Dom gah chức năng daok peih ngak rilo bruk pasang iek biak catang labik jalan tapen negar Long An

Long An hu jalan tapen negar haong Campuchia atah jaik 134 km, ngan haong klau pabah mbang negar, lac: Pabah mbang negar pakat dunya Bình Hiệp, ban sit Kiến Tường; Pabah mbang negar Mỹ Quý Tây, huyện Đức Huệ; Pabah mbang sit Hưng Điền A, huyện Tân Hưng saong jalan sit peih di Kênh 28. Dom Pabah mbang negar, jalan peih lac labik piah pablei salih pandap panda di urang pablei salih, di rahra daok di jalan tapen negar.

Dom harei jaik di ini, bruk pablei salih pandap panda di 2 gah daok di labik ini biak lagaih, bruk pasang iek pandap panda nao mai di pabah mbang negar jeng hu palagaih. Dom kapul chức năng paglaong bruk pasang iek, duah thau meng atah saong oh lac pasang iek pandap panda, pacang caga bruk pablei salih lậu bo daok pacang cakak bruk bhap bini tapa Campuchia tram manuk, pajeng manuk, jien saong ngoại tệ nao mai di pabah mbang negar. Ong Nguyễn Minh Tùng, Phó akaok Chi Cục Hải quan Cửa khẩu Bình Hiệp, tỉnh Long An ndem lac: “Tuk pabah mbang negar hu peih veik ye jeng hu parabha bruk ngak ka adei saai pasang iek yaok harei, tapa nan, bahrau blaoh ngan haong pandap panda quá cảnh, pandap payua tapa pabah mbang negar tuk pasang iek  pandap panda 4 mbang ye hu mboh 3 bruk ngak suan tuk pathau khan dom pandap panda oh njauk angan, oh njauk janih. Chi cục Hải quan jeng hu ba tabiak 3 harak taong phat.”.

Taeng di công an huyện Đức Huệ hu mboh 5 bruk pablei salih lau, pandap ja ba tapa jalan tapen negar. Dom gah chức năng pak ini daok peih ngak rilo bruk pasang iek biak catang labik jalan tapen negar Long An.  Thượng tá Trần Bình Trọng, Akaok Công an huyện Đức Huệ, tỉnh Long An brei thau lac, pagam pambak tame bruk an sinh xã hội di jalan tapen negar, kol pablei salih lậu nyu brei jien ka rahra oh hu bruk ngak tani tanat piah daong bruk ngak suan hukum di kol nyu. Anak bruk ini, langiu di bruk paglaong siam lagaih bruk pasang iek, duah thau, pacang caga kol par akaok dom jalan ngak suan, cakak klaoh dom bruk ngak suan di jalan tapen negar piah oh rahtabiak bruk dui ba bhap bini tame bruk ngak suan, ye di pak ini daok pataom tame langyah bruk an sinh piah ka mikva bhum tapen negar hadei di tuk njauk kan kandah di jit praong. Thượng tá Trần Bình Trọng brei thau: “Jalan ngak tani tanat di abih lac ba bruk ngak mbang duah jien, di huyện jeng hu paok an sinh xã hội piah daong ka bhap bini, huyện jeng jao brei kapul nyaom xã, abih di nyu nan lac công an chính quy mai xã jeng hu nao tal yaok sang ngak bruk, pachreih ba saong duah bruk ngak bahrau ka dom urang nan. Abih di nyu nan lac bruk pataom tame ngak brei salih jalan saneng saong bruk ngak di mikva dahlau daih”

Tui Bộ Chỉ huy Bộ đội Biên phòng tỉnh Long An, meng akaok thun tal ini, kapul ini hu pambuak bruk haong dom kapul hu pambuak tal, mboh hu 113 bruk ngak suan. Dalam nan, rilo abih jeng lac bruk pablei salih pakao lau ngan haong jaik 200.000 paok. Taphia di nan, bruk pablei salih lau phao patuh, alak negar langiu, pajeng ba radaih ô tô, radaih mac oh hu asal cambaih yaom abih tih labaih 3 tỷ đồng... Bộ đội Biên phòng tỉnh Long An daok pambuak bruk haong dom kapul karei khik ramik bruk pasang iek biak catang saong ba tabiak rilo jalan ngak piah pasang iek catang jalan tapen negar saong dom pabah mbang negar.

Trung tá Nguyễn Văn Nam, Chính trị viên Đồn Biên phòng Pabah mbang negar Bình Hiệp, ban sit Kiến Tường, tỉnh Long An, brei thau, bộ đội biên phòng daok pambuak bruk haong puk palei pathau khan, jak ba bhap bini oh ba tangin tame daong dom bruk ngak suan di jalan tapen negar, gam haong nan, daong ka dom baoh sang  kan kandah hu tani tanat raidiuk: “Meng di tuk akaok thun, urang par akaok UBND tỉnh jeng hu pato tacei peih ngak biak catang. Dalam nan hu gah biên phòng khol dahlak gam haong dom kapul karei daok pak ini ngak siam bruk pambuak gauk, taong yaom, kuhria mboh dahlau bruk saong thau cambaih bruk meng atah, nan ye hu mesuh pacang meng akaok, nan ye oh mboh tagok dut saong dom palei karei”

Meng di tuk peih veik taong abih dom pabah mbang negar, tỉnh Long An daok pataom tame bruk pathau khan, jak ba rahra, bhap bini haong gah chức năng ngak siam bruk pacang caga ma túy; pacang pablei salih lau, bleik saleik dalam pablei salih saong pandap ja. Gam haong nan, dom pakat, dom gah peih ngak rilo sarak an sinh piah ba bruk mbang duah jien saong duah bruk ngak hu tani tanat ka bhap bini kan kathaot daok di bhum tapen negar Long An./.

Urang lang: Thu Thao – 08/06