapa nan, langyah hu bruk sang daok ka jaik abih dom urang ngak caong hu sang daok di dom labik, dom cụm công nghiệp. Anak meta dalam 3 thun tal, brei pataom tame ngak ka pahu 500.000 baoh sang, pabak bruk cakrok KTXH saong an sinh ka urang ngak. Ong Nguyễn Văn Út, akaok UB bhap bini tỉnh Long An, lac: “Dom adei sa-ai urang ngak daok gaok biak rilo kan kandah ka sang daok saong dom bruk karei karei dalam raidiuk, kol dahlak jeng daok hu dom jalan ngak suai lavik piah khik takai urang ngak. Anak tal, kol dahlak brei daong palagaih ka urang ngak, yau daong jien pah sang, padang ngak dom labik sang daok an sinh brei ka urang ngak daok veik suai lavik”

Tani tanat sang daok ka urang ngak hu maong lac bruk piah dui pachreih urang ngak, abih di nyu lac meuac ngak hu ilamu glaong, hu tangin gheih ngak duh ka bruk cakrok KTXH. Tapa nan, daong ka Long An daok khik hu labik dang akaok dalam bhum taneran kraong CL saong lac tỉnh cakrok glaong dalam bhum trọng điểm gah meraong. Meng hatai kham merat di Đảng bộ, Karja tỉnh Long An, brei mboh bruk peih ngak khang kadang di tỉnh dalam bruk pasiam veik bruk ngak mbang kinh tế hadei di jit praong./.

Urang lang: Mousa Phương – 13/06