Tui ong Kang Myong Il, Tổng lãnh sự Hàn Quốc di TP.HCM, dalam dom kan kandah, tavak tavaiy bo Tổng lãnh sự hu mboh meng dom doanh nghiệp Hàn Quốc daok ngak bruk di Việt Nam, dalam nan hu di Long An, rilo meng lac bruk thuế saong harak adat. Dom doanh nghiệp Hàn Quốc caong khin dom paka dalam harak quy định di gah thuế nyu cambaih laih jang. Bruk ngak tui jalan thau ka quy định di adat hukum brei ngak ka nyu samu gauk, cambaih laih saong yau gauk. Bruk langyah bayar veik “thuế giá trị gia tăng” ka doanh nghiệp bhian suai lavik, dui atah jeng njauk ramik veik ka nyu siam.

Dreih yau nan, ong Inoue Koji, Akaok kapul doanh nghiệp Nhật Bản di Long An mboh lac, bruk kak je lac bruk praong njauk ngak di dom doanh nghiệp Nhật Bản. Min jeng hu dom bruk gaok njauk jalan sahneng, jalan mboh, thau oh yau gauk dalam dom hukum kak je.  Bruk tamuh tabiak dom kadha gah thuế ngak ka doanh nghiệp biak suh sah kayua nyu tamuh tabiak jien sahui langiu bruk ba tabiak gam gam dalam dom thun jaik ini. “Piah tah klaak bruk suh sah nan, kol dahlak caong ba tabiak bruk lac, pagap yau hu bruk salih karei halei dalam sarak kak je ngan saong dom Cty kayua salih karei dalam hukum, atau dom sarak, atau kayua harak gar Cty caga oh ka ginup ye brei hu bruk langyah cambaih laih dahlau. Dahlak taong yaom glaong meyah dua gah meda mek hu thỏa thuận dahlau haong gauk meng di tuk camereip.”

Thun 2022, Long An hu bahrau 4 labik ngak kong praong 1.770ha, patagok abih tih dom labik ngak kong ginup prein taduan đầu tư lac 24. Tỉnh ini jeng hu bahrau 1 cụm công nghiệp hu ba tame ngak, tui nan abih tih dom cụm ngak kong daok ngak bruk tagok tal 23 cụm. Di Long An urak ini hu 856 dự án đầu tư taneh ia langiu ( ieu katut lac FDI) di 36 taneh ia saong bhum lãnh thổ buh tame phun jien abih tih labaih 5.700 triệu USD saong 911 dự án đầu tư dalam taneh ia haong yaom phun jien abih tih labaih 116.600 tỷ đồng. Dom labik ngak kong daok ngak bruk dalam tỉnh hu ba bruk ngak saong jien mek tame tani tanat ka yaok pluh rabau urang ngak.

Meng dom kan kandah tavak tavaiy di doanh nghiệp FDI tamuh tabiak dalam tuk ngak bruk, karja tỉnh Long An bhian caik hatai tui pang saong kham merat duah jalan lang talaih. Tỉnh hu mboh dom tavak tavaiy rilo meng lac pambuak tal taneh riya dalam dom labik, dom cụm ngak kong, bruk kak je, harak gar; harak adat urang ngak, visa ka chuyên gia, urang ngak hu chất lượng glaong lac urang negar langiu, bảo hiểm xã hội ka urang ngak...

Urang pan akaok UBND tỉnh Long An khan lac, tỉnh pataom tame langyah dom tavak tavaiy tui thẩm quyền di tỉnh dalam 15 harei. Long An jeng meda hu dom roh duah khang ka sarak dui pachreih đầu tư, caik rilo prein khang daong ka doanh nghiệp cakrok. Gam haong daong palagaih saong daong ka urang đầu tư lang talaih kan kandah, tỉnh ini jeng meda pilih ruah urang đầu tư hu bruk ngak saong công nghệ lagaih haong jalan daok pamaong patagok. Brei thau jang ka bruk ini, ong Nguyễn Thành Thanh, Akaok mBan khik ramik dom khu kinh tế tỉnh Long An lac:  “Dahlak sahneng lac, ini jeng lac jalan piah dui pachreih dom urang  đầu tư mai haong Long An. Kol dahlak jeng meda pilih ruah urang đầu tư hu công nghệ bahrau, hu prein ngak siam piah ngak ka Long An cakrok khang kajap dalam tukvak tal.”

Thun 2023, piah daok dui pachreih hu urang buh jien tame ngak mbang, Long An brei kuhria kuhria, pasang iek paglaong bruk ngak di jabat xúc tiến đầu tư di tỉnh. Jabat ini meda hu prein yaih khan, ieu da-a, brei panuac daong ka dom urang đầu tư praong di dunya, dom tập đoàn rilo taneh ia saong khik kajap bruk yasa, dahlau hadei oh salih karei haong dom jabat chức năng hu thẩm quyền dalam bruk ngak harak adat đầu tư.  Long An tui jalan ngak lac “Tuk halei jeng yam takai nao gam haong doanh nghiệp” saong ini jeng lac panuac di Long An dalam thun 2023, ngan saong kadha “menyai nao gam haong ngak"./.