Thun bac 2022- 2023, Sang bac Cao đẳng Long An palih ruah jaik 2.700 anek saih, sinh viên dom gah bruk ngak tui tanut chuan dunya, châu Á saong ASEAN. Tal tukvak ini, sang bac daok pato bruk ngak ka labaih 4.400 anek saih, sinh viên jaik abih lac urang dalam palei. Tui pasang iek di sang bac,  95% anek saih, sinh viên tuk bac tamat duah hu bruk ngak chip saong daok hu jalan tame bac dalam jang di dom taneh ia daok hu danak dak buh jien ngak mbang di Long An. Ong Lê Minh Tâm, Phaok Hiệu trưởng Sang bac Cao đẳng Long An brei thau: 

  “Long An hu rilo labik ngak kong, dom adei tuk bac tamat blaoh rilo meng hu ngak bruk di dom labik ngak kong di tỉnh, saong nao ngak bruk di Nhật Bản. Dahlau diah brei tagok Ban raya HCM bac saong pato sap blaoh meng tapa Nhật ngak bruk, min urak ini langiu di bac chuyen mon dom adei hu bac sap, ilamu Nhật pak di dalam tỉnh. Rilo adei tuk bac salah  dom danak dak, lac hu jalan lagiah piah tapa Nhật ngak bruk.”

Yaom lac hu lagaih duah bruk ngak yau nan min sang bac bruk ngak saong gah chức năng jeng brei hu dom jalan ngak piah pachreih anek saih bac bruk ngak. Dalam nan, bruk parabha anek saih meng akaok thun bac hu makna biak praong. Dom labik pato bruk ngak hu nao tal sang bac THCS, THPT piah tacei pato jalan palih ruah bruk ngak ka maik ame jeng yau anek saih hu tame  iek labik pato bruk ngak; brei thau ka sarak daong  tuk bac bruk ngak, lagaih padang bruk ngak, duah bruk ngak saong khaw tin ka darak urang ngak…Meng nan, tapa yaok thun, dom anek saih Long An palih ruah sang bac bruk ngak dak harei dak rilo. 

Piah paglong bruk parabha, pato bruk ngak ka anek saih, tukvak anak tal, gah pato megru brei pambuak bruk saong gah LĐTB saong  XH tỉnh jhul khang bruk tacei jalan, palih bruk bac ka anek saih THCS saong THPT tui jalan “ ba sang bac mai haong anek saih”. Dom sang bac brei peih bruk pato lý thuyết bruk ngak di dom sang bac THCS saong THPT piah anek saih  takik nao mai, pato ngak pak di labik bac bruk ngak. Long An kham merat tal thun 2025 hu takik abih 40% anek saih bac salah THCS meda tame bac bruk ngak.

Tỉnh Long An hu quy hoạch 37 labik ngak kong. Meng akok thun tal ini, dom labik ngak kong pachreih hu 65 danak dak buh jien tame ngak birau, dalam nan hu 27 danak dak buh jien tame meng negar langiu ( FDI) saong 38 danak dak dalam negar buh jien tame ngak ( DDI). Nan ye bruk khin hu urang ngak, abih di nyu lac urang ngak hu tangin gheih ngak daok dalam tỉnh  tukvak anak tal tuk halei jeng dang di tanut glong.

Piah pabak urang ngak hu siam lagaih ka D.N, dom labik pato bruk ngak di Long An daok salih meng bruk pato “ pabak” tapa “ tui hatai caong khin pabak”; parilo bruk pato, pato bruk  tui hatai caong di D.N…Tỉnh jeng meda hu sarak pachreih anek saih bac bruk ngak yau: miễn jien bac ka anek saih, sinh viên; daong ka urang bac  trung cấp tagok cao đẳng, đại học; brei jien bac, hu labik daok veik… Ong Nguyễn Đại Tánh, Phaok Yam ndoc Sở LĐTB saong XH tỉnh Long An lac:  

“Urak ini, Sở LĐTB saong XH tỉnh pataom  hu labaih 100 D.N khin palih ruah urang tame ngak, jeng pambuak bruk duah bruk ngak gam duah urang ngak. Tapa nan, peih tabiak ngak rilo sarak, tacei pato Pasak dịch vụ bruk ngak Long An pambuak saong pasak dịch vụ  bruk ngak  di 12 tỉnh di ĐBSCL piah pabak urang ngak ka D.N dalam tỉnh.”

Pabak ginup urang ngak bruk piah cak rok patagok kinh te XH suai lavik, pachreih urang buh jien tame ngak mbang di Long An  nan lac bruk ngak di taong abih gah chính trị. Long An daok jhul khang bruk cak rok patagok  urang ngak; pachreih urang naih joi tui jalan salih bahrau, merika gauk, brei palih ruah dahlau; ngak jeng labik ngak bruk siam piah urang naih gheih patagok hu ilamu di drei saong sahanang hatai ngak bruk suai lavik./.